លោកនាយករដ្ឋមន្ត្រី ហ៊ុន សែន អំពាវនាវកុំឲ្យពលរដ្ឋ មន្ត្រីរាជការ និងកងម្លាំងប្រដាប់អាវុធ ចាប់អារម្មណ៍ទៅ លើការអត្ថាធិប្បាយជុំវិញផលប៉ះពាល់បើកម្ពុជាបាត់បង់ប្រព័ន្ធអនុគ្រោះពន្ធ EBA។
ក្នុងពិធីបិទសន្និបាតនៅក្រសួងមហាផ្ទៃ កាលពីថ្ងៃព្រហស្បតិ៍ម្សិលមិញ លោក ហ៊ុន សែន ថ្លែងថា ក្រោយពីសហភាពអឺរ៉ុបដំណើរការព្យួរ EBA ពីកម្ពុជា មានអ្នកអត្ថាធិប្បាយមួយចំនួនលើកឡើងថា វិធានការនេះនឹងធ្វើឲ្យកម្ពុជារងផលប៉ះពាល់ធ្ងន់ធ្ងរ ដល់កម្មករ និងពលរដ្ឋ មន្ត្រីរាជការមួយចំនួនទៀតជាដើម។
លោក ហ៊ុន សែន ថ្លែងទៀតថា EBA មុននឹងក្រោយគង់តែនឹងបាត់។ លោកថា ដូចនេះ រដ្ឋាភិបាលនឹងរិះរកគ្រប់វិធី ដើម្បីឲ្យសេដ្ឋកិច្ចកម្ពុជាកាត់តែមានភាពប្រកួតប្រជែងខ្លាំង មិនឲ្យកម្ពុជាស្លាប់ដោយសារអត់ EBA នេះទេ។
លោកថា៖ «ជនរួមជាតិ ជាពិសេសកម្មករ កម្មការនី បើនៅតែមានមុខរបរមានការងារធ្វើ មានប្រាក់ចំណូល សុំកុំខ្វល់ពីនរណានិយាយពីអ្វី។ មន្ត្រីរាជការ កងកម្លាំងប្រដាប់អាវុធ និងនិវត្តន៍ជន បើនៅតែទទួលបានបៀវត្សពីរសប្តាហ៍ម្តង សុំកុំខ្វល់ពីនរណានិយាយពីអ្វី គឺត្រូវបន្តតាមពាក្យ ឆ្កែចេះតែព្រុះមនុស្សចេះតែដើរ»។
សហភាពអឺរ៉ុបកាលពីថ្ងទី១២ ខែកុម្ភៈនេះ បានផ្ដើមដំណើរការនីតិវិធីឈានទៅដកប្រព័ន្ធអនុគ្រោះពន្ធ EBA ពីកម្ពុជា ដោយអះអាងថា វិធានការនេះ កើតឡើងក្រោយពីខ្លួនមើលឃើញថា រដ្ឋាភិបាលកម្ពុជា ដែលដឹកនាំដោយលោក ហ៊ុន សែន មិនបានស្តារប្រជាធិបតេយ្យឡើងវិញ ខណៈអតីតបក្សប្រឆាំងនៅតែត្រូវបានគេផាត់ចេញពីឆាកនយោបាយ លោក កឹម សុខា នៅតែបន្តឃុំខ្លួនជិត ១៨ខែមកនេះ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា ពន្យល់ថា ការសម្រេចិត្តផ្នែកនយោបាយបានផ្សារភ្ជាប់ទៅនឹងកត្តាសេដ្ឋកិច្ចរបស់ពលរដ្ឋ និងសង្គមទាំងមូល។
លោក មឿន តុលា មានប្រសាសន៍ថា ការបាត់បង់ EBA នឹងធ្វើឲ្យកម្មកររាប់ម៉ឺននាក់ ប្រឈមនឹងបាត់បង់ការងារ អ្នកវិនិយោគមួយចំនួនអាចដកខ្លួនចេញពីកម្ពុជា ព្រោះសង្វាក់ផលិតកម្មរបស់ពួកគេត្រូវបង់ថ្លៃច្រើនជាងមុន។ លោកថា ផលប៉ះពាល់នឹងធ្លាក់ទៅលើមន្ត្រីរាជការ ប៉ូលីសទាហានផងដែរ ព្រោះអ្នកទាំងនោះ មានកូន ឬប្រពន្ធ របស់ពួកគេខ្លះជាអ្នករកចំណូលបានពីវិស័យកាត់ដេរនេះ។
លោក មឿន តុលា បង្ហាញការខកចិត្តថា ចរន្តនយោបាយបែបនេះ ហាក់ដើរផ្ទុយពីប្រទេសជិតខាង ដែលថា គេកំពុងប្រកួតគ្នាដណ្តើមទីផ្សារអឺរ៉ុប ទោះបីប្រទេសគេរីកចម្រើនជាងកម្ពុជា ហើយអឺរ៉ុប មិនបានផ្តល់ប្រព័ន្ធអនុគ្រោះឲ្យក៏ដោយ។
លោកថា៖ «យើងមើលជុំវិញយើង ថៃនាំទំនិញទៅសហភាពអឺរ៉ុប គ្រាន់តែអឺរ៉ុបចេញកាតលឿង រឿងម្ហូបអាហារ គ្រឿងសមុទ្រថៃ ចាប់ផ្តើមកែភ្លាម គេខ្លាចបាត់បង់ណាស់។ចំណែក វៀតណាម គេព្យាយាមចង់បានទីផ្សារអឺរ៉ុបមែនទែន ហើយយើងបានហើយ រហូតគេមិនឲ្យបង់ពន្ធទៀត យើងមិនចេះថែរក្សា អាហ្នឹងយើងគួរខ្មាស់គេដែរណាស់»។
អ្នកវិភាគនយោបាយ លោក បណ្ឌិត ឡៅ ម៉ុងហៃ ថា សារនយោបាយបែបនេះរបស់លោក ហ៊ុន សែន បង្ហាញថា រដ្ឋាភិបាលហាក់មិនបានត្រៀមខ្លួនការពារប្រព័ន្ធអនុគ្រោះពន្ធរបស់សហភាពអឺរ៉ុបនេះទេ ។
ប៉ុន្តែ អ្នកវិភាគរូបនេះ រំឭកថា បើការសម្រេចចិត្តផ្នែកនយោបាយណាមួយធ្វើឲ្យប៉ះពាល់ដល់ប្រយោជន៍ពលរដ្ឋនិងសង្គមនោះ លោកថា រដ្ឋាភិបាលកំពុងដើរផ្ទុយពីស្មារតីរដ្ឋធម្មនុញ្ញ។
លោកថា៖ «ប្រសិនបើ [សម្រេចហ្នឹង] វាប៉ះពាល់ដល់ការរស់នៅនិងសុខមាលភាពរបស់ប្រជាពលរដ្ឋ អាហ្នឹងមានការខ្វះខាតបំពេញករណីកិច្ចក្នុងនាមជាអ្នកដឹកនាំ ព្រោះក្នុងរដ្ឋធម្មនុញ្ញបានចែងថា រដ្ឋយកចិត្តទុកដាក់ ជាអាទិភាពដល់ជីវភាពរស់នៅ និងសុខមាលភាពរបស់ពលរដ្ឋ»។
សមាគមរោងចក្រកាត់ដេរនៅកម្ពុជា GMAC កាលពីថ្ងៃចន្ទ បានចេញសេចក្ដីថ្លែងការណ៍បង្ហាញការព្រួយបារម្ភថា បើកម្ពុជាបាត់បង់ EBA ធ្វើឲ្យវិស័យឧស្សាហកម្មកាត់ដេរ មានហានិភ័យ សម្រាប់ការប្រកួតប្រជែងជាមួយ ប្រទេសក្នុងតំបន់ និងប៉ះពាល់ការងារកម្មករមិនតិចជាង៧០ម៉ឺននាក់ ក្នុងនោះ៨០ភាគរយជាស្ត្រី៕
