អតីតបក្សប្រឆាំង បានទាមទារជាថ្មីម្ដងទៀតឲ្យរដ្ឋាភិបាលដឹកនាំដោយបក្សកាន់អំណាចនាពេលសព្វថ្ងៃ ដោះលែងលោក កឹម សុខា បន្ទាន់ ដោយថា លោកបានជាប់ឃុំឃាំងទាំងអយុត្ដិធម៌អស់រយៈពេលជាង ១ឆ្នាំមកហើយ។
អតីតគណបក្សសង្គ្រោះជាតិបានចេញសេចក្ដីថ្លែងការណ៍មួយនៅថ្ងៃនេះថា គិតត្រឹមថ្ងៃទី៣ ខែមីនានេះ លោក កឹម សុខា ត្រូវបានគេចាប់ឃុំឃាំងទាំងអយុត្តិធម៌អស់រយៈពេល ១៨ខែមកហើយ និងទាមទារឲ្យដោះលែងលោក កឹម សុខា ជាបន្ទាន់ និងគ្មានលក្ខខណ្ឌអ្វីទាំងអស់។
ក្នុងសេចក្ដីថ្លែងការណ៍ដដែលនេះ អតីតគណបក្សសង្គ្រោះជាតិក៏ស្នើទៅឲ្យសហគមន៍អន្ដរជាតិ ឲ្យចាត់វិធានការបន្ថែមទៀត ដើម្បីជំរុញឲ្យរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន ស្ដារលទ្ធិប្រជាធិបតេយ្យ និងគោរពសិទ្ធិមនុស្សឡើងវិញ។
កាលពីថ្ងៃទី១១ ខែកុម្ភៈកន្លងមក សហភាពអឺរ៉ុបបានប្រកាសពីការចាប់ផ្ដើមនីតិវិធីដែលឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជា បន្ទាប់ពីមើលឃើញការធ្លាក់ចុះនៃលទ្ធិប្រជាធិបតេយ្យ បញ្ហាសិទ្ធិមនុស្ស និងនិតិរដ្ឋនៅក្នុងរយៈពេល ១៨ខែចុងក្រោយមកនេះ។
មិនប៉ុន្មានថ្ងៃក្រោយចំណាត់ការរបស់អឺរ៉ុបនេះ សហរដ្ឋអាមេរិក តាមរយៈស្ថានទូតរបស់ខ្លួនប្រចាំនៅកម្ពុជា បានបង្ហោះរូបថតរបស់អតីតមេដឹកនាំគណបក្សប្រឆាំង លោក កឹម សុខា ហើយរៀបរាប់ថា លោកត្រូវបានគេចាប់ឃុំឃាំងអស់រយៈពេលជាង ១ឆ្នាំដោយ «អយុត្តិធម៌» និងគ្មានភស្ដុតាងណាមួយសោះ។
ប៉ុន្ដែ ក្រសួងការបរទេសកម្ពុជាបានចេញសេចក្ដីថ្លែងការណ៍សម្ដែងនូវការខកចិត្ត ដោយចាត់ទុកសកម្មភាពនេះថា «មិនមានលក្ខណៈការទូត» និង «មិនគោរពអធិបតេយ្យរបស់កម្ពុជា»។
ចំណែកក្រសួងយុត្ដិធម៌ក៏បានចេញមុខបកស្រាយករណីនេះផងដែរថា លោក កឹម សុខា ត្រូវព្រះរាជអាជ្ញាដោះលែងឲ្យនៅក្រៅឃុំតាំងពី ៦ខែមុនមកម៉្លេះ ពោលគឺនៅពេលលោកត្រូវបានគេផ្ទេរពីការជាប់ឃុំឃាំងក្នុងពន្ធនាគារត្រពាំងផ្លុង ខេត្តត្បូងឃ្មុំ មកជាការជាប់ឃុំនៅក្នុងផ្ទះវិញ កាលពីដើមខែកញ្ញា ឆ្នាំ២០១៨នោះ។
លោក កឹម សុខា ត្រូវបានសមត្ថកិច្ចចាប់ខ្លួនទាំងយប់កាលពីដើមខែកញ្ញា ឆ្នាំ២០១៧ ដោយត្រូវបានរដ្ឋាភិបាលចោទថា បានឃុបឃិតជាមួយសហរដ្ឋអាមេរិក ចង់ផ្តួលរំលំរដ្ឋាភិបាល។ មេដឹកនាំបក្សប្រឆាំងរូបនេះ ត្រូវបានសមត្ថកិច្ចបញ្ជូនទៅឃុំខ្លួនបណ្តោះអាសន្ននៅពន្ធនាគារត្រពាំងផ្លុងជាប់ព្រំដែនវៀតណាមអស់រយៈពេលជិត ១ឆ្នាំ ទើបបញ្ជូនមកឃុំខ្លួនក្នុងផ្ទះវិញ នៅរាជធានីភ្នំពេញ៕
