អង្គភាពប្រឆាំងអំពើពុករលួយ បានប្រកាសបើកការស៊ើបអង្កេតទៅលើទ្រព្យសម្បត្តិរបស់មន្ត្រីនគរបាលម្នាក់ដែលបម្រើការងារនៅឯក្នុងខេត្តកណ្ដាល បន្ទាប់ពីរូបថតដែលត្រូវបានចែកចាយលើបណ្ដាញសង្គមហ្វេសប៊ុក បានលើកឡើងថា មន្ត្រីនគរបាលរូបនោះជូនបណ្ណាការតម្លៃរាប់សិបម៉ឺនដុល្លារដល់គូដណ្ដឹង។
អង្គភាពប្រឆាំងអំពើពុករលួយ បានប្រកាសឲ្យដឹងអំពីចំណាត់ការរបស់ខ្លួនទៅលើមន្ត្រីនគរបាលរូបនោះបែបនេះ នៅក្នុងសេចក្ដីជូនដំណឹងមួយរបស់ខ្លួនកាលពីថ្ងៃម្សិលមិញនេះ។
អង្គភាពប្រឆាំងអំពើពុករលួយ បានរៀបរាប់ក្នុងសេចក្ដីជូនដំណឹងនោះថា៖ «ចាប់ផ្ដើមស្រាវជ្រាវទ្រព្យសម្បត្តិ និងបំណុលលោកស្នងការរង ដូចគ្នានឹងលោក គឹម រស្មី ដែរ»។
វីអូឌី មិនអាចសុំការអត្ថាធិប្បាយពីប្រធានអង្គភាពប្រឆាំងអំពើពុករលួយ លោក ឱម យិនទៀង បានទេ ដោយទូរសព្ទចូលគ្មានអ្នកទទួល។
ប៉ុន្តែ ការប្រកាសស៊ើបអង្កេត ACU លើស្នងការរងខេត្តកណ្ដាល លោក ស្រេង សុខា នេះ ធ្វើឡើងក្រោយពីមានការចែករំលែកតាមបណ្ដាញសង្គមហ្វេសប៊ុក បន្ទាប់ពីស្នងការរងរូបនេះ បានភ្ជាប់ពាក្យជាមួយស្ត្រីម្នាក់ និងបានជូនថ្លៃបណ្ណាការចំនួន ១០ម៉ឺនដុល្លារ ចិញ្ជៀនពេជ្រ និងរថយន្ដលុច្សស៊ីស ៥៧០ មួយគ្រឿងដែលមានតម្លៃ ២២ម៉ឺនដុល្លារ។
វីអូឌី មិនទាន់អាចសុំការឆ្លើយតបពីស្នងការរងខេត្តកណ្ដាល លោក ស្រេង សុខា បាននៅឡើយទេ។
បើតាម ACU ឲ្យដឹងថា អង្គភាពនេះ ក៏បានបញ្ចប់ការស៊ើបអង្កេតអតីតមេញ្ជាការកងរាជអាវុធហត្ថខេត្តរតនគិរី លោក គឹម រស្មី និងភរិយា រួមទាំងកូនចំនួន ៣ នាក់ របស់លោករួចរាល់ហើយដែរ។
កាលពីថ្ងៃទី៩ ខែកុម្ភៈ ព្រះមហាក្រត្រចេញពីរាជក្រឹត្យលុបឈ្មោះអតីតមេញ្ជាការកងរាជអាវុធហត្ថខេត្តរតនគិរី ឧត្តមសេនីយត្រី(ផ្កាយ១) លោក គឹម រស្មី ចេញពីក្របខណ្ឌកងយោធពលខេមរភូមិន្ទ បន្ទាប់ពីមានការស្នើសុំរបស់លោកនាយករដ្ឋមន្ត្រី ហ៊ុន សែន។
ការស្នើសុំលុបលោក គឹម រស្មី ចេញពីក្របខណ្ឌកងយោធពលខេមរភូមិន្ទនេះ ធ្វើឡើងក្រោយពីមានសារសំឡេងបង្ហោះលើបណ្តាញសង្គម ថា លោក គឹម រស្មី បានចែកលុយ ១០ម៉ឺនដុល្លារ ឲ្យកូន ៥នាក់ ក្នុងពិធីខួបកំណើតរបស់ខ្លួន៕
