ពលរដ្ឋដែលមានជម្លោះដីធ្លីនៅក្នុងស្រុកជាំក្សាន្ត ខេត្តព្រះវិហារ បានស្វែងរកកិច្ចអន្តរាគមន៍ពីលោកនាយករដ្ឋមន្រ្តី ហ៊ុន សែន ឲ្យជួយដោះលែងអ្នកភូមិ ១៣នាក់ ដែលត្រូវបានអាជ្ញាធរខេត្តនេះចាប់ខ្លួន ក្រោយមានជម្លោះដីធ្លីជាមួយក្រុមហ៊ុនឯកជនមួយ។
អ្នកភូមិ ១៣នាក់ ដែលជម្លោះដីធ្លីជាមួយក្រុមហ៊ុនមេត្រីភាព ស្ថិតក្នុងឃុំយាង ត្រូវបានអាជ្ញាធរខេត្តព្រះវិហារចាប់ខ្លួន និងរឹបអូសទ្រព្យសម្បត្តិជាបន្តបន្ទាប់ ដែលតំណាងពលរដ្ឋអះអាងថា ការចាប់ខ្លួននោះពុំមានដីកាពីតុលាការនោះឡើយ។
លោក ឡយ លីហួរ ដែលអះអាងថា ជាតំណាងពលរដ្ឋនោះ បានប្រាប់អ្នកសាព័ត៌មានក្រោយដាក់ញត្តិថា អ្នកភូមិប្រហែល ២០០នាក់ បានប្រមូលផ្តុំគ្នាដាក់ញត្តិនៅខុទ្ទកាល័យនាយករដ្ឋមន្រ្តី និងក្រសួងរៀបចំដែនដី នៅថ្ងៃនេះ ដើម្បីសុំអន្តរាគមន៍ជួយដោះស្រាវិវាទដីធ្លី និងសុំអន្តរាគមន៍ដោះលែងអ្នកភូមិ ១៣នាក់ផងដែរ។
លោកបន្ថែមថា៖ «ពួកខ្ញុំចូលទៅកាន់កាប់ហ្នឹងនៅដើមឆ្នាំ២០១៣ រហូតដល់ឆ្នាំ២០១៨ ទើបមានការផ្ទុះឡើងរវាងប្រជាពលរដ្ឋជាមួយក្រុមហ៊ុនមេត្រីភាព។ ក្រុមហ៊ុន! គេនិយាយថា ដីគេទទួលការវិនិយោគពីរដ្ឋាភិបាលដើម្បីដាំដំណាំកសិកឧស្សាហកម្មដាំកៅស៊ូ ប៉ុន្តែ តាំងពីពេលហ្នឹងមកក្រុមហ៊ុនដូចអត់មានដាំអីទេ»។
អ្នកស្រី សារឿន សុឃាន អះអាងថា ប្តីនិងកូនប្រុសពីរនាក់របស់គាត់ត្រូវបានអាជ្ញាធរចាប់ខ្លួនយ៉ាងអយុត្តិធម៌ ដោយថា ស្វាមីនិងកូនៗរបស់គាត់មិនបានប្រព្រឹត្តបទល្មើសអ្វីនោះទេ។
ស្រ្តីរូបនេះ បានចោទថាអាជ្ញាធរខេត្តបានគំរាមកំហែងចាប់ខ្លួនអ្នកភូមិបន្តទៀត ប្រសិនបើហ៊ាននាំគ្នាឡើងទៅតវ៉ានៅភ្នំពេញ និងបានដុតផ្ទះពលរដ្ឋចោលអស់ជាច្រើនខ្នងទៀត។
អ្នកស្រីបន្ថែមថា៖ «ប្តីខ្ញុំឌុបកូនៗទៅរើចម្ការ គេចាប់ប្តីខ្ញុំ កូនខ្ញុំ រួមទាំងម៉ូតូយកទៅអស់ហើយ យកទូរស័ព្ទកូនខ្ញុំទៀត ចាប់ប្តីខ្ញុំដាក់ខ្នោះ រួមទាំងកូន ហើយកូនខ្ញុំមួយអាយុ ១៧ឆ្នាំ និងអាមួយទៀតអាយុ ១៥ឆ្នាំ មិនទាន់ឈប់រៀនទេ។ ចាប់កូនខ្ញុំដាក់ខ្នោះរឹតឡើងប៉ឺងៗ»។
ពលរដ្ឋម្នាក់ទៀត អ្នកស្រី ទន អូន រៀបរាប់ទាំងហូរទឹកភ្នែកថា ប្តីរបស់គាត់ត្រូវបានអាជ្ញាធរចាប់ខ្លួនទាំងគ្មានកំហុស ចំពេលប្តីរបស់គាត់ត្រឡប់ពីស៊ីស្នួលដកដំឡូងឲ្យគេ។
អ្នកស្រីបន្ថែមថា៖ «ខ្ញុំគ្មានអ្វីទីពឹងទេ ខ្ញុំសូមឲ្យសម្តេច ហ៊ុន សែន និងលោកជំទាវ ប៉ុនរ៉ានី ជួយរកយុត្តិធម៌ឲ្យប្តីខ្ញុំផង។ គ្រួសារខ្ញុំក្រីក្រណាស់»។
មន្រ្តីខុទ្ទល័យនាយករដ្ឋមន្រ្តី គឺលោក គង់ ចំរើន បានទទួលញត្តិពីប្រជាពលរដ្ឋ ដោយសន្យានៅមុខពលរដ្ឋថា នឹងយកញត្តិនោះដាក់ជូនថ្នាក់លើពិនិត្យ និងធ្វើការដោះស្រាយបន្ត។
ចំណែកមន្រ្តីរដ្ឋបាលក្រសួងរៀបចំដែនដីដែលសុំមិនប្រាប់ឈ្មោះ បានទៅទទួលញត្តិពីអ្នកភូមិដល់កន្លែងខុទ្ទកាល័យដែរ ប៉ុន្តែ មន្រ្តីរូបនោះ មិនបានឆ្លើយតបនឹងសំណួររបស់អ្នកសាព័ត៌មាននោះឡើយ។
ព្រះរាជអាជ្ញាសាលាដំបូងខេត្តព្រះវិហារ លោក ទី សុវិនថាល់ ប្រាប់ វីអូឌី ថា ពលរដ្ឋទាំង ១៣នាក់នោះ ត្រូវបានសមត្ថកិច្ចចាប់ខ្លួនពាក់ព័ន្ធនឹងបទល្មើសព្រៃឈើ មិនមែនពាក់ព័ន្ធនឹងជម្លោះដីធ្លីនោះឡើយ ហើយសំណុំរឿងពលរដ្ឋទាំងនោះ ត្រូវបានបញ្ជូនទៅឲ្យចៅក្រមរួចហើយ។
លោក ទី សុវិនថាល់ មានប្រសាសន៍ថា៖ «សួររឿងអីទៀតហើយ? បើរឿងដដែល ខ្ញុំអត់ឆ្លើយទេ មិនមែនរឿងដីធ្លីទេណា? ខ្ញុំបង្រ្កាបបទល្មើសព្រៃឈើ។ កុំនិយាយរឿងដីធ្លី ដីធ្លីខ្ញុំអត់ដែលចាត់ការទេ។ ពួកគាត់ទាំងអស់ហ្នឹងបានបញ្ជូនដល់ដៃចៅក្រមហើយ។ អញ្ចឹង ខ្ញុំអត់អាចឆ្លើយបំភ្លឺបានទេ ព្រោះអាហ្នឹងវាជាសិទ្ធិរបស់ចៅក្រម ទៅសួរចៅក្រមទៅ»។
មន្រ្តីសម្របសម្រួលសមាគមការពារសិទ្ធិមនុស្សអាហុកប្រចាំខេត្តព្រះវិហារ លោក ឡោ ចាន់ ចាត់ទុកការចាប់ខ្លួនពលរដ្ឋទាំងនោះថា ធ្វើឡើងខុសនីតិវិធីច្បាប់ និងរំលោភសិទ្ធិមនុស្សធ្ងន់ធ្ងរ ដោយថា ករណីនេះមិនមែនជាបទល្មើសជាក់ស្ដែង ឬបទល្មើសព្រហ្មទណ្ឌនោះឡើយ។
លោកបន្ថែមថា៖ «បើសិនជាដីនៅតំបន់ហ្នឹងជាដីតំបន់អភិរក្ស ឬតំបន់ការពារពិតមែន អញ្ចឹងមិនមែនមានតែពលរដ្ឋប៉ុន្មានគ្រួសារហ្នឹងទេដែលគាត់រស់នៅប៉ះពាល់ គឺក្រុមហ៊ុនក៏ប៉ះពាល់តំបន់នោះដែរ។ ទី២ ដីរបស់អ្នកមានអំណាច ឬរបស់យោធាមួយចំនួននៅតំបន់នោះ វាក៏ប៉ះពាល់ដែរ។ ចុះហេតុអ្វីបានជាអាជ្ញាធរថា ប៉ះពាល់តែពលរដ្ឋប៉ុន្មានគ្រួសារហ្នឹង ហើយអាជ្ញាធរគាត់ចាប់ខ្លួនពលរដ្ឋទៀត?»។
ក្នុងលិខិតមួយដាក់ទៅខុទ្ទកាល័យនាយករដ្ឋមន្រ្តី ក្រុមពលរដ្ឋអះអាងថា អ្នកភូមិ ៣៣០គ្រួសារមានជម្លោះដីធ្លីជាមួយក្រុមហ៊ុនមេត្រីភាពតាំងពីពាក់កណ្តាលឆ្នាំ២០១៨ ក្រោយពេលអ្នកភូមិរងបណ្តឹងរបស់ទាហានម្នាក់ឈ្មោះ លុយ សម្បត្តិ ហៅ រឹម ខេន ដែលកំពុងយាមកាមក្រុមហ៊ុនមេត្រីភាពនោះ។
របាយការណ៍សង្ខេបមួយរបស់ក្រសួងរៀបចំដែនដី នគររូបនីយកម្ម និងសំណង់ ចេញផ្សាយចុងឆ្នាំមុន បានឲ្យដឹងថា វិវាទដីធ្លីទូទាំងប្រទេសជិត ១៥០០ករណីទៀត មិនទាន់បានដោះស្រាយចប់នៅឡើយ៕
