ភរិយាអ្នកបកប្រែភាសាឲ្យសារព័ត៌មានរុស្សី (RT) សង្ឃឹមទទួលបានយុត្តិធម៌ ទោះមិនមានការឆ្លើយតបពីរដ្ឋាភិបាលរុស្ស៊ី និងរដ្ឋាភិបាលកម្ពុជាក៏ដោយ ព្រោះអ្នកស្រីថា សាធារណជនបានដឹងរឿងទាំងនេះកាន់តែច្រើន។
អ្នកស្រី ឡុង គីមហ៊ាង និងសាច់ញាតិប្រមូលផ្តុំនៅមុខស្ថានទូតរុស្ស៊ីនៅក្នុងរាជធានីភ្នំពេញនៅថ្ងៃនេះ គឺជាការប្រផ្តុំលើកទី៨ ប៉ុន្តែ អ្នកស្រីថា មិនមានការឆ្លើយតបណាមួយពីរដ្ឋាភិបាលរុស្ស៊ីមករដ្ឋាភិបាលកម្ពុជានោះទេ។ គ្រួសារលោក រត្នមុនី អះអាងថា វិធានការរបស់រដ្ឋាភិបាលនេះ ធ្វើឡើងដោយអយុត្តិធម៌ប្រឆាំងអ្នកផ្សព្វផ្សាយព័ត៌មានពិតពីកម្ពុជា។
ទោះជាការប្រមូលផ្តុំនេះមិនមានការឆ្លើយតប ប៉ុន្តែ អ្នកស្រី ឡុង គីមហ៊ាង បង្ហាញការជឿជាក់ថា រឿងនេះបានដឹងដល់អ្នកនយោបាយ និងសាធារណជនកាន់តែច្រើន ដែលអាចជំរុញឲ្យស្វាមីអ្នកស្រីទទួលបានយុត្តិធម៌មិនខាន។
អ្នកស្រី ឡុង គីមហ៊ាង៖ «នៅពេលដែលសាធារណជន នៅពេលដែលអ្នកនយោបាយដឹងរឿងរបស់ប្តីខ្ញុំ មានប្រយោជន៍ណាស់ ព្រោះអ្នកនយោបាយ និងសាធារណជនអាចជួយជំរុញឲ្យមាននយុត្តិធម៌នៅក្នុងសង្គម និងជួយឲ្យប្តីខ្ញុំមានយុត្តិធម៌។»
មេដឹកនាំសហព័ន្ធសហជីពសំណង់កម្ពុជា លោក រ៉ាត់ រត្នមុនី ត្រូវបានសមត្ថកិច្ចថៃចាប់ខ្លួន និងបញ្ជូនមកកម្ពុជាតាមសំណើរបស់សមត្ថកិច្ចកម្ពុជាកាលពីថ្ងៃទី១៣ ខែធ្នូ ឆ្នាំមុន ពាក់ព័ន្ធនឹងការចូលរួមផលិតភាពយន្តឯកសារ «ម្ដាយខ្ញុំលក់ខ្ញុំ» របស់សារព័ត៌មានរុស្ស៊ីថ្ងៃនេះ (RT)។
លោក រត្នមុនី ត្រូវបានតុលាការរាជធានីភ្នំពេញចោទប្រកាន់ពីបទ ញុះញង់ធ្វើឲ្យមានការរើសអើង ហើយត្រូវបានបញ្ជូនទៅឃុំខ្លួននៅពន្ធនាគារព្រៃស។
អង្គការគម្រោងយុត្តិធម៌ពិភពលោក (World Justice Project) បានចេញផ្សាយរបាយការណ៍ស្ដីពី «សន្ទស្សន៍និតីរដ្ឋសម្រាប់ឆ្នាំ២០១៩» នៅថ្ងៃនេះ ដោយបន្ដចាត់ថ្នាក់កម្ពុជា ជាប្រទេសមានប្រព័ន្ធយុត្តិធម៌ស្ទើរតែអន់ជាងបំផុតនៅលើពិភពលោក។
បើតាមតារាងសន្ទស្សន៍ចេញដោយអង្គការមួយនេះ កម្ពុជាត្រូវបានវាយតម្លៃនៅចំណាត់ថ្នាក់១២៥ ក្នុងចំណោមបណ្ដាប្រទេស ១២៦ ពោលគឺកម្ពុជាល្អជាងតែប្រទេសវេណេស៊ុយអេឡាតែមួយប៉ុណ្ណោះ។
អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន បានថ្លែងទៅកាន់ ព្រះសង្ឃ សិស្សនិស្សិតជាច្រើនអង្គនិងនាក់ ក្នុងពិធីមួយកាលពីថ្ងៃទី១៨ ខែមករា ឆ្នាំ២០១៩ ថា តុលាការមានតួនាទីពីរ គឺ តួនាទីផ្នែករដ្ឋបាល និងតួនាទីនៃការសម្រេចសេចក្តី។ លោកបញ្ជាក់ថា អំណាចនៃការសម្រេចសេចក្តី គឺធ្វើឡើងទៅតាមផ្លូវច្បាប់ ដោយមិនរងសម្ពាធពីស្ថាប័នណាមួយឡើយ។
