បេក្ខជនម្នាក់របស់ម្ពុជាទទួលបានចំណាត់ថ្នាក់រងជាច្រើនក្នុងកម្មវិធីប្រកួត Mister & Miss Asian International 2019 ដែលជាការប្រកួតសម្រស់ និងសមត្ថភាពកម្រិតអន្តរជាតិនៅក្នុងទីក្រុងបាងកក ប្រទេសថៃក្នុងវគ្គផ្ដាច់ព្រ័ត្រ កាលពីយប់ថ្ងៃទី២៤ ខែកុម្ភៈ ឆ្នាំ២០១៩នេះ។
ពិតជាមានមោទនភាពយ៉ាងខ្លាំង ដែលការប្រកួត Mister & Miss Asian International 2019 ដែលជាការប្រកួតសម្រស់ និងសមត្ថភាពកម្រិតអន្តរជាតិនៅក្នុងទីក្រុងបាងកក ប្រទេសថៃក្នុងវគ្គផ្ដាច់ព្រ័ត្រ កាលពីយប់ថ្ងៃទី២៤ ខែកុម្ភៈ បានប្រកាសថា បេក្ខជនរបស់កម្ពុជា គឺលោក ឡៅ បញ្ញា ទទួលបានចំណាត់ថ្នាក់ដល់ទៅបី-បួន ម្នាក់ឯង ដែលធ្វើឲ្យលោកក្លាយជាបេក្ខជនតំណាងប្រទេសទទួលបានកិត្តិយសជាងគេ បើធៀបនឹងបេក្ខជន និងបេក្ខនារីផ្សេងទៀត បើទោះជាលោកមិនទទួលបានម្កុដជាបុរសឯកក្រោយការប្រកួតត្រូវបញ្ចប់។
យោងតាមការផ្សាយផ្ទាល់ និងការប្រកាសរបស់ផេក Mister & Miss Asian International 2019 បានអះអាងថា កម្ពុជាមានតំណាងតែបេក្ខជនបុរសឯកទៅប្រកួតក្នុងព្រឹត្តិការណ៍មួយនេះតែមួយរូបគត់ ដោយមិនមានតំណាងជាបេក្ខនារីនោះទេ ប៉ុន្តែអ្វីដែលធ្វើឲ្យគេភ្ញាក់ផ្អើល គឺលោកម្នាក់ឯងទទួលបានចំណាត់ថ្នាក់បី-បួនម្នាក់ឯង។ ខណៈដែលជ័យលាភីបុរសឯកត្រូវបានទៅលើបេក្ខជនមកពីប្រទេសសិង្ហបុរី និងជ័យលាភីផ្នែកនារីបានទៅលើស្រីស្អាតមកពីប្រទេសថៃដែលជាម្ចាស់ផ្ទះ។
បេក្ខភាពរបស់កម្ពុជា គឺលោក ឡៅ បញ្ញា ឯណេះវិញ ក៏ត្រូវបានគេចាប់អារម្មណ៍មិនអន់ជាងចំណាត់ថ្នាក់ឯកទាំងពីរនាក់នោះដែរ ដោយសារតែលោកទទួលបានចំណាត់ថ្នាក់ស្ទួនៗម្នាក់ឯងមិនធម្មតា។ លោកត្រូវបានប្រកាសថា បានទទួល 1st Runner Up ឬហៅថាចំណាត់ថ្នាក់រង(ចំណាត់ថ្នាក់លេខ២)សម្រាប់ការប្រកួតផ្នែកបុរស, ចំណាត់ថ្នាក់ Best Smile ឬជាបេក្ខជនដែលញញឹមស្រស់ជាងគេ និងចំណាត់២ទៀត គឺចំណាត់ថ្នាក់ 2nd Runner Up Best Physique និងចំណាត់ថ្នាក់ 2nd Runner Up Best National Custom ដែលជាចំណាត់ថ្នាក់លេខ៣ខាងរូបសម្បត្តិល្អ និងគ្រងឈុតសំលៀកបំពាក់បែបប្រពៃណីបានសាកសមបំផុត។
បេក្ខជនរូបនេះត្រូវបានគេស្គាល់ថា ជាអ្នកសម្ដែងក្បាច់គុនល្បុក្កតោ និងសម្ដែងអច្ឆរិយអង្គរនៅខេត្តសៀមរាប ទើបនៅក្នុងព្រឹត្តិការណ៍ ក្រៅពីមានរូបរាងខ្ពស់សង្ហារទាក់ទាញ លោកក៏ចេះសម្ដែងក្បាច់គុនល្បុក្កតោ ធ្វើឲ្យការប្រកួតកម្រិតអន្តរជាតិនាពេលនោះមានការកោតសរសើរផងដែរ។
លោក តូនី ម្ចាស់គ្លីនិកធ្មេញវីលៀម ដែលជាគ្រប់គ្រងលើការចំណាយទាំងស្រុងក្នុងការបញ្ជូនបេក្ខជនរូបនេះអោយបានចេញប្រកួត បូករួមទាំងការចំណាយលើការកែច្នៃឈុតក្នុងសម័យអង្គរអោយលោក ឡៅ បញ្ញា បានគ្រងលើឆាកអន្តរជាតិផង បានអះអាងថា គឺជាមោទនភាពខ្លាំងណាស់ ដែលកម្ពុជាទៅប្រកួតអន្តរជាតិក្នុងព្រឹត្តិការណ៍ធំមួយនេះ ហើយអាចទទួលបានចំណាត់ថ្នាក់ល្អដល់ទៅបី-បួនម្នាក់ឯង ដែលលោកយល់ថា គឺជារឿងកម្រ។ លោកថា ខ្លួនបានជ្រោមជ្រែងឲ្យមានបេក្ខជនទៅប្រកួតបុរសឯកបែបនេះច្រើនលើកមកហើយ ប៉ុន្តែ លោកចាត់ទុកថា ជ័យជម្នះដែលបេក្ខជន ឡៅ បញ្ញា ទទួលបានគឺជារឿងកម្រសម្រាប់ការប្រកួតរបស់កម្ពុជាលើឆាកអន្តរជាតិ។
លោក តូនី និយាយថា ក្រោយការប្រកាសលទ្ធផល កម្ពុជាមិនចាញ់អ្នកលេខ១ និងបេក្ខជនមកពីប្រទេសផ្សេងនោះទេ ទើបលោកយល់ថា នេះគឺជាមូលហេតុដែលធ្វើឲ្យលោកនៅតែរក្សាប្រកាន់ជំហរ បន្តផ្ដល់កញ្ចប់ឲ្យក្រុមហ៊ុនដែលជ្រើសរើស និងបញ្ជូនបុរសឯកពីកម្ពុជាឲ្យទៅប្រកួត ដើម្បីមានលទ្ធភាពបន្តបញ្ជូនបេក្ខជនពីកម្ពុជាទៅប្រកួតលើឆាកអន្តរជាតិបន្តទៀត។
លោកថា ទៅប្រកួតនៅក្នុងប្រទេសគេ កម្ពុជាមិនងាយរំពឹងទទួលបានចំណាត់ថ្នាក់ល្អៗត្រលប់មកវិញនោះទេ ប៉ុន្តែ បើការប្រកួតធំមួយនេះ ទទួលបានដល់ទៅចំណាត់ថ្នាក់ដល់ទៅបី-បួនម្នាក់ឯងបែបនេះ គឺមានន័យថា បេក្ខជនរបស់កម្ពុជាពិតជាមានសមត្ថភាពមិនធម្មតា ដែលពិបាកឲ្យគណកម្មការមើលរំលងហើយ៕