អង្គការអន្ដរជាតិដែលធ្វើការផ្តោតលើសេរីភាព Freedom House បានវាយតម្លៃថា កម្ពុជាជាប្រទេសមិនមានភាពសេរីភាព និងជំរុញឲ្យអន្ដរជាតិបន្តតាមដានកម្ពុជាពីស្ថានភាពសិទ្ធិមនុស្ស និងប្រជាធិបតេយ្យ។
Freedom House បានបង្ហាញចំណាត់ថ្នាក់នេះ ក្នុងរបាយការណ៍របស់ខ្លួន ស្ដីពី «សេរីភាពនៅលើពិភពលោកឆ្នាំ២០១៩» មានកម្រាស់៣១ទំព័រ ។
របាយការណ៍បានរកឃើញថា ក្រៅពីកម្ពុជា មានប្រទេស៩ទៀត ដូចជាប្រទេស ចិន ប្រេស្ស៊ីល អ៊ីរ៉ាក់ ប៉ូឡូញ ស្រីលង្កា អេត្យូពី និងការមេរ៉ូន ជាដើម ជាប្រទេសមិនមានសេរីភាព កំពុងគំរាមកំហែងដល់លទ្ធិប្រជាធិបតេយ្យ និងសិទ្ធិមនុស្ស ។
របាយការណ៍វាយតម្លៃនេះ Freedom House បានសិក្សាទៅលើសេរីភាពសង្គមស៊ីវិល សិទ្ធិធ្វើនយោបាយ និងសេរីភាពប្រព័ន្ធផ្សព្វផ្សាយឯករាជ្យ។
Freedom House បានវាយតម្លៃឲ្យដឹងទៀតថា ប្រទេសដែលមានកងម្លាំងប្រដាប់អាវុធ និងតុលាការមិនឯករាជ្យ ជាប្រទេសនាំមុខគេ ជំរុញដល់ការធ្លាក់ចុះសេរីភាពនិងសិទ្ធិមនុស្ស ។
អង្គការអន្តជាតិមួយនេះ បានចាត់ទុកថា ពន្ទុធ្លាក់ចុះរបស់កម្ពុជា មកពីរដ្ឋាភិបាលបង្ក្រាបទៅលើគណបក្សប្រឆាំង សង្គមស៊ីវិល ប្រព័ន្ធផ្សព្វផ្សាយឯករាជ្យ និងការធ្វើយុទ្ធនាការជាចំហរបស់កងកម្លាំងប្រដាប់អាវុធកម្ពុជាគាំទ្រគណបក្សប្រជាជនកម្ពុជា ។
Freedom House ហៅសកម្មភាពនេះថា ប្រហាក់ប្រហែលគ្នាទៅនឹងកងកម្លាំងប្រដាប់អាវុធ ក្នុងប្រទេសប៉ាគីស្ថាន ដែលថា មានឥទ្ធិពលលើស្ថាប័នតុលាការ និងប្រព័ន្ធផ្សព្វផ្សាយ ហើយបានជួយឲ្យលោក Imran Khan ឈ្នះការបោះឆ្នោតជាប់ជានាយករដ្ឋមន្ដ្រីប៉ាគីស្ថាន។
ប៉ុន្តែ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានច្រានចោលរបាយការណ៍នេះ ។ អ្នកនាំពាក្យរូបនេះ ហៅការរកឃើញ Freedom House ថា មិនបានឆ្លុះបញ្ចាំងពីការពិតរបស់កម្ពុជា។
លោកថា៖ «សព្វថ្ងៃនេះ សិទ្ធិរបស់ប្រជាពលរដ្ឋយើង និងអ្នកនយោបាយ វាទូលំទូលាយជាងបណ្តាប្រទេសមួយចំនួនដែលអួតខ្លួនឯងថាជាអ្នកមានសិទ្ធិសេរីភាពផង។ ដូចនេះ សរុបមកវិញ ការវាយយម្លៃរបស់ Freedom House នេះវាមិនបានផ្សាភ្ជាប់ទៅនឹងភាពជាក់ស្តែង [នៅកម្ពុជា] ទេ ហើយអាចនិយាយថា ការវាយតម្លៃនេះមានចរិតនយោបាយលំអៀងខាងមនោគមវិទ្យា»។
ប្រធានគណៈកម្មាធិការសិទ្ធិមនុស្សរបស់រដ្ឋាភិបាល លោក កែវ រ៉េមី បានប្រាប់អ្នកសារព័ត៌មាននៅភ្នំពេញ ក្រោយត្រឡប់ពីកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីសប្តាហ៍មុនថា ប្រទេសជាច្រើន បានសរសើរពីការខិតខំប្រឹងប្រែងរបស់រដ្ឋាភិបាលកម្ពុជា។ លោកថា ក្នុងនោះមានទាំងភាពប្រលើរឡើងនៃស្ថានភាពសិទ្ធិមនុស្ស និងលទ្ធិប្រជាធិបតេយ្យផងដែរ។
ប៉ុន្តែ បើតាមវីដេអូផ្សាយផ្ទាល់ក្នុងកិច្ចប្រជុំ នៅទីក្រុងហ្សឺណែវ ប្រទេសស្វីស នាថ្ងៃទី៣០ ខែមករានោះ ប្រទេសមហាអំណាចសេដ្ឋកិច្ចធំៗមួយចំនួន របស់ប្លុកសេរី ដូចជា សហរដ្ឋអាមេរិក ចក្រភពអង់គ្លេស បារាំង និងកាណាដា ជាដើម បានលើកឡើងថា ស្ថានភាពសិទ្ធិមនុស្សនិងប្រជាធិបតេយ្យនៅកម្ពុជាបានធ្លាក់ចុះយ៉ាងធ្ងន់ធ្ងរគួរឲ្យព្រួយបារម្ភ។
ប្រទេសជាសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិទាំងនោះ បានរំឭកកម្ពុជា ឲ្យចូលរួមស្តារប្រជាធិបតេយ្យឡើងវិញ តាមរយៈការដោះលែងអតីតប្រធានគណបក្សសង្គ្រោះជាតិ លោក កឹម សុខា បើកលំហសេរីភាពដល់សង្គមស៊ីវិល ប្រព័ន្ធផ្សព្វផ្សាយឯករាជ្យ និង ត្រូវបើកផ្លូវឲ្យគណបក្សប្រឆាំងបានធ្វើនយោបាយឡើងវិញជាដើម។
