សាលាឧទ្ធរណ៍ នឹងប្រកាសសាលដីកាជុំវិញសំណុំរឿងស្នើសុំនៅក្រៅឃុំបណ្តោះអាសន្នរបស់លោក រ៉ាត់ រត្នមុនី នៅថ្ងៃស្អែកនេះ។
ប្រធានសហព័ន្ធសហជីពសំណង់កម្ពុជា លោក រ៉ាត់ រត្នមុនី កាលពីថ្ងៃទី១៣ ខែធ្នូ ត្រូវបានតុលាការកម្ពុជាចោទប្រកាន់ និងបញ្ជូនទៅឃុំខ្លួននៅពន្ធនាគារព្រៃស បន្ទាប់ពីរកឃើញថា គាត់បានចូលរួមជួយផលិតខ្សែភាពយន្តឯកសាររបស់ស្ថានីយទូរទស្សន៍រុស្ស៊ី RT រឿង «ម្ដាយខ្ញុំលក់ខ្ញុំ»។
អ្នកនាំពាក្យសាលាឧទ្ធរណ៍ លោក ទូច ថារិទ្ធិ មានប្រសាសន៍ថា សំណុំរឿងលោក រ៉ាត់ រត្នមុនី នឹងត្រូវប្រកាសសាលដីកានៅថ្ងៃស្អែក ម៉ោង៨:៣០នាទីព្រឹក។ ដោយឡែក លោកថា មិនដឹងតុលាការជូនដំណឹងឬមិនបានជូនដំណឹងទៅមេធាវីការពារក្តីឲ្យលោក រ៉ាត់ រត្នមុនី នោះទេ។ ប៉ុន្តែលោកថា សំណុំរឿងនេះជារឿងរដ្ឋប្បវេណី មិនបាច់មានមេធាវីក៏ជំនុំជម្រះបានដែរ។
លោកមានប្រសាសន៍ថា៖ «បើសិនជាមានមេធាវី គេកោះហៅមេធាវីឲ្យចូលខ្លួន ដើម្បីធ្វើសេចក្តីថ្លែងការណ៍ ទៅតាមនីតិវិធីច្បាប់ ពាក់ព័ន្ធនេះជាសំណុំរឿង រដ្ឋប្បវេណី មិនមែនជារឿងព្រហ្មទណ្ឌ ឬបទឧក្រិដ្ឋឯណា»។
លោក សំ ទិត្យសីហា ជាមេធាវីការពារក្តីឲ្យលោក រ៉ាត់ រត្នមុនី បានពន្យល់តាមនីតិវិធីច្បាប់ថា លោកបានដាក់ពាក្យប្តឹងទៅសាលាដំបូង ដើម្បីសុំឲ្យកូនក្តីបាននៅក្រៅឃុំជារឿងព្រហ្មទណ្ឌ ។ ករណីនេះ លោកថា តាមនីតិវិធីសាលាឧទ្ធរណ៍ត្រូវជូនដំណឹងទៅមេធាវី ដើម្បីត្រៀមខ្លួនចូលការពារក្តីនោះ ប៉ុន្តែ លោកថា តុលាការមិនបានជូនដំណឹងនោះទេ ដោយលោកហៅការជម្រះក្តីដោយពុំមានមេធាវី ធ្វើឲ្យប៉ះពាល់ដល់សិទ្ធិកូនក្តីរបស់លោកមួយផ្នែក។
លោកមានប្រសាសន៍ថា៖ «ករណីនេះ ក្នុងនាមខ្ញុំមេធាវី បាត់ឱកាសក្នុងការចូលរួមក្នុងសវនាការនៃអង្គសេចក្តី។ ខ្ញុំមានការសោកស្តាយ ហើយក៏យើងមិនបានលើកទឡ្ហីករ ឬក៏អង្គហេតុ ឬក៏អង្គច្បាប់ណាមួយ ដើម្បីជួយដល់កូនក្តី ហើយទាក់ទងរឿងរដ្ឋប្បវេណី មិនអាចឃុំខ្លួនជនណាម្នាក់តាមរយៈសំណុំរឿងរដ្ឋប្បវេណីបានទេ»។
ក្រោយពីសាលាឧទ្ធរណ៍បើកការសាកសួរនាព្រឹកនេះ ភរិយារបស់លោក រ៉ាត់ រត្នមុនី គឺអ្នកស្រី ឡុង គឹមហ៊ាង បានអំពាវនាវទៅតុលាការដោះលែងស្វាមីគាត់ឲ្យបាននៅក្រៅឃុំ ដើម្បីបានជួបជុំគ្រួសារ រកប្រាក់ទ្រទ្រង់ជីវភាពគ្រួសារ ខណៈជីវភាពគ្រួសារកំពុងជួបបញ្ហាប្រឈម។
អ្នកស្រីអំពាវនាវថា៖ «ខ្ញុំជាប្រពន្ធនៅជាមួយគាត់ យើងមានផ្ទះ មានគ្រួសារ មានការងារពិតប្រាកដ។ ដូច្នេះ តុលាការអាចអនុញាតឲ្យប្តីខ្ញុំបាននៅក្រៅឃុំ។ ហើយតុលាការ អាចបន្តនីតិវីធីស៊ើបសួរតាមនីតិវីធីរបស់តុលាការទៀតចុះ តែយើងសុំឲ្យបាននៅក្រៅឃុំ ដើម្បីបន្តធ្វើការងារ មានប្រាក់ចំណូល ផ្គត់ផ្គង់ចិញ្ចឹមគ្រួសារ។ បើសិនគាត់នៅក្នុងហ្នឹងទៀត ខ្ញុំនឹងគ្រួសារខ្ញុំនឹងក្លាយជាគ្រួសារក្រីក្រមួយនៅក្នុងកម្ពុជា ពីព្រោះយើងបាត់បង់ចំណូល បាត់បង់ប្រាក់ខែ អត់មានធ្វើអ្វីទេ»។
កាលពីខែតុលាកន្លងទៅ សារព័ត៌មានរុស្ស៊ី Russia Today (RT) បានចេញផ្សាយនូវភាពយន្តឯកសារមួយដែលមានចំណងជើងថា «ម្ដាយខ្ញុំ លក់ខ្ញុំ» ដែលវីដេអូឯកសារនេះ និយាយអំពីស្រ្តីខ្មែរលក់កូនស្រីខ្លួនឯង ដោយសារជីវភាពខ្វះខាត ក៏ដូចជាស្ថានភាពស្រ្តីដែលប្រកបមុខរបររកស៊ីផ្លូវភេទនៅកម្ពុជា។
ក្រោយពីការផ្សព្វផ្សាយវីដេអូនេះ សមត្ថកិច្ចកម្ពុជាបកស្រាយថា វីដេអូនេះ ជារឿងប្រឌិតឡើង ដែលធ្វើឲ្យប៉ះពាល់កិត្តិយសដល់ប្រទេសកម្ពុជា ហើយក្រោយមកបានបើកការស៊ើបអង្កេតរកអ្នកជាប់ពាក់ព័ន្ធក្នុងការផលិតវីដេអូនេះ ដែលឈានដល់ការចាប់នឹងឃុំខ្លួនលោក រ៉ាត់ រត្នមុន្នី។
លោក រ៉ាត់ រត្នមុនី ត្រូវបានតុលាការសម្រេចចោទប្រកាន់ថា ញុះញង់ឲ្យមានការរើសអើង តាមមាត្រា៤៩៦ នៃក្រមព្រហ្មទណ្ឌ និងបញ្ជូនទៅឃុំខ្លួននៅពន្ធនាគារព្រៃស បន្ទាប់ពីគាត់ត្រូវបានអាជ្ញាធរប្រទេសថៃចាប់បញ្ជូនត្រលប់មកកម្ពុជាវិញ។ ប្រសិនបើលោកត្រូវបានរកឃើញថា មានកំហុសមែននោះ លោក រ័ត្នមុនី អាចនឹងត្រូវជាប់ទោសក្នុងពន្ធនាគារពី ១ ទៅ ៣ឆ្នាំ៕