ព្រះរាជអាជ្ញាសាលាដំបូងខេត្តព្រះវិហារ អះអាងថា លោកមិនអនុញ្ញាតឲ្យពលរដ្ឋមានជម្លោះដីធ្លីដែលកំពុងជាប់ពន្ធនាគារបណ្តោះអាសន្នបាននៅក្រៅឃុំឡើយ និងព្រមានចាត់វិធានការផ្លូវច្បាប់ទៅលើអ្នកដែលលោកយល់ថា បានផ្តល់យោបល់ឲ្យពលរដ្ឋម្នាក់រត់គេចខ្លួន ដើម្បីទម្លាក់កំហុសលើអាជ្ញាធរ។
កាលពីខែមករា ក្រុមទាហាននៅកងពលតូចលេខ ៦ ដែលការពារដីឲ្យក្រុមហ៊ុន «មេត្រីភាព» បានចាប់ខ្លួនប្រជាពលរដ្ឋ១៥នាក់ ជាបន្តបន្ទាប់ ក្រោយពីប្រជាពលរដ្ឋទាំងនោះបានដឹកនាំអ្នកភូមិតវ៉ារឿងវិវាទដីជាមួយក្រុមហ៊ុន នៅក្នុងឃុំយាង ស្រុកជាំក្សាន្ត។ ប៉ុន្តែ ក្នុងចំណោមពលរដ្ឋ១៥ នាក់ដែលក្រុមទាហានចាប់ទៅនោះ មានបាត់ខ្លួនម្នាក់ គឺឈ្មោះ ស៊ុំ ម៉ឺន រហូតមកដល់ពេលនេះ។
ព្រះរាជអាជ្ញាសាលាដំបូងខេត្តព្រះវិហារ លោក ទី សុវិនថាល់ លើកឡើងថា ករណីពលរដ្ឋម្នាក់បាត់ខ្លួនក្រោយទាហានការពារដីក្រុមហ៊ុនចាប់ខ្លួននោះ គឺមានអ្នកផ្តល់យោបល់ឲ្យរត់គេច និងលាក់ខ្លួន ដើម្បីទំលាក់កំហុសទៅលើអាជ្ញាធរ។
ព្រះរាជអាជ្ញារូបនេះ អះអាងថា ករណីតុលាការសម្រេចឃុំខ្លួនពលរដ្ឋទាំងនោះ គឺពាក់ព័ន្ធបទល្មើសបរិស្ថានមិនមែនពាក់ព័ន្ធជម្លោះដីធ្លីនោះទេ។
លោកបន្ថែមថា៖ «មានអ្នកបញ្ចេះនៅពីក្រោយខ្នង ពេលយើងចាប់បានវិញ បានសួររកអ្នកនៅពីក្រោយឃើញ ហើយយើងនឹងចាត់ការតាមផ្លូវច្បាប់ ព្រោះមានច្បាប់ចែងអ្នកលាក់បំពួន អ្នកផ្សំគំនិតក្នុងការផ្តល់ព័ត៌មាន ផ្តល់យោបល់ ដើម្បីឲ្យគេចខ្លួនក្នុងគោលបំណងទម្លាក់កំហុសមកសមត្ថកិច្ច។ ជនជាប់ឃុំទាំងអស់គ្នាហ្នឹង គឺខាងខ្ញុំមិនអនុញ្ញាតឲ្យនៅក្រៅឃុំទេ ។សិទ្ធិរបស់ចៅក្រមឲ្យនៅក្រៅ ឃុំក៏ឲ្យចុះ នោះជាសិទ្ធិរបស់គេ ប៉ុន្តែខាងហ្នឹងរក្សាសិទ្ធិប្តឹងទៅឧទ្ធរណ៍ ព្រោះវាបានទៅបំផុសបំផុលពាក្យមិនពិតច្រើនណាស់»។
ភរិយារបស់លោក ស៊ុំ ម៉ឺន គឺអ្នកស្រី ភូ ភឹមម៉ៅ បានច្រានចោលការលើកឡើងរបស់ព្រះរាជអាជ្ញានេះ ដោយថា ចាប់តាំងពីស្វាមីបាត់ខ្លួនមករហូតមកទាល់ពេលនេះគឺ មិនទាន់ទទួលបានដំណឹងថានៅទីណា ស្លាប់ ឬរស់នោះទេ។
អ្នកស្រីបន្ថែមថា៖ «ចៅហ្វាយស្រុក គាត់សួរមកខ្ញុំម្សិលមិញថា គេដឹងហើយលោក ស៊ុំ ម៉ឺនកំពុងលាក់ខ្លួនពូននៅក្នុងព្រៃហ្នឹង ខ្ញុំឆ្លើយថា ចុះបើលោកចៅហ្វាយស្រុកដឹងហើយ ដើររកចុះ រកឃើញត្រង់ណា ប្រាប់ខ្ញុំផងឲ្យខ្ញុំបានជួបជុំប្តីខ្ញុំ។ ខ្ញុំកំពុងវេទនារាល់ថ្ងៃនេះ មានពីណាជួយចិញ្ចឹមកូន។ កូនរៀនផង ណាមួយកូនជាប់ពន្ធនាគារផង ណាមួយបាត់ប្តី ខ្ញុំវេទនារកអង្ករច្រកឆ្នាំងមិនបាន ហើយមកចោទថា ខ្ញុំលាក់ប្តី ខ្ញុំលាក់ត្រង់ណា?»។
មន្រ្តីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះវិហារ លោក ឡោ ចាន់ មានប្រសាសន៍ថា ការលើកឡើងរបស់ព្រះរាជអាជ្ញាសាលាដំបូងខេត្តព្រះវិហារនោះ គឺជាលេសមិនទទួលខុសចំពោះការបាត់ខ្លួនពលរដ្ឋតែប៉ុណ្ណោះ។
មន្រ្តីការពារសិទ្ធិមនុស្សរូបនេះបន្តថា ករណីសមត្ថកិច្ចចាប់ខ្លួនពលរដ្ឋ១៥នាក់នោះធ្វើឡើងខុសនីតិវិធីច្បាប់ និងពាក់ព័ន្ធរឿងវិវាទដីធ្លីជាមួយក្រុមហ៊ុនមេត្រីភាព ហើយថា ការចាប់ខ្លួនពលរដ្ឋទាំងនោះក៏មិនមែនជាបទល្មើសជាក់ស្តែងដែរ។
លោកបន្ថែមថា៖ «ពាក់ព័ន្ធលោក ស៊ុំ ម៉ឺន បាត់ខ្លួននេះ ប្រសិនបើលោកព្រះរាជអាជ្ញាថា មានអ្នកនៅពីក្រោយខ្នងផ្តល់យោបល់ឲ្យរត់គេចខ្លួន អញ្ចឹងលោកព្រះរាជអាជ្ញាគួរតែស៊ើបអង្កេតបឋមមួយ ថាតើអ្នកនៅពីក្រោយនោះជាអ្នកណា? ដើម្បីហៅអ្នកនៅពីក្រោយនោះ មកធ្វើការងារសាកសួរអាហ្នឹងមួយ។ មួយវិញទៀត ប្រយ័ត្នតែអត់មានដូចអ្វីដែលលោកព្រះរាជអាជ្ញាធរថា នេះជាលេសមួយដើម្បីកុំឲ្យព័ត៌មាននេះខ្ចាត់ខ្ចាយ ចេះតែលឺសូរដល់អន្តរជាតិក្នុងការទទួលខុសរបស់អាជ្ញាធរតែប៉ុណ្ណេះ ប៉ុណ្ណោះ»។
មន្ត្រីសិទ្ធិមនុស្សអង្គការសហប្រជាជាតិប្រចាំនៅកម្ពុជា បានឲ្យដឹងថា ស្ថាប័នពិភពលោកមួយនេះ កំពុងតែស៊ើបអង្កេតលើជុំវិញករណីបាត់ខ្លួនពលរដ្ឋម្នាក់នៅឯខេត្តព្រះវិហារដែរ ក្រោយពីពលរដ្ឋម្នាក់នោះត្រូវបានក្រុមទាហានចាប់ខ្លួន ដោយថា ក្រុមមន្ត្រីសិទ្ធិមនុស្ស UN បានចុះទៅជួបភាគីពាក់ព័ន្ធដើម្បីស្វែងរកការពិត។
អ្នកភូមិជាង ២០០នាក់ ដែលមានជម្លោះដីធ្លីទំហំជាង ៨៥០០ហិកតាជាមួយក្រុមហ៊ុនមេត្រីភាពនោះ បាននាំគ្នាមកស្វែងរកអន្តរាគមន៍ពីលោកនាយករដ្ឋមន្ត្រី ហ៊ុន សែន ម្ដងរួចមកហើយកាលពីថ្ងៃទី៣១ ខែមករាកន្លងមក ដើម្បីស្នើឲ្យដោះលែងពលរដ្ឋ ១៤នាក់ និងដោះស្រាយបញ្ចប់វិវាទដីធ្លីជួនពួកគេ៕
