ក្រុមអង្គការសង្គមស៊ីវិល និងសហជីពដែលធ្វើការលើកម្ពស់សិទ្ធិស្ត្រី អះអាងថា ពួកគេនឹងនៅតែដើរហែក្បួនក្នុងថ្ងៃទិវាសិទ្ធិនារីអន្តរជាតិនាថ្ងៃស្អែកនេះ ទោះបីជាសាលារាជធានីភ្នំពេញហាមឃាត់ក៏ដោយ។
ក្នុងសន្និសីទសារព័ត៌មាននៅថ្ងៃនេះ នាយិកាប្រតិបត្តិសហជីពចំណីអាហារ និងសេវាកម្មកម្ពុជា អ្នកស្រី អ៊ូ ទេពផល្លីន លើកឡើងថា ពួកគាត់នៅតែរក្សាជំហរដើរហែក្បួនតាមការគ្រោងទុកដដែល ដើម្បីយកញត្តិទៅដាក់នៅក្រសួងពាក់ព័ន្ធ ឲ្យដោះស្រាយបញ្ហាប្រឈមរបស់ស្ត្រីដែលកំពុងកើតឡើងពេលកន្លងមក និងបច្ចុប្បន្ន។
អ្នកស្រី អ៊ូ ទេពផល្លីន ថ្លែងថា៖ «ហើយបើសិនជាយើងដើរទៅដោយទន់ភ្លន់ គាត់នៅតែបង្រ្កាបទៀត យើងក៏អត់តតាំងដែរ។ មានន័យថា អំណាចនៅលើដៃរបស់រដ្ឋាភិបាល អញ្ចឹងយើងជាប្រជាពលរដ្ឋធ្វើម៉េច យើងគ្រាន់តែបង្ហាញអ្វីដែលជាតម្រូវការរបស់ពួកយើងក៏អត់បានដែរ។ យើងសោកស្ដាយ មានន័យថា សិទ្ធិសេរីភាពនៅក្នុងប្រទេសកម្ពុជា រួមទាំងសិទ្ធិក្នុងសម្ដែងមតិ មានការថយក្រោយច្រើន»។
សហជីព និងសង្គមស៊ីវិល គ្រោងប្រារព្ធទិវាសិទ្ធិនារីអន្តរជាតិថ្ងៃ ៨ មីនា នៅថ្ងៃស្អែកនេះ ក្រោមប្រធានបទ «រួមគ្នាបញ្ឈប់អំពើហិង្សាគ្រប់រូបភាពមកលើស្ត្រី» តាមរយៈក្បួនដង្ហែដោយថ្មើរជើងចាប់ពីមុខពហុកីឡាដ្ឋានជាតិអូឡាំពិក ទៅកាន់ការិយាល័យទីស្ដីការគណៈរដ្ឋមន្ត្រី ដើម្បីប្រគល់ «ញត្តិស្ដីពីតម្រូវកាអទិភាពរបស់ស្ត្រី»ជូនដល់រដ្ឋាភិបាល។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី អះអាងថា អាជ្ញាធរបានមិនអនុញ្ញាតឲ្យដង្ហែក្បួន ដោយសារតែព្រួយបារម្ភពីបញ្ហាកក់ស្ទះចរាចរណ៍ និងប៉ះពាល់ដល់សណ្ដាប់ធ្នាប់សាធារណៈ ហើយលោកបានព្រមានចាត់វិធានការទៅលើក្រុមសហជីព និងសង្គមស៊ីវិល ដែលនឹងអនុវត្តផ្ទុយពីសេចក្ដីណែនាំរបស់អាជ្ញាធរ។
លោក ម៉េត មាសភក្ដី ប្រាប់ថា៖ «យើងនឹងចាត់វិធានការ ហើយអ្នកដែលធ្វើខុសពីគោលការណ៍ច្បាប់ គោលការណ៍ដែលឯកភាព អនុញ្ញាតជូនអីហ្នឹង ត្រូវទទួលខុសត្រូវចំពោះមុខច្បាប់ខ្លួនឯង ព្រោះអី្វៗបាននិយាយគ្នាអស់ហើយ រហូតបានអញ្ចើញគាត់មកជួបពិគ្រោះពីគោលបំណង ពីការធ្វើអ្វីៗហើយ ហើយបានសម្រេចរួចទៅហើយ។ អញ្ចឹងមិនមានជូនច្រើនទៀតទេ អ្វីដែលធ្វើខុសពីស្មារតីប្រជុំហ្នឹង ក៏បានបញ្ជាក់ដែរត្រូវទទួលខុសត្រូវចំពោះផ្លូវច្បាប់»។
មន្ត្រីផ្នែកស៊ើបអង្កេតរបស់អង្គការលីកាដូ លោក អំ សំអាត ចាត់ទុកការហាមរបស់សាលារាជធានីភ្នំពេញថា ជាការរឹតត្បិតសិទ្ធិសេរីភាពក្នុងការជួបជុំបញ្ចេញមតិ ដែលមានចែងនៅក្នុងច្បាប់ ហើយលោកថា អន្តរជាតិនឹងបានមើលឃើញអំពីបញ្ហានេះកាន់តែច្បាស់។
លោក អំ សំអាត ប្រាប់ថា៖ «យើងឃើញថា មានករណីខ្លះក៏មានការហែក្បួនជួបជុំអញ្ចឹងដែរ ប៉ុន្តែ អត់មានកកស្ទះទេ។ ខ្ញុំថា អ្វីដែលសំខាន់គឺការជជែកគ្នាទៅថា បើចង់ដើរ តើដើរផ្លូវណាមិនស្ទះចរាចរណ៍ ដែលវាមិនធ្វើឲ្យប៉ះពាល់សណ្ដាប់ធ្នាប់។ យើងជជែកគ្នាតាមហ្នឹងទៅ។ អាហ្នឹងវាជាដំណោះស្រាយមួយល្អ»។
មាត្រា ៤១ នៃច្បាប់រដ្ឋធម្មនុញ្ញ ចែងថា ប្រជាពលរដ្ឋខ្មែរមានសេរីភាពខាងបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ពផ្សាយ សេរីភាពខាងការប្រជុំ។ ជនណាក៏ដោយ មិនអាចឆ្លៀតប្រើសិទ្ធិនេះ ដោយរំលោភនាំអោយប៉ះពាល់ដល់កិត្តិយសរបស់អ្នកដទៃ ដល់ទំនៀមទំលាប់ល្អរបស់សង្គម ដល់សណ្ដាប់ធ្នាប់សាសាធារណៈ និងដល់សន្តិសុខជាតិបានឡើយ៕
