លោកនាយករដ្ឋមន្ត្រី ហ៊ុន សែន រំឭកមន្ត្រីក្រោមឱវាទ ឲ្យបន្តយកចិត្តទុកដាក់លើកកម្ពស់សិទ្ធិស្ត្រីតាមរយៈការបញ្ចូលពួកគេជាថ្នាក់ដឹកនាំ ដើម្បីបានចូលរួមសម្រេចគោលនយោបាយគាំពារសង្គម។
ក្នុងពិធីអបអរសាទរទិវានារីអន្តរជាតិនារី៨មីនា ដែលធ្វើឡើងក្នុងរាជនីភ្នំពេញ នាថ្ងៃអង្គារសប្ដាហ៍នេះ លោក ហ៊ុន សែន ថ្លែងថា ដើម្បីបន្តលើកកម្ពស់សមភាពយេនឌ័រ ក្នុងការចូលរួមសម្រេចកិច្ចការសង្គម ទាំងនៅថ្នាក់ជាតិ និងថ្នាក់ក្រោមជាតិ លោករំឭកទៅថ្នាក់ដឹកនាំក្រសួង និងស្ថាប័នមួយចំនួនទៀត ឲ្យតែងតាំងស្ត្រីមួយចំនួនទៀត ជាប្រធានអគ្គនាយកដ្ឋាន ឬអនុប្រធាន ។
លោកថា៖ «គ្រប់ក្រសួងស្ថាប័នគប្បីពិនិត្យទទួលយកស្តី្រឲ្យមានគ្រប់នៅក្នុងរចនាសម្ព័ន្ធនៃកិច្ចការរបស់យើងៗ។ ខ្ញុំយល់ថា បច្ចុប្បន្នស្ត្រីរបស់យើងបានកសាងសមត្ថភាពបានគ្រាន់បើហើយ។ ដូច្នេះ ការចាត់បញ្ចូលឲ្យគាត់ទទួលបន្ទុក បើឲ្យគាត់ធ្វើអគ្គនាយកតែម្តងវាជាការល្អ»។
អ្នកវិភាគវ័យក្មេង កញ្ញា លី ស្រីស្រស់ យល់ថា ប្រសិទ្ធិភាពនៃការលើកកម្ពស់សមភាពយេនឌ័រ ឬធានាឲ្យស្ត្រីមានសំឡេងច្រើនបានចូលរួមសម្រេចកិច្ចការសង្គម គឺមិនស្ថិតនៅលើការជំរុញផ្ទាល់មាត់របស់មេដឹកនាំទេ តែត្រូវធ្វើច្បាប់កំណត់ថា ក្រសួងនីមួយៗត្រូវមានស្ត្រីប៉ុន្មាន រដ្ឋសភាត្រូវមានតំណាងរាស្ត្រជាស្តី្រ ប៉ុន្មានពិតប្រាកដ។
កញ្ញាថា៖ «បើសិនជាយើងមានក្របខណ្ឌគតិយុត្តិចែងច្បាស់លាស់អញ្ចឹង ខ្ញុំមើលឃើញថា វាជាយុទ្ធសាស្ត្រល្អជាង ដោយគ្រាន់តែប្រើពាក្យជំរុញលើកទឹកចិត្ត ព្រោះការជំរុញលើកទឹកចិត្តហ្នឹង នៅក្នុងពេលតែមួយរយៈកន្លងទៅប្រសិទ្ធិភាពនៃការនិយាយហ្នឹងវារសាយៗអស់ប្រសិទ្ធិភាព។ អញ្ចឹងការជំរុញឲ្យស្ត្រីចូលរួមជាថ្នាក់ដឹកនាំហ្នឹង វានៅតែគ្មានប្រសិទ្ធិភាពដដែល»។
តំណាងរាស្ត្រជាប់ឆ្នោតអាណត្តិទី៦នេះ មានស្ត្រីតែ១៩រូបប៉ុណ្ណោះ ក្នុងចំណោមតំណាងរាស្ត្រសរុប ១២៥ក្នុងសភា។ ចំណែកតំណែងឧបនាយករដ្ឋមន្ត្រីមាន៩ រូប មានស្រ្តីតែ១ រូប រីឯថ្នាក់រដ្ឋមន្ត្រីវិញ២៩ មានស្ត្រីជារដ្ឋមន្ត្រី៣រូប។
ដោយឡែកសមាសភាពថ្នាក់ដឹកនាំថ្នាក់ក្រោមជាតិ ២៥ រាជធានីខេត្ត មានអភិបាលខេត្តជាស្ត្រីតែ ១រូបប៉ុណ្ណោះ គឺអភិបាលខេត្តកោះកុង។
របាយការណ៍ធនាគារពិភពលោកឆ្នាំ២០១៦ បង្ហាញថា ស្ត្រីនៅកម្ពុជាមានចំនួនជាង ៥១ភាគរយនៃចំនួនប្រជាជនសរុប។ ប៉ុន្តែថា កិច្ចការងារនយោបាយត្រូវបានដឹកនាំដោយបុរស។
របាយការណ៍ដែលចងក្រងដោយគម្រោង «ស្ត្រីក្នុងវិស័យនយោបាយ» បានលើកឡើងថា សំឡេងស្ត្រីក្នុងឆាកនយោបាយមានសភាពស្ងប់ស្ងាត់ ហើយតំណាងស្ត្រីក្នុងស្ថាប័នអំណាចនយោបាយគឺស្ថិតនៅក្នុងកម្រិតទាប។
