រដ្ឋាភិបាល បានសម្រេចកាត់ដីបឹងជើងឯកទំហំជិត២ហិកតាឲ្យអាជ្ញាធររាជធានីភ្នំពេញសម្រាប់ធ្វើអាងចម្រោះទឹកស្អុយ។
ក្នុងអនុក្រឹត្យស្តីពីការកែសម្រួលផ្ទៃបឹងជើងឯក ចុះថ្ងៃទី១៣ ខែធ្នូ ឆ្នាំ២០១៨ ដែល វី.អូ.ឌី ទើបទទួលបានថ្ងៃនេះ រដ្ឋាភិបាល សម្រេចកាត់ដីទំហំ១៩ ៧៣៦ ម៉ែត្រក្រឡានៅបឹងជើងឯក ស្ថិតក្នុងខណ្ឌមានជ័យ និងខណ្ឌដង្កោជូនទៅសាលារាជធានីភ្នំពេញ ដើម្បីសាងសង់ស្ថានីយ៍ប្រព្រឹត្តកម្មទឹកកង្វក់។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី សុំមិនបញ្ជាក់បន្ថើមលើសពីនេះទេ ដោយលោកថា រង់ចាំការស្រាវជ្រាវ និងពិនិត្យលើឯកសារសិន។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា វាការល្អប្រសិនបើរដ្ឋាភិបាលយកដីនោះទៅអភិវឌ្ឍដើម្បីបម្រើផលប្រយោជន៍ប្រជាជន។ ប៉ុន្តែ លោកស្នើទៅរដ្ឋាភិបាល ត្រូវបង្ហាញពីតម្លាភាពនៃការប្រើប្រាស់ដីនោះ។
លោក សន ជ័យ បន្តថា កន្លងមកគម្រោងដែលបានស្នើសុំដោយរដ្ឋាភិបាល ដើម្បីធ្វើការអភិវឌ្ឍផ្សេងៗនោះ ត្រូវបានលាក់លៀមព័ត៌មាន និងដីនៅតំបន់បឹងមួយចំនួនក្នុងរាជធានីភ្នំពេញ ក៏ត្រូវបានទន្រ្ទានយកដោយអ្នកមានលុយ មានអំណាចរួចទៅហើយ។
លោកបន្ថែមថា៖ «ឲ្យតែការអភិវឌ្ឍមួយជាផលប្រយោជន៍សាធារណៈដែលជាតម្រូវការមហាជន ខ្ញុំយល់ថា វាជារឿងល្អ ប៉ុន្តែធ្វើយ៉ាងម៉េចកុំឲ្យផែនការនេះ វាក្លាយទៅជាកម្មវត្ថុមួយដែលកើតមាននូវជម្លោះ ដែលទាក់ទងដីនៅតាមមាត់បឹង។ ព្រោះកន្លងមក យើងឃើញមានរឿងអាស្រូវជាច្រើនទាក់ទងនឹងការគ្រប់គ្រងអាងស្តុកទឹក ឬបឹងស្តុកទឹកក្នុងរាជធានីភ្នំពេញនេះ ដោយសារព័ត៌មានមួយចំនួននៃគម្រោងស្នើដោយរដ្ឋាភិបាលហ្នឹង មិនមានតម្លាភាពប៉ុន្មានទេ ដោយសារតែរដ្ឋាបាលថ្នាក់ក្រោមជាតិខ្លះបំពេញ ការងារដោយលាក់លៀម»។
ផ្នែកខ្លះនៃបឹងធំៗចំនួន ៤ មានបឹងពោងពាយ បឹងកក់ បឹងទំពុន និងបឹងជើងឯក ដែលនៅក្នុង និងជាយរាជធានីភ្នំពេញ ត្រូវបានរដ្ឋាភិបាលវិនិយោគឲ្យក្រុមហ៊ុនមួយចំនួនធ្វើការអភិវឌ្ឍសម្រាប់ធ្វើជាតំបន់ពាណិជ្ជកម្មនិងទីក្រុងរណបជាដើម។
កាលពីថ្ងៃទី១៤ ខែកញ្ញា ឆ្នាំ២០១៨ រដ្ឋាភិបាលបានធ្វើអនុប្រយោគដោយកាត់ដីអាងស្តុកទឹកបឹងទំពុនទំហំ៣៥ហិកតាបន្ថែមទៀត ដើម្បីផ្តល់សិទ្ធិឲ្យក្រុមហ៊ុនឯកជនមួយធ្វើការអភិវឌ្ឍ។
កាលថ្ងៃទី២ ខែសីហា ឆ្នាំ២០១៨ លោកនាយករដ្ឋមន្ត្រី ហ៊ុន សែន ក៏បានឯកភាពទៅតាមសំណើរបស់សាលារាជធានីភ្នំពេញផងដែរ ដែលបានស្នើកាត់ដីបឹងតាមោក ២០ហិកតា សម្រាប់សាងសង់ផ្សារបន្លែ និងចំណតរថយន្ត៕