មន្រ្តីក្រសួងឧស្សាហកម្ម និងសប្បកម្ម អះអាថា ពុំមានការរៀបចំពិធីសែនចូលឆ្នាំចិននៅស្តីការក្រសួងនោះទេ ក្រោយបែកធ្លាយលិខិតអញ្ជើញផ្លូវការរបស់ក្រសួងឲ្យមន្រ្តីចូលរួមពិធីនៅថ្ងៃនេះ។
ក្នុងលិខិតអញ្ជើញមួយចុះថ្ងៃទី៣០ ខែមករា ដែលវីអូឌីទើបទទួលបាននៅថ្ងៃនេះ ក្រសួងឧស្សាហកម្ម និងសប្បកម្ម បានឲ្យមន្ត្រីក្រសួងទាំងអស់ស្លៀកពាក់សមរម្យចូលរួមពិធីសែនចូលឆ្នាំចិននៅទីស្តីការក្រសួងនាថ្ងៃទី៤ ខែកុម្ភៈនេះ ក្រោមអធិបតីភាពរដ្ឋមន្រ្តីក្រសួងឧស្សាហកម្ម និងសប្បកម្ម លោក ចម ប្រសិទ្ធ។
អ្នកនាំពាក្យក្រសួងឧស្សាហកម្ម និងសប្បកម្ម លោក អ៊ុំ សុថា បានច្រានករណីនេះ ដោយលោកថា ពុំមានការសែនអ្វីធំដុំនោះទេ។ លោកបន្តថា ចំពោះការចេញលិខិតវិញ គឺរដ្ឋបាលធ្វើលើសពីអ្វីដែលក្រសួងណែនាំ ហើយថា ក្រសួងនឹងធ្វើការងារកែតម្រូវករណីនេះវិញ។
លោក អ៊ុំ សុថា មានប្រសាសន៍ថា៖ «យើងអត់មានទៅធ្វើអី ពិធីសែនចិនអីនៅក្នុងក្រសួងទេ។ យើងគ្រាន់តែនាំគ្នាអុចធូបនៅពេលថ្ងៃសីលធម្មតាទេ ហើយដោយសារថ្ងៃហ្នឹងមន្រ្តីរាជការគាត់មកធ្វើការទាំងអស់គ្នាទៅ យើងក៏ប្រាប់តៗគ្នា ប៉ុន្តែ ខាងរដ្ឋាបាលគាត់ទៅធ្វើលិខិតផ្លូវការអញ្ចឹង វាខុស យើងកំពុងកែតម្រូវវិញ»។
បើតាមប្រតិទិន ពិធីបុណ្យចូលឆ្នាំថ្មីតាមប្រពៃណីចិនក្នុងឆ្នាំ២០១៩នេះ ត្រូវរៀបចំធ្វើឡើងចាប់ពីថ្ងៃទី៥ ដល់ ថ្ងៃទី៧ ខែកុម្ភៈ ហើយពិធីបុណ្យមួយនេះ ត្រូវបានពលរដ្ឋកម្ពុជាខ្សែស្រឡាយចិនប្រារព្ធធ្វើជារៀងរាល់ឆ្នាំ៕