នាយកភ្នាក់ងារស៊ើបការសម្ងាត់របស់អាមេរិក បង្ហាញក្តីព្រួយបារម្ភក្នុងរបាយការណ៏សន្តិសុខប្រចាំឆ្នាំរបស់ខ្លួនថាអាចនឹងមានវត្តមានយោធារបស់ចិននៅប្រទេសកម្ពុជា។
នៅក្នុងរបាយការណ៍កម្រាស់៤២ទំព័ររបស់ការិយាល័យភ្នាក់ងារស៊ើបការសម្ងាត់ជាតិអាមេរិក នាយកស្ថាប័ននេះ គឺលោក ដេន ខូត បាននិយាយថា ការវិលត្រឡប់របស់កម្ពុជាទៅរដ្ឋឯកបក្សបន្ទាប់ពីការបោះឆ្នោតកាលពីឆ្នាំមុន អាចនាំឲ្យចិនមានឥទ្ធិពលកាន់តែច្រើនឡើងនៅកម្ពុជា។
លោក បាននិយាយក្នុងរបាយការណ៏ដែលចុះថ្ងៃទី២៩ ខែមករា ២០១៩ នោះថា ៖ «ដំណើររបស់កម្ពុជាឆ្ពោះទៅប្រព័ន្ធផ្តាច់ការ ដែលបានជួយគណបក្សប្រជាជនកម្ពុជាឈានដល់កម្រិតកំពូលក្នុងការរក្សា និងគ្រប់គ្រងអំណាចយ៉ាងពេញលេញលើនីតិប្បញ្ញត្តិជាតិ បើកផ្លូវសំរាប់វិសោធនកម្មរដ្ឋធម្មនុញ្ញដែលអាចនាំឲ្យមានវត្តមានយោធាចិននៅក្នុងប្រទេស»។
អ្នកនាំពាក្យក្រសួងការពារជាតិកម្ពុជា នាយឧត្តមសេនីយ៍ ឈុំ សុជាតិ នៅថ្ងៃព្រហស្បតិ៍នេះបានច្រានចោលក្តីកង្វល់របស់នាយកភ្នាក់ងារស៊ើបការសម្ងាត់ជាតិអាមេរិករូបនេះ។
លោក ឈុំ សុជាតិ បានបដិសេដដូច្នេះថា ៖ « មិនមានករណីនេះអាចកើតឡើងបានទេ! សន្តិភាព យើងទទួលបានមកមានតំលៃខ្ពស់ណាស់ ប្រជាពលរដ្នយើងមិនចង់បានសង្គ្រាមទេ ហេតុអ្វីយកកងទ័ពបរទេសមកនៅ? »៕
លោក ឈុំ សុជាតិ បានប្រសាសន៍បន្ថែមទៀតថា កម្ពុជានៅរក្សាគោលជំហរដដែល គឺមិនមានមូលដ្ឋានកងទ័ពចិននោះទេ។
លោក ឈុំ សុជាតិ បាននិយាយបន្តដូច្នេះថា៖ «សម្តេចតេជោ លោកបានប្រកាសប្រាប់ហើយថា កុំអោយកង្វល់ វាអត់មានទេ អញ្ចឹងគាត់ទៅវៀតណាម គាត់ជួបជាមួយនាយករដ្ឋមន្រ្តីវៀតណាម។ គាត់បានប្រកាសមុខនាយករដ្ឋមន្រ្តីវៀតណាម ថាអត់មានបញ្ហាហ្នឹងទេហើយគាត់បានដើរប្រកាសប៉ុន្មានប្រទេសថា អត់មានទេបញ្ហាវត្តមានកងទ័ពជើងទឹកចិនឬនាវាចិនឬក៏វត្តមានកងទ័ពចិនមកកម្ពុជា»។
សារព័ត៌មាន Asia Times នៅពេលនោះបានដកស្រង់ប្រភពអ្នកការទូតនិងក្រុមអ្នកវិភាគមិនបញ្ចេញឈ្មោះ ថាក្រុងប៉េកាំងបានបញ្ចុះបញ្ចូលកម្ពុជាតាំងពីឆ្នាំ២០១៧ ដើម្បីមានមូលដ្ឋានកងទ័ពជើងទឹកដែលអាចផ្ទុកយន្តហោះចម្បាំង នាវាពិឃាតនិងនាវាដទៃទៀតរបស់កងទ័ពរំដោះប្រជាជនចិន។
នៅក្នុងកិច្ចប្រជុំកំពូលអាស៊ានលើកទី៣៣ នៅក្នុងប្រទេសសិង្ហបុរី កាលពីថ្ងៃទី១៣-១៥ ខែវិច្ឆិកា ឆ្នាំ២០១៨ អនុរដ្ឋមន្ត្រីការបរទេសអាមេរិក John Sullivan ក៏ធ្លាប់បានចោទសួរទៅលោក ប្រាក់ សុខុន រដ្ឋមន្ត្រីការបរទេសកម្ពុជាជុំវិញបញ្ហានេះផងដែ។ លោកថា បើសិនជាមានមូលដ្ឋានទ័ពចិននៅកម្ពុជាពិតមែននោះ នឹងប៉ះពាល់ធ្ងន់ធ្ងរដល់ទំនាក់ទំនងប្រទេសទាំងពីរ៕
