លោកនាយករដ្ឋមន្ត្រី ហ៊ុន សែន លើកឡើងថា ចាប់ពីសប្តាហ៍ក្រោយទៅ ឧត្តមក្រុមប្រឹក្សាពិគ្រោះនិងផ្តល់យោបល់ អាចសួរដេញដោលអាជ្ញាធរខេត្ត រាល់បញ្ហាដែលបានរកឃើញ ដើម្បីចូលរួមអភិវឌ្ឍជាតិ។
ឧត្តមក្រុមប្រឹក្សាពិគ្រោះ និងផ្តល់យោបល់ កើតចេញពីគណបក្សចំនួន១៦ ដែលគ្មានសំឡេងក្នុងសភា សម្រាប់អាណត្តិទី៦នេះ។
លោក ហ៊ុន សែន ក្នុងពិធីជួបកម្មករ នៅខេត្តកណ្តាលនៅថ្ងៃពុធនេះ បានថ្លែងថា នៅថ្ងៃទី២៨សប្តាហ៍ក្រោយនេះ លោកនឹងជួបប្រជុំជាមួយឧត្តមក្រុមប្រឹក្សាពិគ្រោះ និងផ្តល់យោបល់ ដើម្បីស្តាប់ការលើកឡើងជុំវិញភាពអសកម្មរបស់អាជ្ញាធរខេត្តមួយចំនួនដែលពួកគេរកឃើញ ។
លោក ហ៊ុន សែន បញ្ជាក់ថា សេចក្តីរាយការណ៍នេះក៏នឹងត្រូវភ្ជាប់ទៅកាន់រាជធានីខេត្ត រួមទាំងស្ថាប័នពាក់ព័ន្ធមួយចំនួនទៀត តាមប្រព័ន្ធបច្ចេកវិទ្យានូវអ្វីដែលលោកថា ដើម្បីទប់ស្កាត់បញ្ហាមួយចំនួនដែលបានកើតឡើង។
លោកថា៖ «ខ្ញុំប្រាប់ឯកឧត្តម ប៊ិន ឈិន ឲ្យតភ្ជាប់វីដេអូខិនហ្វេរិន [Video Conference] ទៅបណ្តាខេត្ត និងកងទ័ព ដើម្បីឲ្យបណ្តាខេត្តបានស្តាប់នូវយោបល់នៃបណ្តាបក្សនយោបាយ ដែលបានចូលរួមជាមួយនឹងក្រុមប្រឹក្សាពិគ្រោះ និងផ្តល់យោបល់ នេះ លើបញ្ហាដែលគេបានរកឃើញនឹងជាវិធីសាស្ត្រនៃការដោះស្រាយ ហើយពេលខ្លះយើងអាចសួរទៅ កាន់ខេត្ត ឬកងទ័ពធ្វើ ដូចពេលយើងប្រជុំនៅគណៈរដ្ឋមន្ត្រីដូចគ្នា»។
ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល លោក សុខសុវណ្ណ វឌ្ឍនាសាប៊ុន អះអាងថា ក្នុងជំនួបជាមួយនាយករដ្ឋមន្ត្រី លោកនឹងលើកយកបញ្ហាយកសែស្រឡាយមកធ្វើការនៅអគ្គនាយកដ្ឋានសវនកម្មនៃក្រសួងមហាផ្ទៃ ការកាត់ដីរដ្ឋនៅខេត្តព្រះសីហនុឲ្យទៅឧកញ៉ាដោយខុសច្បាប់ ការបាញ់អ្នកតវ៉ាដីធ្លីឲ្យរងរបួស ភាពមិនប្រក្រតីនៃការអនុវត្តសាលដីកា ដោយប្រើប្រាស់កងទ័ព និងតម្លៃស្រូវថោកជាដើម។
លោក វឌ្ឍនាសាប៊ុន អះអាងថា ការលើកឡើងនេះ ក៏ជំរុញទៅរដ្ឋាភិបាល ឲ្យមានវិធានការផងដែរ ទើបអាចទប់ស្កាត់បទល្មើសបាន ។
លោកថា៖ «យើងត្រូវលើកឡើង ដើម្បីទាមទាររកដំណោះស្រាយ និងការដាក់វិធានការ ព្រោះថា ដោះស្រាយតែមួយមុខ ខ្ញុំថាវាមិនទាន់រៀងចាល យើងទាមទារឲ្យដាក់វិធានការ។»
សមាជិកមួយរូបទៀត និងជាប្រធានគណបក្សយុវជនកម្ពុជា លោក ពេជ្រ ស្រស់ មានប្រសាសន៍ប្រហាក់ប្រហែលដែរថា បញ្ហាដែលត្រូវលើកទៅប្រាប់នាយករដ្ឋមន្ត្រី ដើម្បីធ្វើកំណែទម្រង់នោះ គឺបញ្ហាដីធ្លី និងអំពើពុករលួយរបស់មន្ត្រីថ្នាក់ក្រោមជាតិមួយចំនួន ដែលលោកថា បានឃុបឃិតគ្នាជាប្រព័ន្ធការពារ ក្រុមហ៊ុនខិលខូចមួយចំនួន បង្កការឈឺចាប់ដល់ពលរដ្ឋក្រីក្រ។
លោកថា៖ «ទី១ ភាពអសកម្មរបស់មន្ត្រីថ្នាក់ក្រោមជាតិ ចំពោះការដោះស្រាយបញ្ហាជូនប្រជាពលរដ្ឋនៅក្នុងតំបន់។ ទី២ ការអនុវត្តសាលដីកាយកកម្លាំងកងទ័ព ទាហាន ដែលខុសពីផ្លូវច្បាប់ពីតួនាទីទៅបង្ក្រាបប្រជាពលរដ្ឋដែលមកតវ៉ាជម្លោះដីធ្លី។ ហើយទី៣ទៀត ពិនិត្យមើលពីអំពើពុករលួយជាប្រព័ន្ធ ដែលនាំគ្នាធ្វើស៊ីដីប្រជាពលរដ្ឋ និងត្រូវរ៉ូវជាមួយក្រុមហ៊ុន ហើយរំលោភដីរដ្ឋ»។
ប៉ុន្តែ អតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន មានប្រសាសន៍ថា អំណាចរបស់ក្រុមប្រឹក្សាពិគ្រោះ និងផ្តល់យោបល់ បក្សកាន់អំណាចជាអ្នកប្រគល់ឲ្យ លោកថា ដូចនេះការធ្វើកំណែទម្រង់ស្ថិតនៅលើដៃនាយករដ្ឋមន្ត្រី មិនស្ថិតលើការរកឃើញរបស់បណ្តុំគណបក្សនេះទេ។
លោកថា៖«មិនមែនអត់ប្រយោជន៍សុទ្ធ [សោះ] ទេ យ៉ាងហោចណាស់មានប្រយោជន៍មួយចំនួនបង្ហាញពីភាពអសកម្មក្នុងសង្គម។ ដូច្នេះ គង់នឹងមានប្រយោជន៍ខ្លះ គ្រាន់តែថា គ្មានប្រសិទ្ធិភាពដូចគណបក្សប្រឆាំងទេ»។
ទោះជាយ៉ាងណាមេដឹកនាំបក្សកាន់អំណាចបានចាត់ទុកថា ការប្រជុំរវាងឧត្តមក្រុមប្រឹក្សាពិគ្រោះនិងផ្តល់យោបល់ជាមួយនាយករដ្ឋមន្ត្រី ជាគុណតម្លៃមួយបង្ហាញថា ពួកគេបានចូលរួមកែលម្អ ដើម្បីជំរុញដល់ការអភិវឌ្ឍជាតិតាមបែបប្រជាធិបតយ្យ។