រដ្ឋមន្រ្តីក្រសួងព័ត៌មាន អះអាងថា នឹងយកសេចក្តីព្រាងច្បាប់ស្តីពីសិទ្ធិទទួលបានព័ត៌មានទៅប្រជុំជាមួយអន្តរក្រសួងនៅដើមខែក្រោយនេះ។
ក្នុងមហាសន្និបាតបូកសរុបសមិទ្ធផលវិស័យព័ត៌មាន និងសោតទស្សន៍ និងទិសដៅការងារសម្រាប់អនុវត្តឆ្នាំ២០១៩ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានថ្លែងប្រាប់អ្នកសារព័ត៌មានថា ក្រសួងព័ត៌មានបានធ្វើសេចក្តីព្រាងច្បាប់ស្តីពី សិទ្ធិទទួលបានព័ត៌មានចប់សព្វគ្រប់កាលពីឆ្នាំ២០១៨។ លោកបន្តថា សេចក្តីព្រាងច្បាប់នេះ ក្រសួងនឹងពិនិត្យជាមួយអន្តរក្រសួងបន្ថែមទៀត នៅថ្ងៃទី៧ ខែមីនា ឆ្នាំ២០១៩ ។
លោក មានប្រសាសន៍ថា៖ «ជំហានទីពីរ គឺការប្រជុំអន្តរក្រសួង ឥឡូវយើងចាប់ផ្តើមប្រជុំនៅថ្ងៃទី៧ ខែ៣ គឺចាប់ផ្តើមប្រជុំជំហ៊ានទី២ គឺយើងឈរលើគោលការណ៍មួយ គឺរដ្ឋបើកឲ្យទូលាយធំបំផុត បិទឲ្យតិចបំផុត»។
នាយកប្រតិបត្តិ វិទ្យាស្ថានតស៊ូមតិ និងគោលនយោបាយ លោក ឡំា សុជាតិ មានប្រសាសន៍ថា លោកស្វាគមន៍ដែលចំពោះដំណើរការដែលឈានដល់ការប្រជុំអន្តរក្រសួងជុំវិញច្បាប់នេះ។ លោកបង្ហាញក្តីសង្ឃឹមថា អន្តរក្រសួងនឹងរក្សាខ្លឹមសារក្នុងសេចក្តីព្រាងច្បាប់នោះ ដើម្បីឲ្យច្បាប់ស្តីពី សិទ្ធិទទួលបានព័ត៌មាន មានភាពល្អប្រសើរជាងមុន។
លោក មានប្រសាសន៍ថា៖ «សេចក្តីព្រាងដែលដាក់ទៅក្នុងគណៈរដ្ឋមន្ត្រីសព្វថ្ងៃ យើងសង្ឃឹមថា គាត់បញ្ជូនបន្តអនុម័តឲ្យឆាប់ ជាជាងកែលំអ ថយគុណភាពជាងមុន យើងព្រួយបារម្ភ មិនបន្ថែម ថយវិញ អាចជាការព្រួយបារម្ភ ព្រោះសេចក្តីព្រាងហ្នឹង យើងបានចូលរួម៣ឆ្នាំកន្លងមក។ យើងដឹងថា មតិយោបល់សង្គមស៊ីវិល អង្គការសហប្រជាជាតិជាច្រើនបានទទួលយក ដោយដាក់ចូលក្នុងច្បាប់ហ្នឹងរួចហើយ»។
កាលពីថ្ងៃទី០៨ ខែកុម្ភៈ ឆ្នាំ២០១៩ អង្គការ និងសមាគមចំនួន១៩ បានផ្ញើលិខិត៤ ដាច់ដោយឡែកពីគ្នាទៅស្ថាប័នកំពូលរបស់រដ្ឋ និងរដ្ឋាភិបាល ដើម្បីឲ្យស្ថាប័នទាំងនោះជំរុញដំណើរការតាក់តែងច្បាប់ និងអនុម័តច្បាប់ស្តីពីសិទ្ធិទទួលបានព័ត៌មាន ដោយថា ដើម្បីលើកកម្ពស់អភិបាលកិច្ចល្អ និងសិទ្ធិទទួលបានព័ត៌មាន។
ក្នុងជំនួបលើកទី៣របស់លោកនាយករដ្ឋមន្ត្រី ហ៊ុន សែន ជាមួយអ្នកសារព័ត៌មាន កាលពីថ្ងៃទី១១ ខែមករា ឆ្នាំ២០១៩ លោកនាយករដ្ឋមន្ត្រីបានប្រកាសគាំទ្រ និងធានាឲ្យមានច្បាប់ស្តីពីសិទ្ធិទទួលបានព័ត៌មានក្នុងនីតិកាលពី៦នេះផងដែរ៕