សមាជិកឧត្តមក្រុមប្រឹក្សាពិគ្រោះយោបល់ អះអាងថា តុលាការបានសម្រេចកាត់ក្ដីទាំងខុសច្បាប់ក្នុងសំណុំរឿងវិវាទដីធ្លីរវាងក្រុមប្រជាពលរដ្ឋ និងភរិយាឧកញ៉ាម្នាក់ នៅឯស្រុកព្រៃនប់ ខេត្តព្រះសីហនុ ដែលឈានទៅដល់ការបង្ក្រាបដោយហិង្សា។
ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ លោក សុខសុវណ្ណ វឌ្ឍនាសាប៊ុន អះអាងថា តាមរយៈការចុះស្រាវជ្រាវ ដីធ្លីដែលកំពុងមានជម្លោះរវាងពលរដ្ឋនៅភូមិគគីរ នៅឃុំបិតត្រាំង និងអ្នកស្រី ហុង សួន ភរិយារបស់ឧកញ៉ា ស៊ីវ គង់ទ្រីវ នោះ ត្រូវបានស្នើកាត់ចេញពីដីស្ថិតក្នុងដែនគម្របព្រៃឈើឆ្នាំ២០០២ ប៉ុន្តែ លោកថា ដីនោះពុំទាន់ត្រូវបានចុះបញ្ជីជាដីឯកជននៅឡើយទេ។
មេបក្សនយោបាយរូបនេះ បានចោទតុលាការទាំងបីថ្នាក់ ដែលបានសម្រេចឲ្យភរិយាលោក ស៊ីវ គង់ទ្រីវ ឈ្នះក្ដីនោះថា មានភាពមិនប្រក្រតី និងមិនបានផ្អែកលើបទដ្ឋានច្បាប់ផ្សេងៗ ដែលពាក់ព័ន្ធនោះឡើយ។
លោក សុខសុវណ្ណ វឌ្ឍនាសាប៊ុន បន្ដថា៖ «ហើយហេតុអីបានយើងនិយាយថា ខុសច្បាប់ ព្រោះមានលិខិតមួយរបស់ក្រសួងកសិកម្មបានបញ្ជូនទៅតុលាការ ឲ្យតុលាការកុំកាត់ក្ដីហ្នឹងទៀត អាហ្នឹងដីរបស់រដ្ឋទេ មិនមែនសមត្ថកិច្ចរដ្ឋទេ អ្នកដែលប្ដឹងហ្នឹង។ […] តុលាការទេ ដែលផ្ទុយតាំងពីដើមមក ព្រោះដីហ្នឹងជាដីរបស់រដ្ឋ រដ្ឋមិនទាន់បានឆ្វៀលទេ មានតែពាក្យសុំឆ្វៀលចេញរបស់ពលរដ្ឋ ដែលដាក់ពាក្យសុំឆ្វៀលទៅក្រសួងកសិកម្ម»។
ប្រធានគណបក្សខ្មែរក្រោករូបនេះ ប្រាប់ VOD ទៀតថា លោកក៏បានដាក់របាយការណ៍មួយទៅលោកនាយករដ្ឋមន្ដ្រី ហ៊ុន សែន ផងដែរ ដើម្បីឲ្យជួយអន្ដរាគមន៍ និងដាក់ទោសអ្នកជាប់ពាក់ព័ន្ធនៅក្នុងរឿងនេះ។
ពលរដ្ឋ ៣នាក់ បានរងរបួស ក្នុងនោះបុរសម្នាក់បានរងរបួសធ្ងន់ធ្ងរ បន្ទាប់ពីរងគ្រាប់កាំភ្លើងដែលបាញ់ចំឆ្អឹងខ្នង ហើយពលរដ្ឋ ៤នាក់ទៀត ត្រូវបានសមត្ថកិច្ចចាប់ខ្លួន នៅក្នុងការបង្ក្រាបដ៏ហិង្សានៅលើអ្នកភូមិប្រហែល ៣០០នាក់ ដែលជំទាស់នឹងសមត្ថកិច្ចចម្រុះដែលបានចុះទៅអនុវត្តសាលដីការរបស់តុលាការកំពូល កាលពីថ្ងៃទី២៤ ខែមករាកន្លងមក។
បន្ទាប់ពីការបង្ក្រាបដ៏ហិង្សានេះ រដ្ឋមន្ដ្រីក្រសួងកសិកម្ម លោក វេង សាខុន បានសម្រេចលុបចោលលិខិតរបស់លោកកាលពីថ្ងៃទី៣១ ខែមករា ដែលបានអនុញ្ញាតឲ្យមានការកាត់ឆ្វៀលដីទាំង ១៩កន្លែង ចេញពីដែនគម្រប់ព្រៃឈើឆ្នាំ២០០២។
អ្នកនាំពាក្យក្រសួងកសិកម្ម លោក ស្រី វុឌ្ឍី ប្រាប់ VODថា លោកមិនអាចឆ្លើយបានទេពាក់ព័ន្ធនឹងមូលហេតុនៃការលុបចោលលិខិតរបស់ក្រសួងកសិកម្ម និងបកស្រាយពីភាពចម្រូងចម្រាស់ជុំវិញការសម្រេចរបស់តុលាការខេត្ដព្រះសីហនុ និងក្រសួងនោះទេ។
លោកបន្ដថា៖ «អាហ្នឹងរឿងបច្ចេកទេសរបស់រដ្ឋបាលព្រៃឈើចាំសួរទៅខាងនោះទៅចុះ។ បច្ចេករបស់ខាងនោះ ខ្ញុំក្ដាប់អត់បានទេ ចាំសួរទៅខាងនោះទៅ […] ដូចខ្ញុំជម្រាប ចាំសួរទៅខាងព្រៃឈើ»។
ព្រះរាជអាជ្ញារងតុលាការខេត្ដព្រះសីហុន លោក លឹម ប៊ុនហេង ប្រាប់ថា លោកមិនអាចឆ្លើយបាននោះទេ ដោយថា សំណុំរឿងនេះស្ថិតនៅខាងផ្នែកលេខាធិការដ្ឋានរដ្ឋបាលរបស់តុលាការខេត្តនេះ។
លោកបន្ដថា៖ «ខ្ញុំអត់មានព័ត៌មានហ្នឹងទេ ព្រោះអាហ្នឹងនៅផ្នែកខាងចៅក្រម ពាក់ព័ន្ធនឹងការកាត់សេចក្ដី ព្រោះខ្ញុំនាំពាក្យខាងផ្នែកអយ្យការ ពាក់ព័ន្ធសំណុំរឿងព្រហ្មទណ្ឌ»។
វីអូឌីបានទាក់ទងប្រធានលេខាធិការដ្ឋានរដ្ឋបាល នៃតុលាការខេត្ដព្រះសីហនុ លោក យឹម ប៊ុណ្ណារ៉េត ប៉ុន្ដែ លោកថា មិនទាន់អាចឆ្លើយបានទេនៅពេលនេះ។
លោកបន្ដថា៖ «អត់លឺច្បាស់ផង ខ្ញុំមកទល់ដែននេះហើយ ខ្ញុំស្ដាប់អត់ច្បាស់ ខ្ញុំមកទល់ដែនវៀតណាមហើយ»។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានឲ្យដឹងថា ក្រសួងនឹងត្រួតពិនិត្យលើករណីនេះ ប្រសិនបើមានពាក្យបណ្ដឹង។
លោក ជិន ម៉ាលីន ប្រាប់ថា៖ «មិនមានផែកការចុះស្រាវជ្រាវអីទេ លុះណាតែមានពាក្យបណ្ដឹងពីភាពមិនប្រក្រតីរបស់តុលាការ។ បើគេឃើញការសម្រេចក្ដីហ្នឹងពាក់ព័ន្ធនឹងភាពមិនប្រក្រតីរបស់ចៅក្រម ព្រះរាជអាជ្ញា ឬមន្ដ្រីតុលាការយើងមួយចំនួន។ ប៉ុន្ដែ យន្ដការដោះស្រាយវិវាទដីធ្លីហ្នឹង គឺគេមានសមត្ថកិច្ចរបស់គេជាអ្នកខុសត្រូវ»។
ជម្លោះដីធ្លីនៅឃុំបិតត្រាំងនេះ ក៏ធ្វើឲ្យមានអន្ដរាគមន៍ និងប្រតិកម្មពីថ្នាក់ដឹកនាំរដ្ឋាភិបាលផងដែរ ជុំវិញការប្រើប្រាស់កម្លាំងយោធាបង្ក្រាបយ៉ាងហិង្សាទៅលើការតវ៉ារបស់ប្រជាពលរដ្ឋ៕