ប្រធានគណបក្សខ្មែរក្រោក អះអាងថា លោកនាយករដ្ឋមន្ត្រី ហ៊ុន សែន បានបញ្ជាផ្ទាល់មាត់ទៅអភិបាលខេត្តមណ្ឌលគិរី ឲ្យដកហូតយកភ្នំដោះក្រមុំមកទុកជាសម្បត្តិរដ្ឋវិញ ដោយថា មិនត្រូវឲ្យនរណារំលោភយកធ្វើជាកម្មសិទ្ធិនោះឡើយ។
ប្រធានគណបក្សខ្មែរក្រោក លោក សុខសុវណ្ណ វឌ្ឍនាសាប៊ុន ដែលជាសមាជិកនៃឧត្ដមក្រុមប្រឹក្សាពិគ្រោះ និងផ្ដល់យោបល់ បានប្រាប់វីអូឌីនៅថ្ងៃនេះថា ក្នុងកិច្ចប្រជុំជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់នាថ្ងៃទី២៨ ខែកុម្ភៈនេះ លោកនាយករដ្ឋមន្ត្រី ហ៊ុន សែន បានបញ្ជាផ្ទាល់មាត់ទៅអភិបាលខេត្តមណ្ឌលគិរីលោក ស្វាយ សំអៀង ដកភ្នំដោះក្រមុំមកគ្រប់គ្រងវិញនេះ។
ទាក់ទិនរឿងនេះ អ្នកនាំពាក្យខេត្តមណ្ឌលគិរី លោក សុខ សារ៉ា លើកឡើងថា ក្រោយពីមានបញ្ជានេះ លោកថា នៅថ្ងៃនេះ ខេត្តនឹងបើកកិច្ចប្រជុំ ដើម្បីធ្វើការដោះស្រាយ។
លោក សុខ សារ៉ា ថា៖ «ក្រោយពីបានប្រជុំថ្ងៃមិញហ្នឹង ខ្ញុំក៏បានប្រជុំដែរ។ អញ្ចឹងស្អែក លោក[អភិបាលខេត្ត]នឹងហៅគណៈកម្មការដោះស្រាយ ដើម្បីអនុវត្តអនុសាសន៍របស់សម្ដេច។ ស្អែកម៉ោង ៨ នឹងចាប់ផ្ដើមប្រជុំហើយ»។
កាលពីខែធ្នូ ឆ្នាំ២០១៨ ជនជាតិដើមភាគតិចពូនងនៅខេត្តមណ្ឌលគិរី បាននំាគ្នាឡើងមកភ្នំពេញ ដើម្បីស្វែងរកកិច្ចអន្តរាគមន៍ពីរដ្ឋមន្ត្រីក្រសួងរៀបចំដែនដី និងក្រសួងវប្បធម៌ ឲ្យជួយដោះស្រាយ ក្រោយពីអ្នកមានអំណាច និងពលរដ្ឋមួយចំនួនបានទៅបោះទីតាំង ទន្ទ្រានយកដីភ្នំដោះក្រមុំជាបន្តបន្ទាប់នោះ។
ភ្នំដោះក្រមុំ ដែលគ្រប់ដណ្ដប់លើដីទំហំ ១០២ហិកតា ស្ថិតនៅកណ្ដាលក្រុងសែនមនោរម្យ ស្ថិតក្នុងភូមិស្វាយចេក សង្កាត់សុខដុម ត្រូវបានរដ្ឋាភិបាលសម្រេចកាត់ទុកជាមជ្ឈមណ្ឌលវប្បធម៌ជនជាតិដើមភាគតិចកាលពីឆ្នាំ២០០៤៕