នាយកប្រតិបត្តិអង្គការតម្លាភាពកម្ពុជាលើកឡើងថា អំពើពុករលួយដែលកំពុងកើតមាននៅ កម្ពុជាមានលក្ខណៈធំធេងដែលមិនអាចគណនាជាលុយបាន។
ថ្លែងនៅក្នុងវេទិកាវិទ្យុអាស៊ីសេរីកាលពីម្សិលមិញ លោក ព្រាប កុល លើកឡើងថា កម្ពុជារងគ្រោះធំធេងនិងរយៈពេលយូរមកហើយដោយសារតែអំពើពុករលួយ។
លោក ព្រាប កុល៖ «ការខាតបង់របស់កម្ពុជាដោយសារតែអំពើពុករលួយមានទំហំធំធេងណាស់ ធំធេងរហូតយើងមិនអាចគណនាចេញជាចំនួនទឹកលុយបាន។ បើយើងគិតតែលុយក៏មិនត្រូវព្រោះពុករលួយប៉ះពាល់ដល់អ្វីផ្សេងៗច្រើនជាងលុយទៅទៀត។ ឧទាហរណ៍អំពើអយុត្តិធម៌នៅក្នុងសង្គមក៏កើតឡើងដោយសារអំពើពុករលួយ ការបាត់បង់ធនធានធម្មជាតិ ការបាត់បង់ព្រៃឈើក៏វាអាចកើតឡើងដោយសារតែអំពើពុករលួយ ការបាត់បង់លុយជាតិ ការកើតមានអំពើឧក្រិដ្ឋកម្ម ការជួញដូរគ្រឿងញៀន និងបញ្ហាលាងលុយកខ្វក់ជាជាដើមនេះ ដូច្នេះវាមានលក្ខណៈធំធេងណាស់។»
លោកព្រាប កុល ប្រៀបធៀបអំពើពុករលួយនៅកម្ពុជាដូចជំងឺមហារីក ហើយកំពុងតែប្រើប្រាស់វិធីសាស្ត្រស្រាលៗដើម្បីព្យាបាលដែលពិបាកទទួលបានផល។
របាយការណ៍អង្គការតម្លាភាពអន្តរជាតិបង្ហាញថា នៅឆ្នាំ២០១៨កម្ពុជាជាប់ចំណាត់ថ្នាក់លេខ១៦១ ក្នុងចំណោមប្រទេស១៨០។ ចំណាត់ថ្នាក់នេះដូចឆ្នាំ២០១៧ ប៉ុន្តែកម្ពុជាធ្លាក់មួយពិន្ទុគឺពី២១មកត្រឹម២០ពិន្ទុ។
