រដ្ឋាភិបាលអាមរិក បានសម្រេចផ្តល់ថវិកាជាង ១៧លានដុល្លារ សម្រាប់ជួយទ្រទ្រង់ដល់ការចិញ្ចឹមត្រីទឹកសាបនៅខេត្តចំនួន ៦ក្នុងប្រទេសកម្ពុជា។
ការផ្ដល់ជំនួយរបស់អាមេរិកនេះ ត្រូវបានប្រកាសឲ្យដឹងនៅក្នុងពិធីបើកការអនុវត្តគម្រោងអភិវឌ្ឍន៍វារីវប្បកម្មសម្រាប់និរន្តភាពពាណិជ្ជកម្ម (CAST) កាលពីរសៀលថ្ងៃព្រហស្បតិ៍កន្លងមកនេះ។
តំណាងស្ថានទូតសហរដ្ឋអាមេរិកប្រចាំនៅកម្ពុជា លោក Michael E. Newbill មានប្រសាសន៍ថា គម្រោង CAST ក៏នឹងជួយដល់ការផ្សារភ្ជាប់ទំនាក់ទំនងពាណិជ្ជកម្មរវាងកម្ពុជា និងសហរដ្ឋអាមេរិកផងដែរ។
ចំណែកឯរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ដែលបានចូលរួមក្នុងពិធីផងដែរនោះ បានទទួលថា គម្រោងដែលផ្ដល់ថវិកាដោយអាមេរិកនេះ ពិតជាសំខាន់ និងឆ្លើយតបទៅនឹងគោលដៅនៃការផ្គត់ផ្គង់ត្រីនៅក្នុងប្រទេសកម្ពុជា។
មន្ត្រីតំណាងស្ថានទូតអាមេរិកប្រចាំកម្ពុជា បានប្រកាសឲ្យដឹងថា គម្រោង CAST ទទួលបានការគាំទ្រនូវថវិកាដោយផ្ទាល់ពីក្រសួងកសិកម្មអាមេរិកចំនួនជាង ១៧.១ លានដុល្លារ សម្រាប់រយៈពេល ៥ឆ្នាំ ដើម្បីបង្កើន និងអភិវឌ្ឍន៍វារីវប្បកម្មទឹកសាបនៅកម្ពុជា នៅក្នុងខេត្តចំនួន ៦ រួមមាន ខេត្តកណ្តាល កំពង់ចាម កំពង់ធំ សៀមរាប បាត់ដំបង និងពោធិ៍សាត់៕
