លោកនាយករដ្ឋមន្ត្រី ហ៊ុន សែន បានបញ្ជាទៅក្រសួងការងារឲ្យសហការជាមួយភាគីរោងចក្រធ្វើការដោះស្រាយ ករណីបញ្ឈប់កម្មករក្នុងវិវាទការងារកន្លងមក។
ក្នុងពិធីជួបសំណះសំណាលជាមួយកម្មកររោងចក្រនៅស្រុកអង្គស្នួល ខេត្តកណ្តាល នាថ្ងៃនេះ លោក ហ៊ុន សែន ថ្លែងថា ការបញ្ឈប់កម្មករ ដោយសារ ជម្លោះការងារនោះ លោកថា មិនជាជម្រើសរើសល្អទេ។ លោកជំរុញទៅក្រសួងការងារ សហការជាមួយភាគីរោងចក្រធ្វើការដោះស្រាយ ដោយទទួលយកកម្មករដែលរោងចក្របញ្ឈប់នោះចូលធ្វើការងារវិញ។
លោកថ្លែងថា៖ «សូមឲ្យក្រសួងការងារនិងបណ្ដុះបណ្ដាលវិជ្ជាជីវៈ ធ្វើការកិច្ចការងារនេះ ជាមួយនឹងកម្មករ អាចជាមួយនឹងម្ចាស់រោងចក្រ សូមកុំអាលយកវិធានការប្រញាប់ប្រញាល់បញ្ឈប់កម្មករ ត្រូវខិតខំសម្របសម្រួលឲ្យពួកគេបានទទួលការងារធ្វើ។ នេះ វាមិនមែនជា កំហុសធ្ងន់ធ្ងរដែលជាប្រភេទនៃកំហុសព្រហ្មទណ្ឌនោះទេ។ បើសិនជាកំហុសព្រហ្មទណ្ឌតុលាការ គេនឹងចាត់វិធានការទៅលើបញ្ហានោះ ប៉ុន្តែ ក្នុងវិវាទការងារ មិនគួរឈានទៅដល់បណ្ដេញចេញនូវអ្នកធ្វើការ ប៉ុន្តែ វិធានការសន្ទនា និងអប់រំ គឺជាវិធានការចំបាច់»។
ការស្នើរបស់លោក ហ៊ុន សែន ធ្វើឡើងស្របពេលដែលកម្មករជាង១០០នាក់ដែលបម្រើការងារនៅរោងចក្រ W&D ស្ថិតក្នុងភូមិឬស្សី សង្កាត់ស្ទឹងមានជ័យ ត្រូវបានថៅកែបញ្ឈប់ពីការងារ បន្ទាប់ពីពួកគេបាននាំកម្មករតវ៉ា ដើម្បីទាមទារទៅថៅកែឲ្យបើកប្រាក់អតីតភាពការងារជូនពួកគេជាកញ្ចប់មុនឆ្នាំ២០១៩ ។
ប្រធានសហភាពការងារកម្ពុជាលោក អាត់ ធន់ មានប្រសាសន៍ថា ករណីថៅកែរោងចក្រឈប់កម្មករពីការងារកន្លងមកគឺកើតឡើងច្រើន ដោយមិនទាន់ទទួលបានដំណោះស្រាយនៅឡើយ។ លោកចាត់ទុកការបញ្ឈប់កម្មករពីការងារ គឺរឿងខុសច្បាប់ ដោយសារកម្មកដែលក្រុមហ៊ុនបញ្ឈប់នោះ ភាគច្រើនជាស្រ្តីមានផ្ទៃពោះ និងតំណាងសហជីព ឬអ្នកដឹកនាំកម្មករតវ៉ាជាដើម។
ទោះជាយ៉ាង ក្រោយពីលោកនាយករដ្ឋមន្ត្រី ហ៊ុន សែន នាព្រឹកមិញនេះ កម្មកររោងចក្រ W&D ម្នាក់ក្នុងចំណោមអ្នកដែលរោងចក្របញ្ឈប់ពីការងារនោះលោក ផាត់ សាមុត ប្រាប់វីអូឌីថា អាជ្ញាធរខណ្ឌមានជ័យ បានហៅពួកគាត់ ទៅធ្វើការដោះស្រាយនៅរសៀលនេះ ។
