របាយការណ៍អគ្គនាយកដ្ឋានអន្តោប្រវេសន៍ បានឲ្យដឹងថា សមត្ថកិច្ចកម្ពុជាបានដកហូតឯកសាររដ្ឋបាលមិនប្រក្រតីដែលកាន់កាប់ដោយជនបរទេសដល់ទៅជាង ៣ម៉ឺន ៥ពាន់ច្បាប់ ហើយក៏បានផ្ដល់ប័ណ្ណស្នាក់នៅអចិន្ត្រៃយ៍ជិត ២ម៉ឺនសន្លឹកដល់ជនបរទេសផងដែរ។
របាយការណ៍អគ្គនាយកដ្ឋានអន្តោប្រវេសន៍ ដែលត្រូវបានផ្សព្វផ្សាយក្នុងពិធីបូកសរុបលទ្ធផលការងារប្រចាំឆ្នាំ២០១៨ និងលើកទិសដៅការងារឆ្នាំ២០១៩នៅថ្ងៃនេះ បានឲ្យដឹងថា សមត្ថកិច្ចកម្ពុជាបានចាប់ខ្លួនជនបរទេសដល់ទៅ ១៧៧នាក់ ក្នុងនោះជនជាតិវៀតណាមដល់ទៅ ១៣៤នាក់ ត្រូវបានសមត្ថកិច្ចចាប់ខ្លួន នៅក្នុងការបង្ក្រាបដល់ទៅ ៧៧លើក ក្រោយពីពួកគេបានស្នាក់នៅ និងធ្វើការខុសច្បាប់នៅកម្ពុជា។
របាយការណ៍ដដែលនេះ បានឲ្យដឹងទៀតថា សមត្ថកិច្ចកម្ពុជាបានសម្រេចផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ដល់ទៅជាង ៥ម៉ឺន ៧ពាន់នាក់ (៥៧,៤៤៤)កាលពីឆ្នាំមុន។
របាយការណ៍ដដែលឲ្យដឹងផងដែរថា អាជ្ញាធរកម្ពុជាបានប្រកាសទទួលស្គាល់ជនបរទេសជាង ៤ម៉ឺន ៦ពាន់នាក់ (៤៦,៣៨១នាក់) ឬស្មើនឹងជាង ១ម៉ឺន ៤ពាន់គ្រួសារ (១៤,៤៤៩គ្រួសារ) បន្ទាប់ពីជនបរទេសដល់ទៅជាង ៧ម៉ឺន ៥ពាន់នាក់ (៧៥,០៨៩នាក់) ក្នុងរយៈពេលពេញ១ឆ្នាំ២០១៨កន្លងមកនេះ។
របាយការណ៍របស់អគ្គនាយកដ្ឋានអន្តោប្រវេសន៍ចេញផ្សាយកាលពីឆ្នាំ២០១៧ បានឲ្យដឹងថា លទ្ធផលនៃការជំរឿនបានរកឃើញថា ជនបរទេសសរុប ៤៦ ៧៧៦គ្រួសារ ឬស្មើនឹងចំនួនមនុស្ស ១៧៦ ៨១២នាក់ ក្នុងនោះស្រីចំនួន ៧៩ ៧២៨នាក់ កំពុងស្នាក់នៅក្នុងប្រទេសកម្ពុជា។
របាយការណ៍ដដែលថា ក្នុងចំណោមជនបរទេសទាំងនោះ មានជនបរទេសអន្តោប្រវេសន៍ ៧៣,៣៩៧នាក់ ក្នុងនោះមានស្រី ៣៥ ៨៨៨នាក់ មាន ៥សញ្ជាតិ ដែលកំពុងកាន់កាប់ប្រើប្រាស់ឯកសាររដ្ឋបាលមិនប្រក្រតី៕
