ក្រសួងសេដ្ឋកិច្ចបង្កើតក្រុមការងារចម្រុះរវាងអគ្គនាយកដ្ឋានពន្ធដារ និង សមាគមនិងអង្គការមិនមែនរដ្ឋាភិបាល ដែលមានសមាសភាពចំនួន២៨រូប ដើម្បីដោះស្រាយបញ្ហាពន្ធរបស់អង្គការសង្គមស៊ីវិល។
ប្រកាសរបស់ក្រសួងសេដ្ឋកិច្ចនិងហិរញ្ញវត្ថុ កាលពីថ្ងៃទី៣០ ខែមករា កន្លងទៅ លោករដ្ឋមន្ត្រី អូន ព័ន្ធមុនីរ័ត្ន បានសម្រេចបង្កើតក្រុមការងារចម្រុះអគ្គនាយកដ្ឋានពន្ធដារ ដែលមានសហប្រធានពីររូបគឺ លោក គង់ វិបុល អគ្គនាយកនៃអគ្គនាយកដ្ឋានពន្ធដារ និង លោក សឿង សារឿន នាយកប្រតិបត្តិនៃគណៈកម្មាធិការសហប្រតិបត្តិការដើម្បីកម្ពុជា ព្រមទាំងអនុប្រធានបួនរូប និងសមាជិក២២រូបផ្សេងទៀត។
ប្រកាសក្រសួងឲ្យដឹងថា ក្រុមការងារចម្រុះនេះមានភារកិច្ចក្នុងភាពជាដៃគូក្នុងការពង្រឹង ពិនិត្យ និងបកស្រាយច្បាប់ ព្រមទាំងកែសម្រួលនិងបង្កើតបទប្បញ្ញត្តិនានាពាក់ព័ន្ធនឹងពន្ធដារតាមការចាំបាច់។ ប្រកាសដដែលបន្តឲ្យដឹងពីភារកិច្ចទៀតថា ក្រុមការងារនេះជាអ្នកជួយបង្កើតជំនឿទុកចិត្តរបស់ដល់អ្នកជាប់ពន្ធ និងដោះស្រាយបញ្ហាដែលអាចកើតឡើងឥតព្រាងទុក (Ad hoc)។ ប្រកាសនេះក៏បានចែង ឲ្យក្រុមការងារចម្រុះនេះរៀបចំការប្រជុំរៀងរាល់បីខែម្តង ដោយសហប្រធានអាចចាត់តាំងអនុប្រធាន ឬសមាជិកដឹកនាំកិច្ចប្រជុំ។
កាលពីខែសីហា ឆ្នាំមុន តំណាងអង្គការសង្គមស៊ីវិលបានស្នើបង្កើតក្រុមការងារបច្ចេកទេសមួយ ដើម្បីសម្របសម្រួលឲ្យអង្គការផ្សេងៗទៀតក្នុងការដោះស្រាយបញ្ហាពន្ធជាមួយរដ្ឋាភិបាលជៀសវាងទទួលទោសទណ្ឌ ឬ វិធានការផ្លូវច្បាប់ផ្សេងៗ។ យោងតាមរបាយការណ៍ក្រសួងមហាផ្ទៃ អង្គការសមាគមមានជាង៥០០០ស្ថាប័ន ប៉ុន្តែ របាយការណ៍ចុះបញ្ជីបង់ពន្ធនៅក្រសួងសេដ្ឋកិច្ចនិងហិរញ្ញវត្ថុមានតែជាង៥០០អង្គការសមាគមតែប៉ុណ្ណោះ៕
