ទំព័រហ្វេសប៊ុកផ្លូវការរបស់លោកនាយករដ្ឋមន្ដ្រី ហ៊ុន សែន បានអះអាងថា ទំព័របណ្ដាញទំនាក់ទំនងសង្គមមួយនេះ ត្រូវបានឧក្រិដ្ឋជនលួចយកទៅគ្រប់គ្រង ដែលការអះអាងនេះបានកើតឡើងបន្ទាប់ពីទំព័រហ្វេសប៊ុកដដែលនេះ បានព្រមានបិទបណ្ដាញសង្គមមួយនេះមិនឲ្យមាននៅកម្ពុជា។
ទំព័រហ្វេសប៊ុកផ្លូវការរបស់លោក ហ៊ុន សែន ត្រូវបានមើលឃើញថា បានបង្ហោះសារមួយ ដែលរៀបរាប់ថា ទំព័រហ្វេសប៊ុកមួយនេះ ត្រូវបានក្រុមហ៊ុន Facebook របស់អាមេរិក ព្យាយាមបិទគណនី និងសារមួយឃ្លាទៀត ដែលព្រមានថា នឹងបណ្ដាញទំនាក់ទំនងសង្គមដ៏ធំមួយនេះ មិនឲ្យមាននៅក្នុងប្រទេសកម្ពុជា។
សំណេរលើទំព័រហ្វេសប៊ុកផ្លូវការរបស់លោក ហ៊ុន សែន រៀបរាប់ថា៖ «ក្រុមហ៊ុនហ្វេសប៊ុកបានលុបនិងព្យាយាមបិទគណនីរបស់ខ្ញុំ។ តែខ្ញុំ ហ៊ុន សែន សូមប្រាប់ទៅវិញថា បើអ្នកឯងហ៊ានបិទហ្វេសប៊ុករបស់ខ្ញុំ ខ្ញុំនឹងបិទលែងឲ្យប្រើហ្វេសប៊ុកនៅស្រុកខ្មែរ»។
ទោះជាយ៉ាងណា ទំព័រហ្វេសប៊ុកលោក ហ៊ុន សែន បានអះអាងនៅប្រហែលកន្លះម៉ោងក្រោយមកថា ទំព័រហ្វេសប៊ុកផ្លូវការមួយនេះ ត្រូវបានគ្រប់គ្រងដោយអ្នកដទៃ ដែលត្រូវបានហៅថា «ក្រុមឧក្រិដ្ឋកម្មបច្ចេកវិទ្យា» និងទិន្នន័យមួយចំនួនធំ ត្រូវបានលុបចោល។
ទំព័រហ្វេសប៊ុកលោក ហ៊ុន សែន រៀបរាប់ថា៖ «នៅមុននេះបន្តិច មានក្រុមឧក្រិដ្ឋកម្មបច្ចេកវិទ្យា (Hacker) បានចូលមកលួច Account Facebook ខ្ញុំ ហើយបានលួចលុបទិន្នន័យព័ត៌មានអស់មួយចំនួនធំ។ ពេលនេះ ខាងក្រុមហ៊ុន Facebook កំពុងសើបអង្កេតជនអគតិដែលមានចេតនាអាក្រក់បំពុល និងបំផ្លាញព័ត៌មាននៅក្នុងសង្គមជាតិយើង»។
ទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន បានអះអាងដោយខ្លួនឯងកាលពីឆ្នាំមុនថា ត្រូវបានជនអនាមិកលួចយកទៅគ្រប់គ្រងម្ដងរួចមកហើយកាលពីថ្ងៃទី១៦ ខែសីហា ឆ្នាំ២០១៨ តែជាងកន្លះខែប៉ុណ្ណោះក្រោយការបោះឆ្នោតជាតិកាលពីចុងខែកក្កដាឆ្នាំមុន។
គិតត្រឹមថ្ងៃនេះ ទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន មានអ្នកចុច Like និង Follow ដល់ទៅជិត ១១លាននាក់។
ក្រៅពីទំព័រហ្វេសប៊ុក គេហទំព័ររបស់លោក ហ៊ុន សែន ដែលមានអាស័យដ្ឋាន www.samdechhunsen.gov.kh ក៏ត្រូវបានជនអនាមិកលួចយកទៅគ្រប់គ្រងដែរកាលពីខែឧសភាឆ្នាំ២០១៦ ហើយលោក ហ៊ុន សែន ថែមទាំងបានប្រកាសមិនអត់ឱនចំពោះបក្សប្រឆាំងនោះឡើយ ដែលលោកចោទថា បានរំខានលើគេហទំព័ររបស់លោក។
ក្រៅពីទំព័រហ្វេសប៊ុកផ្លូវការលោក ហ៊ុន សែន ទំព័រហ្វេសប៊ុករបស់គណៈកម្មាធិការជាតិរៀបចំការបោះឆ្នោត និងទំព័រហ្វសប៊ុករបស់សារព័ត៌មាន Fresh News ក៏ត្រូវបានស្ថាប័នទាំងពីរនេះ អះអាងថា ត្រូវបានជនអនាមិកលួចយកទៅគ្រប់គ្រង និងបង្ហោះព័ត៌មានក្លែងក្លាយផងដែរកាលពីឆ្នាំមុននោះ៕
