មន្ទីរទេសចរណ៍ខេត្តព្រះសីហនុ បានឲ្យដឹងថា បុណ្យចូលឆ្នាំថ្មីប្រពៃណីចិននាឆ្នាំនេះ ភ្ញៀវទេសចរណ៍បានថយចុះ ៣៤,០៩% បើប្រៀបធៀបពេលវេលាដូចគ្នាកាលពីឆ្នាំ២០១៨។
ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹស្នា បានប្រាប់វីអូឌីនៅថ្ងៃនេះថា ព័ត៌មានបឋម ក្នុង រយៈពេល ៣ថ្ងៃ នៃពិធីបុណ្យចូលឆ្នាំចិន ចាប់ពីថ្ងៃទី៤ ដល់ថ្ងៃទី៦ ខែកុម្ភៈ ឆ្នាំ២០១៩នេះ មានភ្ញៀវសរុបប្រមាណជិត៦ម៉ឺននាក់( ៥៨,០០០នាក់) បានទៅលេងនៅខេត្តព្រះសីហនុ ដោយថា តួលេខនេះ មានការថយចុះ ៣៤,០៩% បើប្រៀបធៀបពេលវេលាដូចគ្នាកាលពីឆ្នាំ២០១៨ មានភ្ញៀវសរុបចំនួន ៨៨,០០០នាក់។
ប្រធានសមាគមទេសចរណ៍កម្ពុជា លោកស្រី ឆាយ ស៊ីវលីន មានប្រសាសន៍ថា ភ្ញៀវទេចរនៅខេត្តព្រះសីហនុ ថយចុះ ដោយសារកំណើនជនជាតិចិនទៅរស់នៅ និងប្រកបអាជីវកម្មនៅតំបន់នោះ។ លោកស្រីផ្តល់ជាយោបល់ថា ស្ថាប័នពាក់ព័ន្ធត្រូវធ្វើការកំណត់តម្លៃសេវាសណ្ឋាគារ ផ្ទះសំណាក់ និងអាហារដ្ឋាន ឲ្យបានសមរម្យ ទើបទាក់ទាញភ្ញៀវទេសចរទៅទស្សនានៅតំបន់នោះច្រើនជាងមុន។
លោកស្រីផ្តល់ជាអនុសាសន៍ថា៖«រួមគ្នាជួយដល់ភ្ញៀវទេសចរក្នុងស្រុក គឺផ្តល់សេវាកម្មដល់ទេសចរក្នុងស្រុក ផ្តល់ឲ្យតម្លៃដែលអាចទទួលយកបាន ស្រដៀងនឹងលើកមុន ធ្វើម៉េចឲ្យមានការទាក់ទាញ កុំឲ្យមានការខ្លាចរអា ព្រោះកន្លងមកពលរដ្ឋខ្លះ គាត់ថាទៅដល់ថ្ងៃពេក ចេះតែឮតៗគ្នា »។
យោងតាមរបាយការណ៍ ចុះកាលពីថ្ងៃទី២៤ ខែមករា ឆ្នាំ២០១៨ ដែលផ្ញើទៅរដ្ឋមន្ដ្រីក្រសួងមហាផ្ទៃ អភិបាលខេត្តព្រះសីហនុ លោក យន្ដ មីន បានឲ្យដឹងថា ក្នុងឆ្នាំ២០១៧ ជនបរទេសចូលមកស្នាក់នៅក្នុងខេត្តព្រះសីហនុ មានចំនួន ៦ ៣៨៥នាក់ ក្នុងនោះ ជនជាតិចិនមានច្រើនជាងគេ គឺ ៤ ៤៩៨នាក់ ឥណ្ឌូណេស៊ី មាន៩០៩នាក់ ហ្វីលីពីន ១២៧នាក់ ម៉ាឡេស៊ី ១២២នាក់ និងជនជាតិផ្សេងៗទៀត៕
