ក្រសួងរ៉ែ និងថាមពល សម្រេចព្យួរអាជ្ញាប័ណ្ណក្រុមហ៊ុនអាជីវកម្មចំនួន៦ នៅស្រុកភ្នំស្រួច ខេត្តកំពង់ស្ពឺ ចំនួន១សប្ដាហ៍ ដោយថា ជាការព្រមានដែលពួកគេមិនគោរពតាមការណែនាំរបស់ក្រសួង។
យោងតាមការចុះផ្សាយលើទំព័រហ្វេសបុករបស់ក្រសួងរ៉ែ និងថាមពល ដែលចេញនៅថ្ងៃនេះ ក្រុមហ៊ុនទាំង៦ ដែលក្រសួងព្យួរអាជ្ញាប័ណ្ណនោះ មាន២ជាក្រុមហ៊ុនរ៉ែថ្មសំណង់ ១ជាក្រុមហ៊ុនបូមខ្សាច់បក និង៣ជាក្រុមហ៊ុនបូមខ្សាច់ស្ទឹង។
ក្រសួង សរសេរថា៖ « ក្រុមហ៊ុនចំនួន០៦ ពុំបានគោរពតាមស្មារតីនៃអង្គប្រជុំណែនាំ ពិសេសសារាចរណែនាំរបស់ក្រសួងពាក់ព័ន្ធនឹងការធ្វើអាជីវកម្មរ៉ែ ដូច្នេះក្រសួងបានសម្រេចព្យួរអាជ្ញាប័ណ្ណរយៈពេល១សបា្តហ៍ ជាការព្រមាន និងអាចឈានដល់ការបញ្ចប់អាជ្ញាប័ណ្ណតែម្តងក្នុងករណីមិនរាងចាល » ។
បើតាមក្រសួងរ៉ែ និងថាមពល មុននឹងឈានដល់ការសម្រេចព្យួរអាជ្ញាប័ណ្ណនេះ គឺក្រុមអធិការកិច្ចក្រសួងធ្លាប់ប្រជុំណែនាំពីការអនុវត្តគោលការណ៍ការយករ៉ែដល់ក្រុមហ៊ុនទាំង៦នេះ និងក្រុមហ៊ុនផ្សេងទៀតក្នុងខេត្តចំនួនពីរដងរួចមកហើយកាលពីខែមុន និងដើមខែមីនានេះ៕
