កម្ពុជាទាមទារឲ្យសហរដ្ឋអាមេរិកគោរពអធិតេយ្យភាពរបស់ខ្លួន បន្ទាប់ពីស្ថានទូតអាមេរិកប្រចាំនៅកម្ពុជាបានលើកឡើងជុំវិញការឃុំខ្លួនលោក កឹម សុខា ថា ធ្វើឡើងដោយគ្មានភស្ដុងតាងណាមួយ។
តាមរយៈគេហទំព័រហ្វេសប៊ុកផ្លូវការកាលពីថ្ងៃទី១៥ ខែកុម្ភៈ ស្ថានទូតអាមេរិកប្រចាំកម្ពុជាបានបង្ហោះរូបរបស់អតីតមេដឹកនាំបក្សប្រឆាំងលោក កឹម សុខា ដោយថា លោកគឺជាមនុស្សស្អាតស្អំ និងត្រូវបានអាជ្ញាធរចាប់ឃុំខ្លួនអស់រយៈពេលជាង ១ឆ្នាំ ទាំងគ្មានភស្ដុតាងណាមួយនោះឡើយ។
ប៉ុន្ដែ មួយថ្ងៃក្រោយការបង្ហោះលើគេហទំព័រហ្វេសប៊ុកបែបនេះ ក្រសួងការបរទេសកម្ពុជាបានចេញសេចក្ដីថ្លែងការណ៍សម្ដែងនូវការភ្ញាក់ផ្អើល និងខកចិត្ត ដោយចាត់ទុកសកម្មភាពនេះ ថា «មិនមានលក្ខណៈការទូត» និង «មិនគោរពអធិបតេយ្យរបស់កម្ពុជា»។
ក្នុងសេចក្ដីការណ៍ដដែលនេះ កម្ពុជាបានរំលឹកដល់ស្ថានទូតអាមេរិកប្រចាំកម្ពុជា ឲ្យគោរពនូវសន្ធិសញ្ញាទីក្រុងវីយ៉ែនឆ្នាំ១៩៦១ស្ដីពីទំនាក់ទំនងការទូត ដែលទាមទារឲ្យស្ថានទូតអាមេរិកគោរពនូវបទបញ្ញត្តិ និងគោលការណ៍មិនជ្រៀតជ្រែកកិច្ចការផ្ទៃរបស់កម្ពុជា។
បើគិតមកទល់ពេលបច្ចុប្បន្ននេះ ប្រធានគណបក្សសង្គ្រោះជាតិ លោក កឹម សុខា បានឃុំឃាំងអស់រយៈពេល ៥៣២ថ្ងៃមកហើយ ចាប់តាំងពីថ្ងៃដែលលោកត្រូវបានសមត្ថកិច្ចចាប់បញ្ជូនទៅដាក់ឃុំនៅពន្ធនាគារត្រពាំងផ្លុង ខេត្តត្បូងឃ្មុំ កាលពីដើមខែកញ្ញា ឆ្នាំ២០១៧ រួមទាំងការផ្ទេរមកជាប់ឃុំនៅក្នុងផ្ទះវិញ ក្រោមការចោទប្រកាន់ពីរដ្ឋាភិបាលថា «ក្បត់ជាតិ»៕
