លោកនាយករដ្ឋមន្ដ្រី ហ៊ុន សែន បានរិះគន់ការដាក់ឲ្យប្រើប្រាស់ Wi-Fi សាធារណៈនៅរាជធានីភ្នំពេញ ប៉ុន្ដែ សេវាអ៊ីនធឺណិតមិនដំណើរការ។
ក្នុងពិធីមួយស្ដីអំពី «ទិវាជាតិទីក្រុងស្អាត» លើកទី៧ នៅរាជធានីភ្នំពេញនៅថ្ងៃនេះ លោក ហ៊ុន សែន បានបញ្ជាឲ្យមន្ដ្រីរបស់លោកពិនិត្យពីការដាក់ឲ្យប្រើប្រាស់សេវា Wi-Fi អ៊ីនធឺណិតសាធារណៈដល់ប្រជាពលរដ្ឋ ឬអ្នកនិយមប្រើប្រាស់បណ្ដាញអ៊ីនធឺណិតនៅប្រទេសកម្ពុជា។ លោកថា តាមបទពិសោធរបស់លោកកន្លងមក ប្រព័ន្ធ Wi-Fi សាធារណៈទាំងនោះ មិនដំណើរការ ឬមិនអាចប្រើប្រាស់បាននោះទេ។
លោក ហ៊ុន សែន ថ្លែងថា៖ «ខ្ញុំក៏សូមទាក់ទាញឲ្យមានការយកចិត្តទុកដាក់ ព្រោះស្ថានភាពដែលយើងបានធ្វើនៅទីក្រុងភ្នំពេញប៉ុន្មានកន្លែងនេះ ហាក់ដូចជាមិនទាន់មានប្រសិទ្ធភាពទេ ហើយតាមធម្មតា ខ្ញុំបានធ្វើដំណើរទៅកាន់កន្លែងនេះ កន្លែងនោះ ដែលហៅថា Free Wi-Fi។ ជាក់ស្ដែងនៅក្នុងសណ្ឋាគារនេះ សាកល្បងបើក Wi-Fi មើល វាចូល Wi-Fi ប៉ុន្ដែ វាមិនដំណើរការ ធ្វើអីវា […] ប្រយ័ត្នក្រុមហ៊ុនអ៊ីនធឺណិតមករៀបចំឲ្យយើង រួចហើយទីចុងបំផុត ដើរវិលខ្ញាល់»។
ក្រៅពីថ្លែងរិះគន់ភាពរអាក់រអួលនៃការដាក់ឲ្យប្រើប្រាស់ Wi-Fi សាធារណៈនោះ លោក ហ៊ុន សែន ក៏បានបញ្ជាឲ្យក្រសួងទូរគមនាគមន៍ និងប្រៃសណីយ៍ រៀបចំតំឡើង Wi-Fi សាធារណៈនៅតាមតំបន់គោលដៅទេសចរណ៍ផ្សេងទៀតឲ្យបានមុនឆ្នាំ២០២៣ ដូចជា នៅរាជធានីភ្នំពេញ ខេត្តសៀមរាប ខេត្តព្រះសីហនុ និងបាត់ដំបង។
កាលពីខែមេសា ឆ្នាំ២០១៨ ក្រសួងទូរគមនាគមន៍ និងប្រៃសណីយ បានដាក់ឲ្យដំណើរការប្រព័ន្ធអ៊ីនធឺណិតឥតខ្សែសាធារណៈ (Public Wi-Fi) នៅទីតាំងចំនួន ៥កន្លែង នៅរាជធានីភ្នំពេញ និងខេត្តមួយចំនួនទៀត ដូចជានៅខេត្តកំពង់ឆ្នាំង និងខេត្តកំពង់ស្ពឺ។
បើតាមរបាយការណ៍ក្រសួងប្រសណីយ៍ ប្រទេសកម្ពុជា មានអ្នកប្រើប្រាស់សេវាអ៊ីនធឺណិតប្រមាណ ៨លាននាក់ នៅឆ្នាំ២០១៧ ពោលគឺប្រមាណ ៥០ភាគរយនៃប្រជាជនសរុប៕