អាជ្ញាធរមូលដ្ឋានខណ្ឌដូនពេញ បានសួរនាំ នគរបាលពាក់ផ្កាយ២ម្នាក់ និងមន្រ្តីក្រោមឱវាទប្រមាណ១០នាក់ ដោយសារតែមិនដែលបានស្គាល់់មន្រ្តីទាំងនោះ។
អភិបាលខ័ណ្ឌដូនភ្នំពេញ លោក សុខ ពេញវុធ បានប្រាប់ វីអូឌី នៅថ្ងៃនេះថា ដើមចមដែលនាំឲ្យក្រុមសមត្ថកិច្ចចំរុះ រួមមាន អភិបាលខណ្ឌ អធិការនគរបាលខណ្ឌ និងប៉េអឹមខណ្ឌ ហៅនគរបាលផ្កាយពីរម្នាក់ដែលបម្រើការនៅអគ្គស្នងការនគរបាលជាតិ នៅផ្នែកប្រឆាំងបទល្មើសគ្រឿងញៀនការិយាល័យ(ក១) និងកូនចៅប្រមាណ១០នាក់ សួរនាំកាលពីយប់ថ្ងៃទី២៤ ខែកុម្ភៈ ឆ្នាំ២០១៩ ពិតមែន។ លោក បន្តថា ការសួរនាំនេះធ្វើឡើងដោយសារតែពួកលោកមិនស្គាល់មន្រ្តីដែលចុះទៅបង្ក្រាបបទល្មើសគ្រឿងញៀនទាំងនោះ។
លោក មានប្រសាសន៍ថា៖ «កម្លាំងខ្ញុំចុះធ្វើរដ្ឋបាល វាជួបគ្នា យើងអត់ស្គាល់គ្នា អត់មានអីទេ។ យើងចុះធ្វើការងាររួមគ្នា ខ្ញុំធ្វើរដ្ឋបាល យើងជួបគ្នា យើងអត់ស្គាល់គ្នា យើងក៏សួរនាំទៅ ព្រោះគាត់ស្លៀកពាក់ស៊ីវិល»។
ទោះជាយ៉ាងណា លោក ពេញវុធ អះអាងថា ក្រោយពីសួរនាំ សមត្ថកិច្ចខណ្ឌ និងអាជ្ញាធរមូលដ្ឋាន បានសហការជានគរបាលផ្កាយពីររូបនោះ ដើម្បីធ្វើការងារចុះបង្ក្រាបបទល្មើសគ្រឿងញៀនជាមួយគ្នាផងដែរ។
អគ្គស្នងការរងនគរបាលជាតិទទួលផែនប្រឆាំងគ្រឿងញៀន លោក ម៉ក់ ជីតូ មានប្រសាសន៍ថា នគរបាលផ្កាយពីរម្នាក់និងមន្រ្តីក្រោមឱវាទ១០នាក់ដែលចុះបង្ក្រាបគ្រឿងញៀននៅសង្កាត់ស្រះចក ខណ្ឌដូនពេញ ធ្វើតាមនីតិវិធីច្បាប់ និងមានបញ្ជាពីថ្នាក់លើ ព្រះរាជអាជ្ញា និងជូនដំណឹងទៅអាជ្ញាធរមូលដ្ឋានត្រឹមត្រូវ។ ប៉ុន្តែ លោកបញ្ជាក់ថា មូលហេតុដែលនាំឲ្យអាជ្ញាធរមូលដ្ឋានហៅសួរនាំ ដោយសារពេលចុះបង្ក្រាប ក្រុមការងារទាំងនោះមានអ្នកខ្លះស្លៀកពាក់ស៊ីវិល ដើម្បីការពារកុំឲ្យមានអ្នកប្រឡំប្រព្រឹត្តបទល្មើសនៅក្នុងមូលដ្ឋាននោះ។
លោកមានប្រសាសន៍ថា៖ «ចុះបង្ក្រាប ជួនកាលមានស៊ីវិល មានឯកសណ្ឋាន បើយើងមិនប្រាប់គ្នា ច្រឡំគ្នា ស្មានតែមនុស្សមកពីណាបង្កបទល្មើស សូម្បីខ្ញុំពេលដែលគេរាយការណ៍មក ក៏ខ្ញុំត្រួតពិនិត្យដែរ។ តើចុះតាមនីតិវិធី ចុះតាមបទបញ្ជាឬអត់? […] រឿងនេះចុះតាមនីតិវិធី មានបទបញ្ជាត្រឹមត្រូវទាំងអស់»។
ប្រធាននាយកដ្ឋានការពារជនក្រីក្រនៅគណៈមេធាវីកម្ពុជា លោក វ៉ា ពិសី ពន្យល់តាមច្បាប់ថា បើមន្ត្រីនគរបាលយុត្តិធម៌ ឬមន្ត្រីជំនាញដែលចុះធ្វើការស្រាវជ្រាវរកបទល្មើសគ្រឿងញៀន អាចចុះទៅតំបន់ ឬខណ្ឌណាមួយ ទាំងមានឯកសណ្ឋាន ឬមិនមានក៏បាន ប៉ុន្តែលោកថា មន្ត្រីនោះ ត្រូវជូនដំណឹងទៅព្រះរាជអាជ្ញាជាមុន ដោយមិនបាច់ជូនដំណឹងទៅអាជ្ញាធរមូលដ្ឋានក៏បាន ដើម្បីកុំឲ្យបែកការសម្ងាត់ក្នុងការស៊ើបអង្កេតរកបទល្មើស។
លោក ពន្យល់ថា៖ «នៅក្នុងច្បាប់គ្រឿងញៀន គេបានច្បាប់អនុញ្ញាតពិសេស រហូតដល់ធ្វើជាធ្នាក់ទៀត តែត្រូវមានលិខិតចាត់តាំងច្បាស់លាស់ ប៉ុន្តែ លិខិតចាត់តាំងគេលាក់សិន គេមិនអាចបង្ហាញទេ ទាល់តែមានចាប់ទាំងធ្នាក់ បានគេបង្ហាញលិខិតហ្នឹងទៅ វាអត់មានទោស»។
កាលពីថ្ងៃទី១០ ខែមករា តម្រួតបទបញ្ជារបស់ក្រសួងមហាផ្ទៃបានចុះទៅឃាត់ខ្លួនមន្ត្រី នៃគណៈកម្មការប្រយុទ្ធប្រឆាំងផលិតផលក្លែងក្លាយ៦នាក់ ក្នុងនោះមានឧត្ដមសេនីយ៍ត្រី(ផ្កាយមួយ)ម្នាក់ផងដែរ បន្ទាប់ពីមន្ត្រីទាំងនោះចុះពិនិត្យឃ្លាំងស្តុកបារីមួយក្លែងនៅក្នុងខណ្ឌសែនសុខ រាជធានីភ្នំពេញ ទោះជាយ៉ាងណាបន្ទាប់ពីឃាត់ខ្លួនអ្នកទាំង៦នាក់នោះត្រូវបានដោះលែងវិញ ដោយថាជាការយល់ច្រឡំ។
ចំណែក អនុប្រធានលេខាធិការដ្ឋាននៃគណៈកម្មការប្រយុទ្ធប្រឆាំងផលិតផលក្លែងក្លាយ លោកឧត្ដមសេនីយ៍ ទូច យុទ្ធា ថាករណីនេះ គឺជាការយល់ច្រឡំ ដោយថាមុនហេតុការណ៍នោះ គណៈកម្មការប្រយុទ្ធប្រឆាំងផលិតផលក្លែងក្លាយ បានទទួលសេចក្ដីរាយការណ៍ថា មានរថយន្តដឹកបារី ក្លែងក្លាយចូលក្នុងឃ្លាំង ប៉ុន្តែពេលកម្លាំងចុះធ្វើការ ក៏ជួបនឹងហេតុការណ៍នេះតែម្ដង៕
