ស្នងការនគរបាលរាជធានីភ្នំពេញ លោក ស ថេត បានជំរុញដល់អាជ្ញាធរមូលដ្ឋានយកអត្តសញ្ញាណប័ណ្ណនិងសៀវភៅស្នាក់នៅ ដែលបានធ្វើរួចហើយប្រគល់ឲ្យប្រជាពលរដ្ឋឲ្យដល់លំនៅដ្ឋានតែម្ដង។
លោក ស ថេត លើកឡើងបែបនេះក្នុងកម្មវិធី ប្រកាសផ្ទេរភារកិច្ច តែងតាំងមុខដំណែងនិងបំពាក់ឋានន្តរសក្តិជូនមន្រ្តីនគរបាលជាតិនាថ្ងៃនេះ។
លោកមានប្រសាសន៍ថា៖ «ការទទួលបាននៃការបោះពុម្ពអត្តសញ្ញាណប័ណ្ណ ឬសៀវភៅគ្រួសារដែលបានមកហើយ គឺថាសូមអោយចែកទៅតាមខណ្ឌ ខណ្ឌចែកទៅតាមប៉ុស្តិ៍យើងយកទៅជូនដល់ផ្ទះតែម្ដង»។
របាយការណ៍របស់ក្រសួងមហាផ្ទៃ ចេញផ្សាយកាលថ្មីៗនេះ ឲ្យដឹងថា បច្ចុប្បន្នសៀវភៅស្នាក់នៅបានផ្ដល់ជូនប្រជាពលរដ្ឋ ៣ ១៣៧ ២៣៤ ក្បាល សៀវភៅគ្រូសារផ្ដល់ជូនប្រជាពលរដ្ឋចំនួន ២ ៩៣៥ ១៤១ ក្បាល និងអត្តសញ្ញាណប័ណ្ណបានចំនួន ១០ ០៨១ ៤៧២សន្លឹក។
