ទីភ្នាក់ងារព័ត៌មានអន្តរជាតិ បានផ្សាយថា តុលាការអាមេរិកបានទម្លាយឲ្យដឹងអំពីបទចោទប្រកាន់ ២ករណីទៅលើក្រុមហ៊ុន Huawei ដែលជាក្រុមហ៊ុនបច្ចេកវិទ្យាដ៏ធំរបស់ប្រទេសចិន ហើយការចោទប្រកាន់នេះ នឹងរឹតតែធ្វើឲ្យមហាអំណាចចិន និងអាមេរិក កាន់តែមានភាពតានតឹងនឹងគ្នាថែមទៀត ក្នុងនោះមានទាំងករណីចាប់ខ្លួនមន្ត្រីជាន់ខ្ពស់ក្រុមហ៊ុនមួយនេះពីសំណាក់អាជ្ញាធរកាណាដា ទៅតាមសំណើចាប់ខ្លួនធ្វើឡើងដោយអាមេរិក។
ទីភ្នាក់ងារព័ត៌មានបារាំង AFP បានចុះផ្សាយថា ក្រសួងយុត្តិធម៌អាមេរិក បានបញ្ចេញឲ្យដឹងនូវការចោទប្រកាន់ ១៣ករណីទៅលើក្រុមហ៊ុនបច្ចេកវិទ្យា Huawei នាយិកាហិរញ្ញវត្ថុក្រុមហ៊ុន អ្នកស្រី ម៉េង វ៉ាន់ចូវ ដែលជាកូនស្រីស្ថាបនិកនៃក្រុមហ៊ុននេះ និងមនុស្ស ២នាក់ផ្សេងទៀត ដែលពាក់ព័ន្ធនឹងការរំលោភលើច្បាប់ទណ្ឌកម្មដែលអាមេរិកដាក់ទៅលើប្រទេសអ៊ីរ៉ង់។ អ្នកស្រី ម៉េង សព្វថ្ងៃនេះ កំពុងស្ថិតនៅក្រៅឃុំនៅក្នុងប្រទេសកាណាដានៅឡើយ។
ករណីរបស់អ្នកស្រី ម៉េង កំពុងតែបញ្ឆេះវិបត្តិដ៏ធំមួយរវាងក្រុងប៉េកាំង និងក្រុងអូតាវ៉ា ដែលរងការចោទប្រកាន់ពីចិនថា ធ្វើអ្វីតាមតែបំណងរបស់ក្រុងវ៉ាស៊ីងតោន។
AFP បានចុះផ្សាយបន្តថា បទចោទប្រកាន់ ១០ករណី ត្រូវបានគេប្ដឹងឡើងប្រឆាំងនឹងមនុស្ស ២នាក់របស់ក្រុមហ៊ុន Huawei ថាបានលួចបច្ចេកវិទ្យារ៉ូបូតរបស់ក្រុមហ៊ុន T-Mobile របស់អាមេរិក។
អ្នកស្រី ម៉េង ដែលត្រូវបានសមត្ថកិច្ចកាណាដាចាប់ខ្លួននៅទីក្រុងវ៉ាន់កូវ័រកាលពីថ្ងៃទី១ ខែធ្នូកន្លងមក ទៅតាមសំណើរបស់ក្រុងវ៉ាស៊ីងតោននោះ ត្រូវបានគេរំពឹងថា នឹងត្រូវបញ្ជូនទៅអាមេរិក ចំពេលមានសម្ពាធពីក្រុងប៉េកាំងទៅលើប្រទេសកាណាដា ដែលឈានទៅដល់ការចាប់ខ្លួនជនជាតិកាណាដា ២នាក់ ជាការសងសឹកមកវិញ។
អគ្គរដ្ឋអាជ្ញារស្ដីទីអាមេរិក ត្រូវបានដកស្រង់សម្ដីដែលបានថ្លែងថា សំណើសុំធ្វើបត្យាប័នអ្នកស្រី ម៉េង នឹងត្រូវបញ្ជូនទៅកាណាដានៅថ្ងៃទី៣០ ខែមករានេះ៕
