សង្គមស៊ីវិល បានសាទរចំណាត់ការរដ្ឋាភិបាលដែលបានឆ្មក់ចាប់គ្រឿងញៀនបាន៥០គីឡូក្រាមក្នុងក្លឹបកំសាន្តរ៉ក់ (Rock) នៅរាជធានីភ្នំពេញ ប៉ុន្តែថារដ្ឋាភិបាលនឹងបរាជ័យលើការទប់ស្កាត់ចរាចរណ៍គ្រឿងញៀននៅទូទាំងប្រទេស បើឧក្រិដ្ឋជនមិនត្រូវបានចាប់ខ្លួន ។
កាលពីសប្តាហ៍មុនកម្លាំងជំនាញរបស់រដ្ឋាភិបាល បានឆ្មក់ចូលមជ្ឈមណ្ឌលកម្សាន្តរ៉ក់ (Rock) ទាំងយប់ ចាប់បានគ្រឿងញៀនគ្រប់ប្រភេទប្រហែល ៥០គីឡូក្រាម និងឃាត់មនុស្សចំនួន ៣១១នាក់ ភាគច្រើនជាយុវជន មកសាកសួរ។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត មានប្រសាសន៍ថា លោកស្វាគមន៍ចំណាត់ការនេះ។ ប៉ុន្តែ លោកជំរុញទៅរដ្ឋាភិបាលឲ្យធ្វើការស្រាវជ្រាវដោយឯករាជ្យមួយ ដើម្បីឈានចាប់ឧក្រិដ្ឋជននេះមកផ្តន្ទាទោស ទើបអាចទប់ស្កាត់ការរីករាលដាលនៃការប្រើប្រាស់គ្រឿងញៀននេះ នៅកន្លែងផ្សេងៗទៀតបាន ។
លោកថា៖ «ខ្ញុំគិតថា បើយើងមិនចាត់វិធានការឲ្យបានតឹងរ៉ឹងបន្តទៀតទេ អាការបង្ក្រាបហ្នឹង វាដូចវែកចក។ វិធានការហ្នឹង វាចេះតែបន្តកើតមានជាបន្តបន្ទាប់។ អញ្ចឹង យើងត្រូវប្រើយន្តការណាឲ្យមាននិរន្តរភាព»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ និយាយថា ភស្តុតាង និងសាក្សីដែលរដ្ឋាភិបាល ប្រមូលបានអំឡុងចុះបង្ក្រាបក្លឹបកម្រាន្ត Rock នេះ ជាដើមចមឈានទៅចាប់ឧក្រិដ្ឋជនមកផ្តន្ទាទោសបាន។
ប៉ុន្តែ លោក សន ជ័យ លើកឡើងទៀតថា ករណីនេះ បើគ្មានឧក្រិដ្ឋជនណាមួយត្រូវបានចាប់ខ្លួនមកផ្តន្ទាទោសទេ លោកថា រដ្ឋាភិបាលនឹងបរាជ័យទប់ស្កាត់ការចរាចរណ៍គ្រឿងញៀននៅកន្លែងផ្សេងទៀត ដែលលោកហៅវិធានការបែបនេះថា ជាវិធានការអង្គុយបក់ផ្សែង មិនទៅពន្លត់ភ្លើងដែលកំពុងឆាបឆេះ។
លោកថា៖ «ចង់កាត់បន្ថយមនុស្សកុំឲ្យប្រើប្រាស់គ្រឿងញៀន គេត្រូវរកវិធានការបង្ក្រាបទៅលើអ្នកផ្តល់មធ្យោបាយ បានន័យថា អ្នកដែលបង្កាត់ភ្លើង។ ដូច្នេះ ច្បាប់ណាស់ថា ឫសគល់នៃការប្រើប្រាស់គ្រឿងញៀន គឺមធ្យោបាយចែកចាយ និងមេខ្លោងដែលទទួលខុសត្រូវក្នុងការចែកចាយតែម្តង»។
អគ្គស្នងការរងនគរបាលជាតិទទួលបន្ទុកផ្នែកព្រហ្មទណ្ឌ លោក ម៉ក់ ជីតូ អះអាងថា មន្ត្រីជំនាញកំពុងសាកសួរជនសង្ស័យ ប៉ុន្តែ លោកថា គិតត្រឹមថ្ងៃអង្គារនេះ សមត្ថកិច្ចមិនទាន់កំណត់ថា បុគ្គលណាមួយជាឧក្រិដ្ឋជនពាក់ព័ន្ធទៅនឹងគ្រឿងញៀន៥០គីឡូក្រាម ដែលបានរកឃើញនៅក្លឹបកម្សាន្តរ៉ក់នេះនៅឡើយទេ ។
លោកថា៖ «តាមខាងក្រៅ មើលឃើញអញ្ចឹងហើយ។ ប៉ុន្តែ ចំពោះជំនាញ យើងមិនអាចនឹកឃើញធ្វើបានទេ ទាល់តែមានរបាយការណ៍ មានចម្លើយពាក់ព័ន្ធយ៉ាងម៉េច ឧទារហរណ៍ ទីតាំងគាត់ តើគាត់ប្រគល់ឲ្យអ្នកណាធ្វើ ឬជួលឲ្យអ្នកណាអីអញ្ចឹងទៅ»។
ច្បាប់ស្តីពីការត្រួតពិនិត្យគ្រឿងញៀនមាត្រា៣៣ចែងថា៖ «ជនណាប្រព្រឹត្តដោយចេតនាល្មើសនឹងបទបញ្ញត្តិនៃច្បាប់នេះ និងបញ្ជាទាក់ទងនឹងការស្នើផ្តល់ឲ្យការលក់ ការចែកចាយ ការធ្វើជើងសារ ការប្រគល់ឲ្យ ការរក្សាទុក ត្រូវផ្តន្ទាទោសដាក់ពន្ធនាគារពី១០ឆ្នាំ ទៅ២០ឆ្នាំ និងផ្តន្ទាទោសដាក់ពិន័យជាប្រាក់ពី១០លានរៀល ទៅ៥០លានរៀល»។
មាត្រា៣៥ ចែងពីការដាក់ទោសទណ្ឌដែរថា សម្រាប់អ្នកដែលផ្តល់មធ្យោបាយឲ្យប្រើប្រាស់ដោយចេតនា ដូចជា ផ្ទះសំណាក់ ភោជនីដ្ឋាន ក្លឹប និងកន្លែងរាំច្រៀង ជាដើម ត្រូវផ្តន្ទាទោសពី១ឆ្នាំទៅ៥ឆ្នាំ និងពិន័យជាប្រាក់ពី៥លានរៀល ទៅ១០លានរៀល។
អ្នកឃ្លាំមើលការអភិវឌ្ឍសង្គម លោក ប៉ា ច័ន្ទរឿន មានប្រសាសន៍ ប្រហាក់ប្រហែលដែរថា ឥទ្ធិពលគ្រឿងញៀនបានបំផ្លាញសង្គម និងធនធានមនុស្ស។ លោកថា ពេលនេះ ឥទ្ធិពលគ្រឿងញៀន ក៏វាយលុកដល់ស្រទាប់យុវជននៅតាមតំបន់ជនបទផងដែរ។
អ្នកតាមសង្គមរូបនេះ បង្ហាញការព្រួយបារម្ភថា បើបញ្ហាដែលបានកើតឡើងនៅក្លឹបកម្សាន្តរ៉ក់នេះ រដ្ឋាភិបាលមិនអាចចាប់ឧក្រិដ្ឋជនគ្រឿងញៀនមកផ្តន្ទាទោសបានទេ លោកបារម្ភថា នៅពេលខាងមុខបញ្ហាគ្រឿងញៀន នឹងបង្កឲ្យមានវិបត្តិសង្គមធ្ងន់ធ្ងរ ។
លោកថា៖ «អាជ្ញាធរតែងតែអំពាវនាវ និងបង្ហាញពីចំណាត់ការ ប៉ុន្តែ ប្រសិទ្ធិភាពនៃកិច្ចការនេះនៅមានកម្រិតនៅឡើយ។ ពិសេសពលរដ្ឋដែលនៅតាមជនបទហ្នឹង ក៏ព្រួយបារម្ភដែរកូនចៅរបស់គាត់ ហាក់ជោគជាំទៅនឹងគ្រឿងញៀន និងគ្រឿងស្រវឹង»។
រដ្ឋមន្ត្រីក្រសួងមហាផ្ទៃ លោក ស ខេង កាលពីសប្តាហ៍មុន បានអះអាងថា ក្នុងចំណោមអ្នកទោសជាង៣ម៉ឺននាក់ មានជាង២ម៉ឺនាក់ ឬ២ភាគ៣ ជាប់ពាក់ព័ន្ធបទល្មើសគ្រឿងញៀន៕
