ភាគីពាក់ព័ន្ធដែលធ្វើការក្នុងវិស័យធនាគារ រោងចក្រកាត់ដេរ សហគ្រាសធុនតូច និងមធ្យមបារម្ភពីវិធានការរបស់សហភាពអឺរ៉ុបដែលអាចឈានទៅដកប្រព័ន្ធអនុគ្រោះពន្ធពីកម្ពុជា ប៉ុន្ដែ ពួកគេក៏ប្រកាសគាំទ្ររដ្ឋាភិបាលក្នុងការទ្រទ្រង់សេដ្ឋកិច្ចរបស់ខ្លួន។
កាលពីថ្ងៃទី១១ ខែកុម្ភៈកន្លងទៅនេះ សហភាពអឺរ៉ុបបានប្រកាសចាប់ផ្ដើមដំណើរដែលឈានដល់ការផ្អាកជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជា បន្ទាប់ពីមើលឃើញការធ្លាក់ចុះនៃលទ្ធិប្រជាធិបតេយ្យ បញ្ហាសិទ្ធិមនុស្ស និងនិតិរដ្ឋនៅក្នុងរយៈពេល ១៨ខែចុងក្រោយមកនេះ។
សហភាពអឺរ៉ុបក៏ប្រកាសផងដែរថា កម្ពុជានៅមានពេលវេលាក្នុងការរក្សាប្រព័ន្ធអនុគ្រោះពន្ធរបស់ខ្លួន ដោយជំរុញឲ្យរដ្ឋាភិបាលគោរពកាតព្វកិច្ចសិទ្ធិមនុស្ស និងលទ្ធិប្រជាធិបតេយ្យ ដែលជាបេះដូងនៃភាពជាដៃគូជាមួយសហគមន៍អឺរ៉ុប។
ភ្លាមៗ ក្រោយការប្រកាសរបស់សហភាពអឺរ៉ុបនេះ សមាគមរោងចក្រកាត់ដេរនៅកម្ពុជា ហៅកាត់ថា «GMAC» បានស្នើសុំឲ្យអឺរ៉ុបពិចារណាឡើងវិញចំពោះវិធានការបស់ខ្លួន ដោយថា វាធ្វើឲ្យផលប៉ះពាល់ដល់កម្មកររោងចក្រជាង ៧០ម៉ឺននាក់។ មិនតែប៉ុណ្ណោះ GMAC អះអាងថា វិធានការព្យួរ EBA នឹងធ្វើឲ្យប៉ះពាល់ដល់សមត្ថភាពប្រកួតប្រជែងរបស់កម្ពុជា ដោយថា ការព្យួរ EBA នឹងបង្កើនអត្រាពន្ធចំនួន ១២ភាគរយនៅក្នុងវិស័យកាត់ដេរសំលៀកបំពាក់ និងចំនួនពី ៨ ទៅ ១៧ភាគរយ សម្រាប់ផលិតផលស្បែកជើង។
GMAC លើកឡើងក្នុងសេចក្ដីថ្លែងការណ៍ថា៖ «សមត្ថភាពប្រកួតប្រជែងរបស់យើងនឹងស្ថិតក្នុងហានិភ័យដោយមិនសមហេតុផល កេរ្ដិ៍ឈ្មោះឧស្សាហកម្មរបស់យើងនឹងទទួលរងផលប៉ះពាល់ ហើយការអភិវឌ្ឍរបស់កម្ពុជានឹងត្រូវផ្អាក។ កិច្ចខិតខំប្រឹងប្រែងទាំងអស់នៅក្នុងការកសាងចង្វាក់ផ្ដត់ផ្គង់សំលៀកបំពាក់ដែលមានលក្ខណៈទទួលខុសត្រូវ នឹងត្រូវអន្ដរាយ ហើយវានឹងប៉ះពាល់យ៉ាងខ្លាំងសម្រាប់កម្មករ ជាពិសេសអ្នកដែលមកពីទីជនបទ»។
ប្រធានសម្ព័ន្ធសមាគមសហគ្រាសធុនតូច និងមធ្យម លោក តែ តាំងប៉ សំដែងការសោកស្ដាយដែលសហគមន៍អឺរ៉ុបបានសម្រេចចាប់ផ្ដើមវិធានការពាក់ព័ន្ធនឹងរឿង EBA នេះ។ ប៉ុន្ដែ លោកថា វិធានការរបស់អឺរ៉ុបនេះមានផលប៉ះពាល់តិចតួចប៉ុណ្ណោះ មកលើសហគ្រានធុនតូច និងមធ្យម ហើយជាឱកាសអាចធ្វើឲ្យកម្ពុជាលែងពឹងផ្អែកបរទេស និងអភិវឌ្ឍសេដ្ឋកិច្ចដោយខ្លួនឯង។
លោកផ្ដល់អនុសាសន៍ថា ដើម្បីដោះស្រាយបញ្ហាសេដ្ឋកិច្ចក្រោមសំពាធពីអន្ដរជាតិនេះ អាជ្ញាធរនៅថ្នាក់ក្រោមជាតិ ត្រូវអនុវត្តតាមវិធានការដែលរដ្ឋាភិបាលបានដាក់ចេញ ដោយត្រូវកាត់បន្ថយការនាំចូលផលិតផលសម្រេចពីបរទេស និងត្រូវបង្កើនផលិតផលក្នុងស្រុក ដើម្បីនាំចេញទៅលក់នៅបរទេស។
លោកបន្ដថា៖ «រដ្ឋាភិបាលយើងយុទ្ធសាស្ដ្រចតុកោណ គោលនយោបាយមានទាំងអស់ ថ្នាក់ក្រោមជាតិសូមឲ្យអនុវត្តផង […] ក៏ប៉ុន្ដែយើងហាមដាច់ខាតការនាំចូលផលិតផលសម្រេចពីបរទេសដោយក្រសួងពាណិជ្ជកម្មគេធ្វើតាមរយៈពិព័រណ៍ អញ្ចឹងសហគ្រាសធុនតូចមធ្យម នៅពេលប្រទេសជិតខាតជឿនលឿនដឹងមកម្ដងៗរាប់រយកុងតឺន័រ សួរថានៅក្នុងស្រុកផលិតអីទៀត យើងអត់ហាមគេទេ បើនៅក្នុងស្រុកធ្វើបាន រឿងអីឲ្យគេចូលបាន»។
អនុប្រធាននាយកប្រតិបត្តិធនាគារអេស៊ីលីដា លោកស្រី សូ ផនណារី មានប្រសាន៍ថា វិធានការឈានទៅព្យួរប្រព័ន្ធអនុគ្រោះពន្ធពីកម្ពុជា មិនមានផលប៉ះពាល់អ្វីដល់វិស័យធនាគារ និងមីក្រូហិរញ្ញវត្ថុនោះទេ។
ប៉ុន្ដែ លោកស្រី បញ្ជាក់ថា វាអាចមានផលអវិជ្ជមានដល់ផ្នែកឥតទានខ្នាតតូច ឬជំនួញខ្នាតតូច ដោយលោកស្រីអះអាងថា អ្នកខ្ចីប្រមាណ៨០ភាគរយ ជាកម្មករ និងកសិករ។ លោកស្រីជឿជាក់ថា ក្រុមហ៊ុនឯកជននឹងអាចជួយសម្រួលបន្ទុកដល់អតិថិជន ប្រសិនបើពួកគេរងផលប៉ះពាល់កើតចេញពីវិធានការដក EBA របស់អឺរ៉ុបនោះ ដូចជា ធនាគារមានគោលការណ៍ការពារអតិថិជន ពង្រឹងគុណភាពក្នុងការផ្ដល់កម្ចី និងវិធានកាទប់ស្កាត់ហានិភ័យផ្សេងៗ។
លោកស្រីមានប្រសាសន៍ថា៖ «ភាគច្រើនគាត់នៅក្នុងជំនួញខ្នាតតូចរបស់អេស៊ីលីដា ហើយកម្មករ កសិករគាត់នៅក្នុងជំនួញខ្នាតតូច […] ការផ្ដល់ឥតទាន គឺយើងអត់ឲ្យគាត់ប៉ះពាល់ព្រោះយើងចង់រក្សាគាត់ឲ្យមានបទពិសោធន៍ជាមួយធនាគារ ហើយផ្ដល់សេវាល្អឲ្យគាត់ ឲ្យគាត់មានទំនុកចិត្ត។ ដូចថា ឥឡូវគាត់អាក់នៅក្នុងប្រាក់ចំណូលគាត់ យើងក៏មើលឡើងវិញថា គាត់អាចនឹងមានការងារ ឬចាប់ផ្ដើមបង់វិញ ឬផ្ដាស់ពីការងារមយយទៅការងារមួយ យើងរងចាំគាត់រកប្រាក់ចំណូលពីការងារថ្មីរបស់គាត់»។
យ៉ាងណាក៏ដោយ ក្រោយការប្រកាសរបស់សហភាពអឺរ៉ុបជុំវិញបញ្ហារឿង EBA នេះ រដ្ឋាភិបាលកម្ពុជាបានប្រកាសពីវិធានការទប់ស្កាត់ ដោយថាក្រសួងស្ថាប័នពាក់ព័ន្ធបានធ្វើកំណែទម្រង់ និងបានជួយកាត់បន្ថយចំណាយថ្លៃដើមផលិតកម្ម ការដឹកជញ្ជូន និងគោលនយោបាយគាំទ្រដល់កម្មករ និងកសិករ។
ក្នុងសេចក្ដីប្រកាសព័ត៌មានរបស់ខ្លួន សហភាពអឺរ៉ុបឲ្យដឹងថា កម្ពុជាបាននាំចេញទំនិញទៅកាន់ទីផ្សារអឺរ៉ុប មានតម្លៃដល់ទៅ ៤.៩ពាន់លានដុល្លារ កាលពីឆ្នាំ២០១៨។ ផលិតផលដែលកម្ពុជានាំចេញទៅទីផ្សារអឺរ៉ុបនោះ រួមមាន ផលិតផលកាត់ដេរសំលៀកបំពាក់ បន្លែ និងម្ហូបអាហារ និងយានយន្ដ ដែលមានទំហំដល់ទៅ ៩៩ភាគរយ នៃទំនិញសរុបដែលកម្ពុជានាំចូលទៅទីផ្សារអន្ដរជាតិមួយនេះ។ ហើយទំនិញមានតម្លៃដល់ទៅ ៤.៨ពាន់លានដុល្លារអាមេរិក សុទ្ធតែស្ថិតនៅក្រោមប្រព័ន្ធអនុគ្រោះពន្ធ EBA នេះ។
របាយការណ៍រដ្ឋាភិបាលបានឲ្យដឹងផងដែរថា ទំនិញដែលនាំចេញពីកម្ពុជាទៅទីផ្សារអឺរ៉ុប បានរួចផុតពីកាតព្វកិច្ចបង់ពន្ធ ដែលមានតម្លៃជាទឹកប្រាក់ដល់ទៅជិត ៧០០លានដុល្លារក្នុងមួយឆ្នាំៗ៕
