អគ្គនាយកដ្ឋានអន្តោប្រវេសន៍ អះអាងថា កោះហៅមន្ត្រីទទួលខុសត្រូវច្រកទ្វារព្រំដែនប៉ោយប៉ែតមកសាកសួរ និងស្រាវជ្រាវ ជុំវិញភាពមិនប្រក្រតីដែលថាមានការទាមទារប្រាក់ក្រៅផ្លូវការ ជាថ្នូរនឹងការបំពេញឯកសារលើលិខិតឆ្លងដែនចេញចូលប្រទេសថៃ។
អគ្គនាយកដ្ឋានអន្តោប្រវេសន៍បានបង្ហោះក្នុងទំព័រហ្វេសរបស់ខ្លួនកាលពីថ្ងៃទី១៤ ខែកុម្ភៈ ឆ្នាំ២០១៩ ថា អគ្គភាពមួយនេះបានធ្វេីការកោះហៅមន្រ្តីទទួលខុសត្រូវច្រកទ្វារអន្តរជាតិប៉ោយប៉ែតមកសាកសួរ និងកំពុងចាត់វិធានការស្រាវជ្រាវចំពោះករណីនេះយ៉ាងយកចិត្តទុកដាក់បំផុត។
អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក កែម សារិន បានប្រសាសន៍ថារហូតមកដល់ពេលនេះ មិនទាន់មានចំណាត់ការលើមន្រ្តីច្រកទ្វារអន្តរជាតិប៉ោយប៉ែតណាមួយនៅឡើយទេ។
លោកមានប្រសាសន៍ថា៖ «ចាំសិនទៅ អត់ទាន់មានរបាយការណ៍ ចាំរបាយការណ៍យ៉ាងម៉េច ចាំពេលក្រោយបានដឹង ទើបម្សិលមិញ! មានការពិតសិនបានគេចាត់នីតិវិធី វិធានការទៅតាមជាក់ស្តែង»។
ប្រធាននាយកដ្ឋានទទួលបន្ទុកច្រកទ្វារអន្តរជាតិប៉ោយប៉ែត កម្ពុជា-ថៃ លោក យូ សារ៉ុន សុំមិនធ្វើការបកស្រាយជុំវិញករណីនេះទេ។
មន្ត្រីឃ្លាំមើលសិទ្ធិមនុស្សសមាគមអាដហុក លោក ស៊ុំ ចន្ទគា ដែលអះអាងតាមដានករណីនេះ បានរៀបរាប់ថា នៅពេលពលករ អ្នកដើរកំសាន្ត ទិញអីវ៉ាន់ និងទៅពេទ្យពិនិត្យសុខភាពនៅប្រទេសថៃ ត្រូវបានមន្ត្រីអន្តោរប្រវេសន៍នៅច្រកទ្វារព្រំដែនអន្តរជាតិប៉ោយប៉ែត និងមន្ត្រីជំនិត តម្រូវឲ្យបំពេញបែបបទចូលទៅប្រទេសថៃ ដោយមនុស្សម្នាក់ត្រូវចំណាយម្តង១ម៉ឺនរៀល។ លោកថា រឿងនេះកើតឡើងជាច្រើនឆ្នាំមកហើយ តែពុំមានដំណោះស្រាយនោះទេ។ ករណីនេះ បើរកឃើញកំហុស គឺរដ្ឋាភិបាលបញ្ឈប់មន្ត្រីទាំងនោះចេញពីតួនាទី ដាក់អ្នកថ្មីជំនួស។
លោកមានប្រសាសន៍ថា៖ «គ្រាន់តែដាក់ឈ្មោះបំរើរាស្ត្រ ប៉ុន្តែ យកឈ្មោះខ្លួនឯង ទៅបំរើរាស្ត្រ ទៅប្រមូលលុយ [ក្រៅច្បាប់] ទៀត ដកគាត់ចេញមក ទុកគេដែលស្អាតស្អំ ទុកគេដែលគេមានឆន្ទៈពិតសម្រាប់ធ្វើទៅ »។
ចំណាត់ការរបស់អគ្គនាយកដ្ឋានអន្តោប្រវេសន៍ ធ្វើឡើងបន្ទាប់ពីបណ្ដាញសារព័ត៌មាន និង បណ្ដាញទំនាក់ទំនងសង្គម បានលើកឡើងអំពីបញ្ហាមិនប្រក្រតីរបស់មន្រ្តីនគរបាលនៅច្រកទ្វារអន្តរជាតិប៉ោយប៉ែត និងមន្ត្រីមួយចំនួនទៀត ទាមទារប្រាក់ក្រៅផ្លូវការពីអ្នកទេសចរ និងអ្នករកស៊ី ជាថ្នូរនឹងការបំពេញឯកសារលើលិខិតឆ្លងដែនចេញចូលប្រទេសថៃ៕