ប្រទេសកម្ពុជាបានចាប់ផ្ដើមដំណើរការធ្វើជំរឿនស្ថិតិប្រជាជនរបស់ខ្លួននៅថ្ងៃអាទិត្យនេះ ដែលជាជំរឿនលើកទី៣ នៅក្នុងរយៈពេល ២០ឆ្នាំចុងក្រោយមកនេះ។
បើតាមប្រតិទិនរបស់វិទ្យាស្ថានស្ថិតិជាតិ កម្ពុជាកំពុងរៀបចំដំណើរការធ្វើជំរឿនប្រជាជនរបស់ខ្លួនរយៈពេល ១១ថ្ងៃ ចាប់ពីថ្ងៃទី០៣ រហូតដល់ថ្ងៃទី១៣ ខែមីនា ឆ្នាំ២០១៩នេះ។
ក្នុងសេចក្ដីថ្លែងការណ៍កាលពីខែមករាកន្លងមក លោកនាយករដ្ឋមន្ត្រី ហ៊ុន សែន បានអំពាវនាវទៅដល់ពលរដ្ឋទូទាំងប្រទេស ឲ្យចូលរួមផ្ដល់ព័ត៌មានដល់មន្ត្រីចុះធ្វើជំរឿន ដោយថា ដំណើរការជំរឿននេះ មិនពាក់ព័ន្ធនឹងបញ្ហានយោបាយនោះឡើយ។
លោក ហ៊ុន សែន បញ្ជាក់បន្ថែមទៀតថា ជំរឿនស្ថិតិប្រជាជននេះ ក៏នឹងមិនធ្វើឲ្យប្រជាជនខាតបង់ប្រាក់កាសផងដែរ ប៉ុន្តែ ដើម្បីអនាគតរបស់ប្រជាជនកម្ពុជា។
កម្ពុជាបានរៀបចំជំរឿនស្ថិតិប្រជាជនចំនួន ២លើករួចមកហើយ នៅក្នុងរយៈពេល ២០ឆ្នាំចុងមកនេះ។
ជំរឿនលើកដំបូងនៅឆ្នាំ១៩៩៨ បានរកឃើញថា ប្រជាជនកម្ពុជាមានចំនួនជាង ១១លាននាក់ ដោយក្នុងនោះពលរដ្ឋដល់ទៅជាង ៩.៦លាននាក់ រស់នៅតាមតំបន់ជនបទនៃប្រទេសកម្ពុជា។
ចំណែកឯជំរឿនលើកទីនៅឆ្នាំ២០០៨ បានរកឃើញថា ប្រជាជនកម្ពុជាបានកើនឡើងដល់ចំនួនជាង ១៣លាននាក់ ក្នុងនោះប្រជាជនជាង ៥០ភាគរយ គឺជាស្ត្រី ហើយប្រជាជនដល់ទៅជាង ១០.៧៨លាននាក់ រស់នៅតាមតំបន់ជនបទ។
តួលេខរបស់ធនាគារពិភពលោក បង្ហាញថា ចំនួនប្រជាជនកម្ពុជា ត្រូវបានប៉ាន់ប្រមាណថា មានចំនួនជាង ១៦លាននាក់នៅឆ្នាំ២០១៧កន្លងមកនេះ៕
