របាយការណ៍អន្ដរជាតិមួយបន្ដចាត់ថ្នាក់កម្ពុជាជាប្រទេសមានប្រព័ន្ធយុត្ដិធម៌ទន់ខ្សោយបំផុត ប៉ុន្ដែ មន្ដ្រីជាន់ខ្ពស់រដ្ឋាភិបាល បានហៅរបាយការណ៍នេះថា មានចរឹតនយោបាយ។
អង្គការគម្រោងយុត្តិធម៌ពិភពលោក (World Justice Project) បានចេញផ្សាយរបាយការណ៍ស្ដីពី «សន្ទស្សន៍និតីរដ្ឋសម្រាប់ឆ្នាំ២០១៩» នៅថ្ងៃនេះ ដោយបន្ដចាត់ថ្នាក់កម្ពុជា ជាប្រទេសមានប្រព័ន្ធយុត្តិធម៌ស្ទើរតែអន់ជាងបំផុតនៅលើពិភពលោក។
បើតាមតារាងសន្ទស្សន៍ចេញដោយអង្គការមួយនេះ កម្ពុជាត្រូវបានវាយតម្លៃនៅចំណាត់ថ្នាក់១២៥ ក្នុងចំណោមបណ្ដាប្រទេស ១២៦ ពោលគឺកម្ពុជាល្អជាងតែប្រទេសវេណេស៊ុយអេឡាតែមួយប៉ុណ្ណោះ។
ចំណែកប្រទេសចំនួន៣ដែលទទួលបានចំណាត់ល្អបំផុតនៅក្នុងរបាយការណ៍យុត្ដិធម៌នេះ គឺមាន ដាណឺម៉ាក ន័រវេស និងប្រទេសហ្វាំងឡង់ សុទ្ធតែជាប្រទេសស្ថិតនៅតំបន់អឺរ៉ុប។
របាយការណ៍អង្គការអន្ដរជាតិនេះ បានផ្ដល់ពិន្ទុទាបដល់កម្ពុជាក្នុងសូចនាករមួយចំនួន ដូចជា ការទប់អំណាចរបស់រដ្ឋាភិបាល អំពើពុករលួយ តម្លាភាពរបស់រដ្ឋាភិបាល សិទ្ធិសេរីភាពមូលដ្ឋាន សណ្ដាប់ធ្នាប់ និងសន្ដិសុខ ការអនុវត្តច្បាប់ យុត្តិធម៌សង្គម និងយុត្តិធម៌ផ្នែកព្រហ្មទណ្ឌ។
អ្នកនាំពាក្យក្រសួងយុត្ដិធម៌ លោក ជិន ម៉ាលីន ចាត់ទុករបាយការណ៍នេះថា មានលក្ខណៈនយោបាយ និងមិនមានលក្ខណៈវិទ្យាសាស្ដ្រនោះទេ។ លោកថា អង្គការមួយនេះមើលតែទៅលើករណីរំលាយគណបក្សប្រឆាំង ដែលថា ជាចំណាត់ការផ្លូវច្បាប់របស់តុលាការកម្ពុជា។
លោក ជិន ម៉ាលីន មានប្រសាសន៍បន្ដថា៖ «បើយើងសន្និដ្ឋានពីសូចនាករដែលគាត់ប្រើ ពីវិធីសាស្ដ្រគាត់វាយតម្លៃ ខ្ញុំអាចសន្និដ្ឋានបានថា វិធីសាស្ដ្រនេះមិនមានលក្ខណៈវិទ្យាសាស្ដ្រនោះទេ ដោយថា គាត់ផ្ដោតតែទៅលើបរិបទនយោបាយ។ គាត់កំណត់ថា អ្វីដែលកើតឡើងទៅលើក្រុមបក្សនយោបាយ សង្គមស៊ីវិលដែលប្រឆាំង គឺជាការបំពានសិទ្ធិសេរីភាព បំពាននីតិរដ្ឋ បំពានអំណាចរដ្ឋ ការពិតនេះជាការអនុវត្តច្បាប់»។
ប្រធានផ្នែកស៊ើបអង្កេតរបស់អង្គការលីកាដូ លោក អំ សំអាត យល់ស្របជាមួយនឹងរបាយការណ៍ដែលចេញដោយអង្គការគម្រោងយុត្តិធម៌ពិភពលោកនេះ។ លោកសង្កេតឃើញថា ស្ថាប័នតុលាការមិនទាន់មានឯករាជ្យភាពពេញលេញ និងធានាយុត្តិធម៌ជូនពលរដ្ឋរងគ្រោះនោះទេ។
លោក អំ សំអាត បន្ដថា៖ «បើយើងមើលទៅវិស័យយុត្ដិធម៌ និងប្រព័ន្ធតុលាការវិញ ពីព្រោះគេតែងតែលើកឡើងថា ប្រព័ន្ធតុលាការយើងមិនទាន់មានភាពឯករាជ្យ ហើយវាមិនមែនជាជំនឿទុកចិត្តសម្រាប់ប្រជាពលរដ្ឋ គេឃើញប្រជាពលរដ្ឋក្រីក្រភាគច្រើនជួបបញ្ហារឿងដីធ្លីហ្នឹង ប្រជាពលរដ្ឋរងភាពអយុត្តិធម៌ច្រើន។ ហើយគេឃើញមានអំពើពុករលួយកើតឡើង។ ហើយ២ឆ្នាំកន្លងមកនេះ ទាក់ទងនឹងសិទ្ធិសេរីភាពក្នុងការបញ្ចេញមតិ និងជួបជុំ គឺវាមានការធ្លាក់ចុះយ៉ាងខ្លាំង»។
ក្នុងរបាយការណ៍«សន្ទស្សន៍នីតិរដ្ឋសម្រាប់ឆ្នាំ២០១៧ និង២០១៨» ដែលចេញផ្សាយកាលពីចុងខែមករាឆ្នាំមុននោះ អង្គការគម្រោងយុត្តិធម៌ពិភពលោក ក៏បានចាត់ថ្នាក់កម្ពុជានៅលេខរៀងស្ទើតែចុងក្រោយគេ ពោលគឺនៅចំណាត់ថ្នាក់ទី១១២ ក្នុងចំណោមប្រទេស១១៣ នៅលើពិភពលោក។
បើធៀបជាមួយបណ្ដាប្រទេសនៅក្នុងតំបន់ កម្ពុជានៅស្ថិតនៅបាតតារាងក្នុងចំណោមប្រទេសចំនួន១៥ នៅតំបន់អាស៊ីខាងកើត និងតំបន់ប៉ាស៊ីហ្វិក៕
