សមាជិកថ្នាក់ដឹកនាំមួយរូបនៃអតីតបក្សប្រឆាំង ដែលទើបទទួលបានសិទ្ធិធ្វើនយោបាយឡើងវិញនោះ លោកបានស្នើសុំសិទ្ធិធ្វើនយោបាយឡើងវិញ ទៅតាមឆន្ទៈរបស់លោក និងមិនរងសម្ពាធនយោបាយនោះឡើយ។
លោក ស៊ីម សុវណ្ណនី ឬហៅ ស៊ីម វ៉ាន់នី ត្រូវបានព្រះមហាក្សត្រព្រះរាជទាននីតិសម្បទាន ឲ្យធ្វើនយោបាយឡើងវិញកាលពីថ្ងៃម្សិលមិញនេះ ទៅតាមការស្នើសុំពីលោកនាយករដ្ឋមន្ត្រី ហ៊ុន សែន។
ថ្លែងប្រាប់ VOD តាមទូរស័ព្ទនៅរសៀលថ្ងៃអាទិត្យនេះ លោក ស៊ីម សុវណ្ណនី បានអះអាងថា លោកសម្រេចស្នើសុំសិទ្ធិធ្វើនយោបាយឡើងវិញ ទៅតាមឆន្ទៈរបស់លោក ហើយលោកចាត់ទុកថា នេះគឺជាច្រកចេញមួយសម្រាប់ដំណោះស្រាយនយោបាយ។
លោក ស៊ីម សុវណ្ណនី មានប្រសាសន៍៖ «ហើយខ្ញុំធ្វើនេះ គ្រាន់តែចង់បង្ហាញដើម្បីឲ្យថ្នាក់ដឹកនាំគាត់ងាកមកវិញ ដើម្បីរកតុចរចា កុំយកខ្មែរណាជាសត្រូវ។ បើសិនជារដ្ឋាភិបាលគាត់បន្ទន់ឥរិយាបថ ហើយខាងគណបក្សប្រឆាំងមានការបន្ទន់ឥរិយាបថតិច អញ្ចឹង អន្ដរជាតិគេនឹងលុបចោលការដាក់ទណ្ឌកម្មមកវិញអញ្ចឹងណាស់»។
យ៉ាងណាក៏ដោយ លោក ស៊ីម សុវណ្ណនី ប្រាប់ VOD ទៀតថា លោកគ្មានគម្រោងបង្កើតគណបក្សនយោបាយថ្មី ដើម្បីប្រកួតប្រជែងការបោះឆ្នោតនៅពេលខាងមុខនោះទេ។
លោក ស៊ីម សុវណ្ណនី គឺស្ថិតនៅលេខរៀងទី ៤៤ នៃបញ្ជីថ្នាក់ដឹកនាំ ១១៨រូបរបស់គណបក្សសង្គ្រោះជាតិ ដែលត្រូវបានតុលាការកំពូលសម្រេចហាមឃាត់សិទ្ធិនយោបាយរយៈពេល ៥ឆ្នាំ បន្ទាប់ពីតុលាការកំពូលបានសម្រេចរំលាយគណបក្សប្រឆាំងមួយនេះ។
លោក ស៊ីម សុវណ្ណនី គឺជាថ្នាក់ដឹកនាំទី៣ នៃគណបក្សប្រឆាំង ដែលបានទទួលបានសិទ្ធិធ្វើនយោបាយឡើងវិញ បន្ទាប់ពីការស្នើសុំសិទ្ធិធ្វើនយោបាយឡើងវិញរបស់លោក គង់ គាំ អតីតទីប្រឹក្សាជាន់ខ្ពស់គណបក្សសង្គ្រោះជាតិ និងកូនប្រុសលោក គឺលោក គង់ បូរ៉ា អតីតតំណាងរាស្ត្របក្សប្រឆាំង កាលពីពាក់កណ្ដាលខែមករាកន្លងមកនេះ។
ថ្នាក់ដឹកនាំទាំង ៣រូបរបស់គណបក្សប្រឆាំងមួយនេះ បានទទួលសិទ្ធិធ្វើនយោបាយឡើងវិញ បន្ទាប់ពីរដ្ឋសភាដែលគ្រប់គ្រងដោយសមាជិកសភាគណបក្សប្រជាជនកម្ពុជាទាំងអស់នោះ បានកែប្រែច្បាប់នយោបាយកាលពីថ្ងៃទី១៣ ខែធ្នូឆ្នាំមុន ដើម្បីបើកផ្លូវឲ្យថ្នាក់ដឹកនាំទាំង ១១៨រូបគណបក្សសង្គ្រោះជាតិ ដែលត្រូវបានហាមឃាត់សិទ្ធិនយោបាយនោះ អាចស្នើសុំសិទ្ធិធ្វើនយោបាយឡើងវិញ។
បើទោះបីជាច្បាប់ស្ដីពីគណបក្សនយោបាយត្រូវបានកែប្រែបែបនេះក្ដី ប៉ុន្តែ លោកនាយករដ្ឋមន្ត្រី ហ៊ុន សែន បានថ្លែងជាសាធារណៈថា ថ្នាក់ដឹកនាំគណបក្សប្រឆាំងទាំង ១១៨រូប ត្រូវតែដាក់ពាក្យស្នើសុំទៅព្រះមហាក្សត្រតាមរយៈរូបលោក មុននឹងទទួលបានសិទ្ធិធ្វើនយោបាយឡើងវិញ។
ទោះជាយ៉ាងណា ក្រសួងមហាផ្ទៃបានក្រើនរំឭកជាថ្មីម្ដងទៀតកាលពីថ្ងៃទី២១ ខែកុម្ភៈ ឲ្យអតីតថ្នាក់ដឹកនាំបក្សប្រឆាំង ដាក់ពាក្យស្នើសុំសិទ្ធិធ្វើនយោបាយឡើងវិញ បន្ទាប់ពីមានតែថ្នាក់ដឹកនាំតែ ២រូបប៉ុណ្ណោះរបស់អតីតបក្សប្រឆាំង បានដាក់ពាក្យស្នើសុំសិទ្ធិធ្វើនយោបាយឡើងវិញ ចាប់តាំងពីការកែប្រែច្បាប់នយោបាយកាលខែធ្នូឆ្នាំមុននោះ។
គណបក្សសង្គ្រោះជាតិ ដែលកាន់កាប់អាសនៈសភាចំនួន ៥៥ នៅក្នុងការបោះឆ្នោតកាលពីឆ្នាំ២០១៣ និងកាន់កាប់អាសនៈក្រុមប្រឹក្សាឃុំសង្កាត់ចំនួន ៥០០៧ នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់កាលពីឆ្នាំ២០១៧កន្លងមកនោះ ត្រូវបានតុលាការកំពូលសម្រេចរំលាយចោល ហើយអាសនៈជាប់ឆ្នោតទាំងអស់ ត្រូវបានដកហូត និងបែងចែកទៅឲ្យគណបក្សនយោបាយផ្សេងដែលមិនឈ្នះការបោះឆ្នោតទាល់តែសោះ។
គណបក្សប្រឆាំងដ៏ធំមួយនេះ ក៏មិនត្រូវបានអនុញ្ញាតឲ្យចូលរួមក្នុងការបោះឆ្នោតជាតិកាលពីចុងខែកក្កដាកន្លងមកដែរ ដែលការបោះឆ្នោតនោះបានផ្ដល់ជ័យជម្នះទាំងស្រុងទៅគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន។
សហគមន៍អន្តរជាតិនាំមុខដោយសហរដ្ឋអាមេរិក និងសហគមន៍អឺរ៉ុប បានថ្កោលទោសការបោះឆ្នោតនោះ និងមិនទទួលស្គាល់លទ្ធផលនៃការបោះឆ្នោតទៀតផង ហើយពួកគេបានចាត់វិធានការមួយចំនួនមកលើកម្ពុជាផងដែរ៕