រដ្ឋាភិបាលលើកឡើងថា ចំណូលពន្ធគយក្នុងឆ្នាំ២០១៨កន្លងទៅ កម្ពុជាទទួលបានប្រមាណ១០ ទ្រីលានរៀល ឬស្មើនឹងជាង២ ៥០០លានដុល្លារអាមេរិក កើនលើសឆ្នាំ២០១៧ប្រមាណ៣២ភាគរយ។
ក្នុងសេចក្ដីប្រកាសព័ត៌មានចុះថ្ងៃទី២៧ ខែកុម្ភៈនេះ អគ្គនាយកដ្ឋានគយ និងរដ្ឋាករ ឲ្យដឹងថា ក្នុងឆ្នាំ២០១៨ ចំណូលពន្ធគយកើនឡើងលើវិស័យចំនួន៣ គឺពន្ធនាំចូលកើន១៨ភាគរយ អាករពិសេសកើន៤២,៤ភាគរយ និងអាករលើតម្លៃបន្ថែម (VAT) កើន៣០,៧ភាគរយ ហើយប្រភពចំណូលពន្ធធំជាងគេគឺយានយន្ត និងគ្រឿងចក្រដែលរួមចំណែកជិត៤៦ភាគរយនៃចំណូលពន្ធ ខណៈឥន្ធនៈ និងថាមពលរួមចំណែក ២០ភាគរយ ហើយទំនិញចម្រុះ និងគ្រឿងសំណង់សមាមាត្រប្រមាណជាង៣៤ភាគរយ។
ចំណូលពន្ធគយឆ្នាំ២០១៧ កម្ពុជាប្រមូលបានជាង៧ ៦៦២ប៊ីលានរៀល ដែលស្មើនឹងជិត២ពាន់លានដុល្លារអាមេរិក ហើយបើធៀបនឹងឆ្នាំ២០១៦ ចំណូលនេះមានកំណើនជាង១០ភាគរយ៕