សាលារាជធានីភ្នំពេញ បានបកស្រាយឡើងវិញថា ខ្លួនមិនបានតម្រូវឲ្យម្ចាស់រោងចក្រសហគ្រាស ផ្លាស់ប្តូរទីតាំងអាជីវកម្មរបស់ពួកគេទៅជាយក្រុងនោះឡើយ ហើយចាត់ទុកសេចក្ដីជូនដំណឹងកន្លងទៅថាជាការតម្រង់ទិស ដើម្បីបញ្ចៀសការកកស្ទះ និងទប់ស្កាត់គ្រោះថ្នាក់ចរាចរណ៍ប៉ុណ្ណោះ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានឲ្យ VOD ដឹងនៅថ្ងៃនេះថា សាលារាជធានីភ្នំពេញបានជួបជាមួយសមាគមរោងចក្រកាត់ដេរនៅកម្ពុជា GMAC កាលពីថ្ងៃពុធម្សិលមិញនេះ បន្ទាប់ពីតំណាងរោងចក្រកាត់ដេរនៅកម្ពុជាមួយនេះ បានបង្ហាញក្ដីបារម្ភក្រោយពីសាលារាជធានី បានជូនដំណឹងទៅម្ចាស់រោងចក្រសហគ្រាសនានានៅរាជធានីភ្នំពេញ ឲ្យផ្លាស់ប្ដូរទីតាំងទៅតាមបណ្តោយខ្សែក្រវ៉ាត់ក្រុងទី៣វិញ ដើម្បីសម្រួលដល់ការកកស្ទះ។
លោក ម៉េតមាស ភក្តី អះអាងថា សាលារាជធានីបានបំភ្លឺទៅភាគីពាក់ពាក់ព័ន្ធថា មិនមានផែនការណាមួយតម្រូវឲ្យម្ចាស់រោងចក្រ សហគ្រាសណាមួយ ត្រូវផ្លាស់ប្តូរទីតាំងទេ ប៉ុន្តែ លោកថា កិច្ចប្រជុំបានព្រមព្រៀងគ្នា បង្កើតក្រុមការងារចម្រុះមួយ ដើម្បីជួយសម្របសម្រួលបញ្ហានេះ។
លោក ម៉េត មាសភក្តី មានប្រសាសន៍ថា៖ «រដ្ឋបាលរាជធានីភ្នំពេញពុំមានកំណត់ ឬឲ្យធ្វើការរុះរើទីតាំងរោងចក្រ សហគ្រាស ឃ្លាំងទំនិញអីផ្សេងៗ ដែលកំពុងតែដំណើរការនៅក្នុងរាជធានីភ្នំពេញ ក្នុងខណ្ឌ ក្នុងក្រុងភ្នំពេញនេះ ទៅទីតាំងណាមួយទេ គឺបន្តប្រក្រតីភាពនៃចង្វាក់ផលិតកម្មសំដៅធ្វើម៉េចការងារឧស្សាហកម្ម ដែលរកទទួលទានហ្នឹងឲ្យបានជាធម្មតា»។
ក្នុងសេចក្តីជូនដំណឹងចុះថ្ងៃទី២៦ ខែកុម្ភៈ សាលារាជធានីភ្នំពេញបានលើកឡើងថា ចំណុចអាទិភាព គឺដោះស្រាយបញ្ហាកកស្ទះ និងគ្រោះថ្នាក់ចរាចរណ៍ ហើយថា បញ្ហានេះមួយចំណែកកើតឡើងពីកំណើនយានយន្តគ្រប់ប្រភេទ រោងចក្រ សហគ្រាសឃ្លាំងស្តុបទំនិញ និងយានដ្ឋានជួសជុលរថយន្តធំៗជាដើម។
រដ្ឋបាលសាលារាជធានីបានជូនដំណឹងថា៖ «ដើម្បីឲ្យសាលារាជធានីភ្នំពេញរក្សាបាននូវសុវត្ថិភាពសណ្តាប់ធ្លាប់ និងរបៀបរៀបរយសាធារណៈ ព្រមទាំងបញ្ចៀសបានការកកស្ទះចរាចរណ៍ និងកាត់បន្ថយគ្រោះថ្នាក់ចរាចរណ៍ រដ្ឋបាលរាជធានីភ្នំពេញ សូមស្នើរបងប្អូនប្រជាពលរដ្ឋ ម្ចាស់រោងចក្រសហគ្រាស ឃ្លាំងស្តុបទំនិញ និងយានដ្ឋានជួសជុលរថយន្តធំៗ ដែលមានទីតាំងស្ថិតនៅក្នុងតំបន់ទីប្រជុំជន ក្នុងរាជធានីភ្នំពេញទាំងអស់ រៀបចំផ្លាស់ប្តូរទីតាំងអាជីវកម្មរបស់ខ្លួន ឲ្យទៅស្ថិតនៅផ្លូវក្រវ៉ាតក្រុងទី៣ ដែលក្រសួងសាធារណការ និងដឹកជញ្ជូនកំពុងស្ថាបនា ឆ្លងកាត់ភ្នំពេញ និងខេត្តកណ្តាល»៕
