ប្រធានរាជបណ្ឌិត្យសភាកម្ពុជា លើកឡើងថា បើសិនជាលោកនាយករដ្ឋមន្ត្រី ហ៊ុន សែន ស្តាប់អឺរ៉ុបដោះលែងលោក កឹម សុខា ដើម្បីរក្សា EBA មែននោះ លោកថា ជាការក្បត់អធិបតេយ្យភាព ព្រោះមិនអនុវត្តតាមរដ្ឋធម្មនុញ្ញនិងច្បាប់របស់ប្រទេស។
នៅក្នុងវេទិកាមួយនៅរាជបណ្ឌិតសភាកាលពីម្សិលមិញ លោក សុខ ទូច លើកឡើងថា ការកាត់ទោសលោក កឹម សុខា និងវិធានការលើបក្សប្រឆាំង គឺផ្អែកលើច្បាប់ និងមានភស្តុតាងត្រឹមត្រូវ។ លោកបន្តថា បើលោក ហ៊ុន សែន ស្តាប់តាមអឺរ៉ុបដោះលែងលោក កឹម សុខា នោះជាការក្បត់អធិបតេយ្យភាព។
លោក សុខ ទូច៖ «បើ ហ៊ុន សែន ស្តាប់អឺរ៉ុប មានន័យថា អាហ្នឹងហើយក្បត់អធិបតេយ្យភាពរបស់ខ្លួន។ អាហ្នឹងក្បត់អធិបតេយ្យភាពរបស់ខ្លួន រកអធិបតេយ្យភាពអីទៀត? ច្បាប់មាន មិនអនុវត្ត ព្រោះសម្តេចនាយករដ្ឋមន្ត្រីជាអង្គនីតិប្រតិបត្តិ មិនមែនអង្គនីតិតុលាការទេ ហើយសម្តេចនាយករដ្ឋមន្ត្រីក៏មានសភា។ គេថា សភាឯកបក្ស តើអ្នកណាឲ្យឯកបក្ស? យួន? ឡាវ? អត់ទេ គឺប្រជាជនកម្ពុជា ដែលបោះឆ្នោតឲ្យ ៨៣,២ ភាគរយ។»
ក្នុងឱកាសនោះ លោកបានលើកឡើងពីចំណុចខ្វះចន្លោះមួយចំនួនដែលរដ្ឋាភិបាលត្រូវចាត់វិធានការធ្វើកំណែទម្រង់រួមទាំងអំពើពុករលួយផង ដើម្បីលើកទឹកឲ្យមានការវិនិយោគនៅកម្ពុជា ទោះជាមិនមាន EBA។
លោក សុខ ទូច បញ្ជាក់ថា នេះជាឱកាសល្អរបស់រដ្ឋាភិបាលក្នុងការប្រឹងប្រែងធ្វើកំណែទម្រង់ ហើយឈានទៅទទួលបានជ័យជម្នះលើការបោះឆ្នោតនៅអាណត្តិក្រោយទៀត។
លោក សុខ ទូច៖ «ចឹងនេះជាឱកាសយើងត្រូវតែធ្វើ សម្តេចត្រូវតែធ្វើរដ្ឋាភិបាល ត្រូវតែធ្វើ ដើម្បីយើងប្រកួតប្រជែងស្មើមុខស្មើមាត់ជាមួយដៃគូ។ នេះជាឱកាស មិនមែនជាឱកាសរបស់គណបក្សប្រឆាំងទេ ឯកឧត្តម សម រង្ស៊ី អើយ! ច្រឡំហើយ! ធ្វើឲ្យរដ្ឋាភិបាល ហ៊ុន សែន កាន់តែពង្រឹងសមត្ថភាពកាន់តែពង្រឹងមន្ត្រីរបស់ខ្លួន ដើម្បីយកជោគជ័យនៅឆ្នាំ២០២៣។ បើអា EBA អត់គំហ៊កចឹង ប្រហែលជាដេកលក់។»
កាលពីថ្ងៃទី១១ ខែកុម្ភៈ សហភាអឺរ៉ុបបានចាប់ផ្តើមនីតិវិធីដែលត្រូវការរយៈពេល១៨ខែ ដើម្បីដកប្រព័ន្ធអនុគ្រោះពន្ធពីកម្ពុជា។
