សាលារាជធានីគ្រោងផ្លាស់ប្តូរទីតាំងអាជីវកម្ម សហគ្រាស មួយចំនួននៅទីប្រជុំជនក្នុងរាជធានីភ្នំពេញឲ្យ ទៅបណ្តោយផ្លូវក្រវាត់ក្រុងទី៣វិញ ដោយថា ដើម្បីបញ្ជៀសការកកស្ទះចរាចរណ៍ និងកាត់បន្ថយគ្រោះថ្នាក់ផ្សេងៗ។
ក្នុងសេចក្តីជូនដំណឹងរបស់សាលារាជធានីភ្នំពេញចុះផ្សាយកាលពីថ្ងៃទី២៦ ខែកុម្ភៈម្សិលមិញនេះបានឲ្យដឹងថា ដោយសារតែកំណើនសេដ្ឋកិច្ចជាតិរីកចំរើនបន្តបន្ទាប់ ជាពិសេសនៅរាជធានីភ្នំពេញមានការអភិវឌ្ឍយ៉ាងឆាប់រហ័ស មានវិស័យដឹកជញ្ជូនសាធារណៈ ហេដ្ឋារចនាសម្ព័ន្ធ ផ្លូវថ្នល់ ស្ពានអាកាស សួនច្បារ លួ ប្រឡាយ អគ្គិសនី និងសំណង់អគារតូចធំជាដើម ដែលធ្វើឲ្យកកស្ទះចរាចរ និងគ្រោះថ្នាក់ជាដើម។
ករណីនេះ សាលារាជធានីភ្នំពេញស្នើទៅម្ចាស់សហគ្រាស រោងចក្រ ឃ្លាំងស្តុកទំនិញ និងយានដ្ឋានជួសជុលរថយន្តធំៗ ដែលស្ថិតនៅតំបន់ទីប្រជុំជនក្នុងរាជធានីភ្នំពេញទាំងអស់ រៀបចំផ្លាស់ប្តូរទីតាំងអាជីវកម្មរបស់ខ្លួនឲ្យស្ថិតនៅតាមបណ្តោយផ្លូវក្រវាត់ក្រុងទី៣ ដែលក្រសួងសាធារណៈការ និងដឹកជញ្ជូនកំពុងស្ថាបនាផ្លូវឆ្លងកាត់រាជធានីភ្នំពេញ និងបណ្តាខេត្តចាប់ពីស្ពានព្រែកព្នៅ មហាវិថីឈ្នះ-ឈ្នះ (ផ្លូវកប់ស្រូវ) ផ្លូវជាតិលេខ៤ ត្រង់គីឡូម៉ែត្រលេខ១៤+១០៥ ទៅភ្ជាប់ផ្លូវជាតិលេខ១ ត្រង់គីឡូម៉ែត្រលេខ២៤+៨៤០ ដោយកាត់ផ្លូវជាតិលេខ២ លេខ៣ និងផ្លូវជាតិលេខ២១ ដែលគម្រោងសង់ផ្លូវក្រវាត់ក្រុងនេះនឹងបញ្ចប់នៅត្រឹមឆ្នាំ២០២១ខាងមុខនេះ។
សេចក្តីជូនដំណឹងដដែលបញ្ជាទៅស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ មន្ទីរការងារ និងបណ្តុះបណ្តាលវិជ្ជាជីវៈរាជធានីភ្នំពេញ មន្ទីរឧស្សាហកម្ម និងសិប្បកម្ម រួមទាំងរដ្ឋបាលខណ្ឌទាំង១២ ជួយអនុវត្ត និងផ្សព្វផ្សាយឲ្យបានទូលំទូលាយផងដែរ។
ប្រធានស្តីទីកម្មវិធីចរាចរណ៍ នៃអង្គការជនពិការអន្តរជាតិ (ប៊ែលហ្ស៊ីក) លោក គង់ រតនៈ មានប្រសាសន៍ថា គម្រោងអភិវឌ្ឍរបស់រដ្ឋាភិបាលនឹងរួមចំណែកកាត់បន្ថយការកកស្ទះ និងគ្រោះថ្នាក់ចរាចរ ប៉ុន្តែ លោកស្នើទៅសាលាក្រុងផ្តល់ពេលវេលាសមស្របដល់ម្ចាស់អាជីវកម្មទាំងនោះ ដើម្បីកុំឲ្យប៉ះពាល់ដល់ប្រយោជន៍ទាំងសងខាង។
លោកមានប្រសាសន៍ថា៖ «សំណូមពរទៅខាងអាជ្ញាធរក្រុង មេត្តាផ្តល់ពេលវេលាសមស្រប សម្រាប់ឲ្យម្ចាស់អាជីវកម្ម ផ្នែកខាងយានយន្ត ឲ្យគាត់មានពេលគ្រប់គ្រាន់ ហើយសំណូមពរទៅម្ចាស់អាជីវកម្ម សូមមេត្តាគិតជាប្រយោជន៍រួម ជាជាងគិតប្រយោជន៍បុគ្គល មានន័យថា គាត់ត្រូវរកវិធីសាស្ត្រអ្វី ដើម្បីឲ្យយើងដើរទៅមុខទាំងអស់គ្នា ដោយមិនចាំបាច់ប្រឈមមុខដាក់គ្នា ក្នុងលក្ខខណ្ឌហិង្សា ឬក៏ចាប់បង្ខំណាមួយ»។
គួរបញ្ជាក់ថា ផ្លូវក្រវាត់ក្រុងកំណាត់ទី១ មានប្រវែង១០ គីឡូម៉ែត្រ ដោយចំណាយថវិកាសាងសង់ប្រមាណជាង១០ លានដុល្លារអាមេរិក ក្រោមជំនួយហិរញ្ញប្បទានពីសាធារណរដ្ឋវៀតណាម ហើយតភ្ជាប់ពីផ្លូវទំនប់កប់ស្រូវ (ឬផ្លូវ១២០K) ឆ្ពោះទៅកាន់មហាវិថីសហព័ន្ធរុស្សី។
ចំណែក ផ្លូវក្រវាត់ក្រុងកំណាត់ទី២ ភ្ជាប់ទៅភាគខាងត្បូងនៃរាជធានីភ្នំពេញនេះ ដោយមានប្រវែង១៧ គីឡូម៉ែត្រ នឹងគ្រោងចំណាយជិត៦២ លានដុល្លារអាមេរិក ក្រោមហិរញ្ញប្បទានរដ្ឋាភិបាលប្រជាមានិតចិន ដោយនឹងប្រើរយៈសាងសង់ ៣៦ខែ ហើយនឹងបញ្ចប់នៅឆ្នាំ២០១៩នេះ។
រីឯផ្លូវក្រវាត់ក្រុងទី៣ ដែលក្រសួងសាធារណៈការ និងដឹកជញ្ជូនកំពុងស្ថាបនាផ្លូវឆ្លងកាត់រាជធានីភ្នំពេញ និងបណ្តាខេត្តចាប់ពីស្ពានព្រែកព្នៅ មហាវិថីឈ្នះ-ឈ្នះ (ផ្លូវកប់ស្រូវ) ផ្លូវជាតិលេខ៤ ត្រង់គីឡូម៉ែត្រលេខ១៤+១០៥ ទៅភ្ជាប់ផ្លូវជាតិលេខ១ ត្រង់គីឡូម៉ែត្រលេខ២៤+៨៤០ ដោយកាត់ផ្លូវជាតិលេខ២ លេខ៣ និងផ្លូវជាតិលេខ២១ ដែលគម្រោងសង់ផ្លូវក្រវាត់ក្រុងនេះនឹងបញ្ចប់នៅត្រឹមឆ្នាំ២០២១ខាងមុខនេះផងដែរ៕
