ទីភ្នាក់ងារព័ត៌មានម្នាក់នៅកាសែតបាត់ដំបងប៉ុស្តិ៍ ត្រូវបានជនមួយក្រុមវាយសម្លាប់នៅខេត្តក្រចេះ ខណៈត្រឡប់ពីរាំធុងបាស់ក្នុងកម្មវិធីមួយ។
ចាងហ្វាងការផ្សាយកាសែតអនឡាញបាត់ដំបងប៉ុស្តិ៍ លោក សែម ឌីយ៉ា ប្រាប់វីអូឌីថា អ្នកយកព័ត៌មានឲ្យស្ថាប័នលោកម្នាក់គឺឈ្មោះ ស៊ន សិទ្ធី ត្រូវបានជន១ក្រុមវាយសម្លាប់ត្រងចំណុចភូមិជើងឃ្លេ ឃុំ២ធ្នូ ស្រុកស្នួល ពេលជនរងគ្រោះនិងមិត្តភ័ក្រត្រឡប់មកពីរាំធុងបាស់។
លោកាមានប្រសាសន៍ថា៖ «បាទ! មានការសម្លាប់ពិតមែន ក្រោយត្រឡប់មកពីរាំធុងបាស់។ ពេលចេញមកវិញហ្នឹង ត្រូវយុវជន១ក្រុមមានគ្នាប្រហែល២០នាក់គប់ជាដុំថ្មចំគាត់ ហើយចំគាត់ជិះពីក្រោយហើយបណ្តាលឲ្យគាត់ធ្លាក់ពីលើម៉ូតូ ហើយនាំគ្នាវាយបន្ថែមរហូតស្លាប់នៅនឹងកន្លែងតែម្តង។ តែអធិការង គាត់សុំឲ្យសាព័ត៌មានយើងស្ងប់ស្ងាត់សិន កុំបង្ហោះឬបំប៉ោងព័ត៌មានមិនពិត ដោយថា ឥលូវនេះគាត់កំពុងតែដុតដៃដុតជើងស្វែងរកចាប់ជនល្មើស»។
អធិការរងនគរបាលស្រុកស្នួលលោក ប៊ុត ស៊ីនឿន និយាយយ៉ាងខ្លីថា សមត្ថកិច្ចកំពុងធ្វើការស៊ើបអង្កេតករណីនេះដោយ លោកស្នើឲ្យទៅថ្នាក់លើ ដើម្បីបានព័ត៌មានបន្ថែម។
លោកបន្ថែមថា៖ «ករណីនេះ សមត្ថកិច្ចយើងកំពុងធ្វើការងារស៊ើបអង្កេត។ ហើយមិនព្រមសួរទៅប្រធានអង្គភាពគេ មេៗហ្នឹង គេមានសិទ្ធិក្នុងការបញ្ចេញមតិយោបល»។
មន្រ្តីសមាគមអាដហុកប្រចាំខេត្តក្រចេះ លោក ធីម ហ៊ន មានប្រសាសន៍ថា លោកនឹងចុះស៊ើបអង្កេតករណីឃាតកម្មនេះ ដើម្បី ស្វែងរកមូលហេតុ។ លោក បានអំពាវនាវទៅសមត្ថកិច្ចត្រូវចាប់ជនដៃដល់មកផ្តន្ទាទោសតាមច្បាប់ ដើម្បីផ្តល់យុត្តិធម៌ជូនជនរងគ្រោះ។
លោកបន្ថែមថា៖ «ថ្ងៃស្អែកហ្នឹង ខ្ញុំនឹងចុះទៅសាកសួរករណីហ្នឹង ដើម្បីឲ្យដឹងច្បាស់រឿងហ្នឹងវាពាក់ព័ន្ធទៅនឹងករណីយ៉ាងម៉េច ខ្លះ»។
ចាប់តាំងពីឆ្នាំ១៩៩៤មក អ្នកសារព័ត៌មាននៅកម្ពុជាយ៉ាងតិចចំនួន ១៣នាក់ ត្រូវបានគេសម្លាប់។ ក្នុងចំណោមអ្នកសារព័ត៌មានចំនួន ១៣នាក់ មាន ៥នាក់ជាអ្នកដែលសរសេររិះគន់បក្សកាន់អំណាច ចំណែក ៧នាក់ទៀត បានធ្វើការស៊ើបអង្កេត និងរាយការណ៍អំពីអំពើពុករលួយពាក់ព័ន្ធនឹងបុគ្គលជាន់ខ្ពស់ក្នុងជួររដ្ឋាភិបាល និងស្ថាប័នយោធា៕
