អ្នកនាំពាក្យកងរាជអាវុធលើផ្ទៃប្រទេស អះអាងថា មន្ត្រីរបស់ខ្លួនមិនបានបាញ់ប្រហារទៅលើប្រជាពលរដ្ឋនោះឡើយ អំឡុងពេលចុះអនុវត្តសាលដីការបស់តុលាការ នៅក្នុងសំណុំរឿងជម្លោះដីធ្លីមួយស្ថិតក្នុងស្រុកព្រៃនប់ ខេត្តព្រះសីហនុ ដែលឈានទៅដល់កើតមានអំពើហិង្សាបង្កឲ្យពលរដ្ឋ ២នាក់រងរបួស។
ក្នុងសន្និសទីសារព័ត៌មានដែលធ្វើឡើងនៅឯខេត្តព្រះសីហនុនៅថ្ងៃនេះ អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី អះអាងថា កងកម្លាំងអាវុធហត្ថចំនួន ១០០នាក់ ដែលបំពាក់ដោយកាំភ្លើងវែង ១០ដើម និងកាំភ្លើងខ្លី ៦ដើម ត្រូវបានចាត់តាំងឲ្យចុះទៅចូលរួមអនុវត្តសាលដីកាតុលាការកំពូល កាលពីថ្ងៃទី២៤ ខែមករាកន្លងមកនេះ នៅឯភូមិគគីរ ឃុំបិតត្រាំង។
អ្នកនាំពាក្យរូបនេះ អះអាងទៀតថា អាវុធដែលបាញ់ត្រូវពលរដ្ឋម្នាក់ក្នុងថ្ងៃចុះអនុវត្តសាលដីកានោះ ជាអាវុធខ្លីប្រភេទ K59 ប៉ុន្តែ ក្រោយពីស៊ើបអង្កេត និងធ្វើកោសលវិច័យមក លោកថា ក្បាលគ្រាប់ដែលបាញ់ចំពលរដ្ឋនោះ មិនមែនជាក្បាលគ្រាប់បាញ់ដែលចេញដោយកងកម្លាំងអាវុធហត្ថនោះទេ។
លោកថា៖ «ខ្ញុំសូមបញ្ជាក់ថា ក្បាលគ្រាប់ដែលបាញ់ចេញពីកាំភ្លើងមួយ គឺបាញ់ចេញវាដូចគ្នា មានភាពដូចគ្នា ការពិនិត្យ ទោះបីជាប៉ុន្មានគ្រាប់ក៏ដោយ ក៏មានភាពដូចគ្នាដែរ តែបើសិនជាកាលណាចេញភាពអវិជ្ជមានអីចេះ មានន័យថា គឺ គ្រាប់កាំភ្លើងដែលត្រូវជនរងគ្រោះនោះ មិនបានចេញពីកាំភ្លើងរបស់កងរាជអាវុធហត្ថទេ។ នេះចង់បញ្ជាក់កន្លែងហ្នឹងបន្តិច!»
មន្ត្រីជាន់ខ្ពស់កងរាជអាវុធហត្ថរូបនេះ បានឲ្យដឹងទៀតថា សមត្ថកិច្ចកំពុងធ្វើការស៊ើបអង្កេតបន្តទៀត ដើម្បីស្វែងរកជនល្មើសដែលបាញ់ពលរដ្ឋនោះ។
លោក អេង ហ៊ី បានឲ្យដឹងទៀតថា អង្គភាពយោធាបានសម្រេចព្យួរការងារមន្ត្រីអាវុធហត្ថម្នាក់ ដែលត្រូវបានរកឃើញថា បានប្រើអំពើហិង្សាទៅលើពលរដ្ឋ និងត្រូវបានកសាងសំណុំរឿងទៅតុលាការ។
បើតាមអ្នកនាំពាក្យរូបនេះ មេបញ្ជាការរងកងរាជអាវុធហត្ថខេត្តព្រះសីហនុ និងមន្ត្រី ៣នាក់ទៀត ក៏ត្រូវបានអង្គភាពរបស់លោកដាក់ពិន័យដោយការស្ដីបន្ទោសជាលាយលក្ខណ៍អក្សរ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានបង្ហាញនូវមន្ទិលសង្ស័យជុំវិញការបកស្រាយរបស់មន្ត្រីជាន់ខ្ពស់កងរាជអាវុធហត្ថលើផ្ទៃប្រទេស ហើយលោកបានជំរុញឲ្យបង្កើតគណៈកម្មការថ្នាក់ជាតិមួយ សម្រាប់ស៊ើបអង្កេតលើករណីនេះ ដើម្បីស្វែងជនដៃដល់។
លោក ស៊ឹង សែនករុណា មានប្រសាសន៍ថា៖ «ទោះបីថា វាមិនមែនជាគ្រាប់កាំភ្លើងដែលអះអាងដោយសមត្ថកិច្ចថា វាមិនមែនជាគ្រាប់ដែលចេញពីក្រុមអ្នកដែលចុះបង្ក្រាប តើជាគ្រាប់កាំភ្លើងអ្នកណា? តួនាទីនេះ គឺស្ថិតនៅក្នុងសមត្ថកិច្ចដដែល។ បើសិនជារកមិនឃើញឲ្យច្បាស់លាស់ទេ ហើយការដែលចោទប្រកាន់ពីសំណាក់សាធារណជនដែលគេតែងតែផ្ដល់យោបល់ហ្នឹង តាមបណ្ដាញសង្គមទាំងអស់ហ្នឹង ការបំភ្លឺហ្នឹង នៅតែមិនអាចទទួលយកបានអញ្ចឹង»។
កាលពីថ្ងៃទី១៣ ខែកុម្ភៈ រដ្ឋមន្រ្តីក្រសួងមហាផ្ទៃ លោក ស ខេង បានលើកឡើងថា ករណីអាជ្ញាធរក្រចេះ និងអាជ្ញាធរខេត្តព្រះសីហនុ យកកម្លាំងយោធាបង្ក្រាបពលរដ្ឋមានជម្លោះដីធ្លីនោះ ជារឿងមិនត្រឹមត្រូវ ហើយលោកបានហាមទៅអាជ្ញាធរខេត្តផ្សេងៗទៀត កុំប្រើប្រាស់កម្លាំងយោធាទៅចុះអនុវត្តសាលដីការបស់តុលាការ ដោយលោកថា សកម្មភាពនោះជារឿងខុសច្បាប់។
កាលពីថ្ងៃទី២៤ ខែមករា សមត្ថកិច្ចចម្រុះខេត្តព្រះសីហនុប្រមាណ ៣០០នាក់ ដឹកនាំដោយព្រះរាជអាជ្ញា ហួត វិចិត្រ និងអភិបាលរងខេត្ត លោក ផៃ ប៊ុនវណ្ណៈ បានចុះអនុវត្តសាលដីការបស់តុលាការកំពូល ដើម្បីវាស់វែងដីឲ្យអ្នកស្រី ហុង សួន ភរិយារបស់ឧកញ៉ា ស៊ីវ គង់ទ្រីវ ស្ថិតភូមិគគីរ ប៉ុន្តែ ត្រូវបានអ្នកភូមិរាប់រយនាក់តវ៉ាប្រឆាំងនឹងការចុះអនុវត្តនោះ ដោយនាំគ្នាដុតកង់ឡានបិទផ្លូវរហូតផ្ទុះអំពើហិង្សា។
ក្នុងហេតុការណ៍ប៉ះទង្គិចគ្នានោះ ពលរដ្ឋម្នាក់ដែលជាកម្មករសំណង់ បានត្រូវគ្រាប់កាំភ្លើងដែលបាញ់ចំពីក្រោយត្រង់ស្មាពីខាងឆ្វេងបៀមជាប់ឆ្អឹងខ្នង ហើយពលរដ្ឋ ៦នាក់ផ្សេងទៀត ត្រូវបានសមត្ថកិច្ចឃាត់ខ្លួនបណ្តោះអាសន្ន ហើយដោះលែងវិញនៅយប់ថ្ងៃដដែល៕