លោកនាយករដ្ឋមន្ត្រី ហ៊ុន សែន បង្ហើបថា ស្ត្រីជាទណ្ឌិតមួយចំនួន អាចនឹងត្រូវបានលើកលែងទោស ក្រោមកិច្ចអន្តរាគមន៍ផ្លូវច្បាប់ពីក្រុមមេធាវីរបស់លោក។
ការថ្លែងបែបនេះរបស់នាយករដ្ឋមន្ត្រីធ្វើឡើងក្នុងពិធីអបអរសាទរ ទិវាសិទ្ធិនារីអន្តរជាតិ៨មីនា ដែលធ្វើឡើងក្នុងរាជធានីភ្នំពេញ កាលថ្ងៃអង្គារសប្ដាហ៍នេះ។
ក្នុងពិធីនេះ លោក ហ៊ុន សែន ថ្លែងថា លោកបានពិភាក្សារួចហើយ ឲ្យក្រុមមេធាវីរបស់លោកពិនិត្យមើលពីលទ្ធភាពជួយការពារក្តីឲ្យស្ត្រីជាទណ្ឌិត និងស្ត្រីជាពិរុទ្ធជន ដែលកំពុងឃុំខ្លួនក្នុងពន្ធនាគារ តែពួកគេខ្វះលទ្ធភាពរកមេធាវីដើម្បីការពារក្តីស្វែងរកយុត្តិធម៌។ មេដឹកនាំរូបនេះ បញ្ជាក់ថា តាមរយៈនៃកិច្ចខំប្រឹងប្រែងរបស់ក្រុមមេធាវីនេះ ស្ត្រីជាទណ្ឌិត និងពិរុទ្ធជនមួយចំនួន អាចនឹងត្រូវបានលើកលែងទោស និងថាខ្លះទៀតត្រូវបានបន្ធូរបន្ថយទោស ដោយមិនចាំបាច់រង់ចាំថ្ងៃបុណ្យជាតិមកដល់ដូចកន្លងទៅនោះទេ។
លោកថា៖ «ព្រោះច្បាប់ពន្ធនាគារអនុញ្ញាតិឲ្យនាយករដ្ឋមន្ត្រីចុះហត្ថលេខា សុំព្រះរាជទានលើកលែងទោសនៅពេលណាក៏បានដែរ។ អញ្ចឹង សុំឲ្យក្រសួងយុត្តិធម៌ និង ក្រសួងកិច្ចការនារី សហការជាមួយផ្នែកពន្ធនាគារដើម្បីពិនិត្យមើល អ្នកដែលជាទណ្ឌិតជាប់ទោសជាស្ត្រីហ្នឹង អ្នកណាគប្បីត្រូវបានលើកលែងទោស»។
លោកនាយករដ្ឋមន្ត្រី បានអះអាងថា លោកបានបង្កើតមេធាវីមួយក្រុមឈ្មោះថាក្រុមមេធាវី«តេជោសែន» មានគ្នាប្រមាណជា៦០នាក់ សម្រាប់ជួយការពារក្តីឲ្យស្ត្រីក្រីក្រ ៕
