ក្រសួងពាណិជ្ជកម្មអំពាវនាវដល់ម្ចាស់អាជីវកម្មផលិតផលខ្មែរទាំងអស់ឲ្យចូលរួមឲ្យបានកុះករក្នុងពិធីបុណ្យទន្លេខាងមុខដែលនឹងប្រព្រឹត្តទៅនៅខេត្តកំពង់ឆ្នាំង ដើម្បីជំរុញនិងលើកកម្ពស់ផលិតផលក្នុងស្រុក។
ក្នុងសេចក្ដីជូនដំណឹងចុះថ្ងៃទី៧ ខែកុម្ភៈក្រសួងពាណិជ្ជកម្មឲ្យដឹងថាដើម្បីជំរុញ និងលើកកម្ពស់ផលិតផលក្នុងស្រុកឲ្យមានការទទួលស្គាល់ និងចូលរួមប្រើប្រាស់កាន់តែទូលំទូលាយទូទាំងប្រទេសនោះ ក្រសួងនឹងរៀបចំពិព័រណ៍ពាណិជ្ជកម្មផលិតផលខ្មែរក្នុងឱកាសបុណ្យទន្លេខាងមុខ។
ក្នុងសេចក្ដីជូនដំណឹងនេះ ក្រសួងពាណិជ្ជកម្ម ក៏បានជំរុញដល់ម្ចាស់អាជីវកម្មផលិតផលខ្មែរទាំងអស់រួសរាន់ដាក់ពាក្យមកក្រសួង ដើម្បីបានស្តង់តាំងពិព័រណ៍ក្នុងព្រឹត្តិការណ៍នេះ។
សេចក្ដីជូនដំណឹងនេះ បានសរសេរថា៖ « ការរៀបចំពិព័រណ៍នេះ ក្នុងគោលបំណងទូងស្គរពញ្ញាក់ស្មារតីមហាជនទូទៅ ឲ្យងាកមកគាំទ្រ និងប្រើប្រាស់ផលិតផលក្នុងស្រុកឲ្យបានច្រើនជាអតិបរមា។ ក្រសួងពាណិជ្ជកម្ម នឹងប្រមូលកៀរគរផលិតផលខ្មែរមានគុណភាពខ្ពស់មានសុវត្ថិភាពសម្រាប់អ្នកប្រើប្រាស់ មានការវេចខ្ចប់បានល្អត្រឹមត្រូវ អនុលោមតាមស្តង់ដារផលិតកម្មពីគ្រប់ទិសទីនៅទូទាំងប្រទេសមកដាក់តាំងបង្ហាញ និងស្វែងរកដៃគូរទៅលក់បន្ត » ។
ពិធីបុណ្យទន្លេនាឆ្នាំនេះប្រព្រឹត្តទៅក្នុងក្រុងកំពង់ឆ្នាំង នៃខេត្តកំពង់ឆ្នាំង ចាប់ពីថ្ងៃទី១៤ ដល់១៧ខែមីនា ឆ្នាំ២០១៩៕