ក្រុមគ្រួសារនិងអ្នកគាំទ្រ លោក រ៉ាត់ រត្នមុនី អះអាងនៅថ្ងៃនេះថា ពួកគេនឹងនាំគ្នាទៅតវ៉ានៅមុខស្ថានទូតរុស្ស៊ីជារៀងរាល់សប្ដាហ៍ បើសិនជារដ្ឋាភិបាលរុស្ស៊ីមិនអន្តរាគមន៍មករដ្ឋាភិបាលកម្ពុជាដោះលែងផលិតកររូបនេះឲ្យមានសេរីភាពនោះ។
ភរិយាលោក រ៉ាត់ រត្នមុនី គឺអ្នកស្រី ឡុង គឹមហ៊ាង ប្រាប់អ្នកសារព័ត៌មាននៅមុខស្ថានទូតរុស្ស៊ីនាថ្ងៃនេះថា ប្រសិនបើរដ្ឋាភិបាលរុស្ស៊ីមិនជួយអន្តរាគមន៍ទេ ពួកគាត់នឹងនាំគ្នាទៅតវ៉ានៅមុខស្ថានទូតរុស្ស៊ីជារៀងរាល់សប្ដាហ៍នៅថ្ងៃពុធ។
អ្នកស្រីថា៖ «ពួកខ្ញុំនឹងមកបាតុកម្មនៅទូតរុស្ស៊ី ស្នើសុំឲ្យរដ្ឋាភិបាលរុស្ស៊ីអន្តរាគមន៍ទៅរដ្ឋាភិបាលកម្ពុជាទៀត ពួកខ្ញុំនឹងមកជារៀងរាល់សប្ដាហ៍ លុះណាតែមានការដោះលែងប្ដីខ្ញុំ ចេញពីគុកព្រៃស ហើយបើសិនជាមិនមានការដោះលែងខ្ញុំនឹងបន្តការតវ៉ាទៀត»។
អ្នកស្រី ឡុង គឹមហ៊ាង យល់ថា ការចាប់ស្វាមីគាត់ដែលជាអ្នកបកប្រែខ្សែភាពយន្តឯកសារ «ម្ដាយខ្ញុំ លក់ខ្ញុំ» ឲ្យទូរទស្សន៍រុស្ស៊ី RT នេះ គឺបង្ហាញឲ្យឃើញថា វិស័យសារព័ត៌មាននៅប្រទេសកម្ពុជា កំពុងរងការរឹតត្បិតដោយសារ អ្នកសារព័ត៌មានហ៊ាននិយាយការពិតពីបញ្ហាដែលកើតឡើងនៅក្នុងសង្គមបច្ចុប្បន្ន ត្រូវបានរដ្ឋាភិបាលចោទប្រកាន់និងចាប់ខ្លួន។
ទោះបីជាមានការស្រែកតវ៉ាទាមទារនៅខាងមុខស្ថានទូតរុស្ស៊ីចំនួន ៤ ដងទាំងលើកនេះហើយក៏ដោយ ប៉ុន្តែនៅតែមិនមានមន្ត្រីទូតណាម្នាក់ចេញមកជួបពួកគេនោះឡើយ។
កាលពីថ្ងៃទី១៣ ខែធ្នូ ឆ្នាំ២០១៨ លោក រ៉ាត់ រត្នមុនី ត្រូវបានតុលាការកម្ពុជាចោទប្រកាន់ និងបញ្ជូនទៅឃុំខ្លួននៅពន្ធនាគារព្រៃស បន្ទាប់ពីរកឃើញថា គាត់បានចូលរួមជួយផលិតខ្សែភាពយន្តឯកសាររបស់ស្ថានីយទូរទស្សន៍រុស្ស៊ី RT រឿង «ម្ដាយខ្ញុំ លក់ខ្ញុំ» ដែលរដ្ឋាភិបាលចាត់ទុកថា ជាការធ្វើឲ្យប៉ះពាល់ដល់កេរ្តិ៍ឈ្មោះរបស់កម្ពុជា ។
លោកត្រូវបានតុលាការចោទប្រកាន់ពីបទញុះញង់ឲ្យមានការរើសអើង តាមមាត្រា ៤៩៦នៃក្រមព្រហ្មទណ្ឌ ដែលត្រូវប្រឈមនឹងទោសក្នុងពន្ធនាគារពី១ ទៅ៣ឆ្នាំ។
ខ្សែភាពយន្តឯកសារនេះ និយាយពីស្ថានភាពស្ត្រីខ្មែរសម្រេចចិត្តលក់កូនស្រីឲ្យបម្រើផ្លូវភេទដោយសារតែជីវភាពក្រីក្រ។ ទាំង RT និងអ្នកផលិតអះអាងថា នេះជារឿងរ៉ាវពិតកំពុងតែកើតមានឡើងនៅកម្ពុជា ប៉ុន្តែរដ្ឋាភិបាលចាត់ទុកថា នោះជារឿងមិនពិតដែលប្រឌិតឡើងដើម្បីធ្វើឲ្យខូចឈ្មោះប្រទេស។
