ពន្ធនាគារកម្ពុជា បានសម្រេចបញ្ឈប់ការប្រើប្រាស់ទូរស័ព្ទទាំងអស់នៅក្នុងមណ្ឌលអប់រំកែប្រែទូទាំងប្រទេស តាមបញ្ជារបស់លោកនាយករដ្ឋមន្ត្រី ហ៊ុន សែន ដោយថា ដើម្បីទប់ស្កាត់បទល្មើសចាប់ជំរិត និងបញ្ហាចែកចាយគ្រឿងញៀន។
ក្នុងសេចក្តីណែនាំចុះថ្ងៃទី៤ ខែមីនានេះ អគ្គនាយកដ្ឋានពន្ធនាគារនៃក្រសួងមហាផ្ទៃ បានបញ្ជាទៅប្រធានមណ្ឌលអប់រំកែប្រែទូទាំងប្រទេស ឲ្យបញ្ឈប់ការប្រើប្រាស់ទូរស័ព្ទ និងការលួចលាក់ប្រើប្រាស់ទូរស័ព្ទពីសំណាក់ជនជាប់ឃុំនៅក្នុងពន្ធនាគារ។
អគ្គនាយកដ្ឋានពន្ធនាគារ បានសម្រេចបែបនេះ តែប៉ុន្មានម៉ោងប៉ុណ្ណោះក្រោយពីលោកនាយករដ្ឋមន្ត្រី ហ៊ុន សែន បានថ្លែងជាសាធារណៈឲ្យមន្ត្រីគ្រប់គ្រងពន្ធនាគារ កុំអនុញ្ញាតឲ្យមានការប្រើប្រាស់ទូរស័ព្ទនៅក្នុងមណ្ឌលឃុំឃាំងទូទាំងប្រទេស។
អ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃ លោក នុត សាវនា អះអាងថា បទបញ្ជានេះ ត្រូវបានធ្វើឡើងដើម្បីទប់ស្កាត់បទល្មើសផ្សេងៗ រួមទាំងការបញ្ជាឲ្យចរាចរណ៍គ្រឿងញៀនចេញពីពន្ធនាគារ។
លោក នុត សាវនា ប្រាប់ថា៖ «ជួនកាលជនជាប់ឃុំ គាត់ប្រើទូរស័ព្ទនេះ ទៅធ្វើការឆបោក ឬជំរិតទារប្រាក់ ឬក៏សកម្មភាពឧក្រិដ្ឋមួយចំនួន ដូចជា បញ្ហាដឹកនាំទិញលក់គ្រឿងញៀន ឬក៏បញ្ហាឲ្យធ្វើអីៗផ្សេងទៀត ចេញពីពន្ធនាគារទៅ។ អាហ្នឹង វាខុសនឹងច្បាប់។ កន្លងទៅ វាធ្លាប់មានមែន ខ្ញុំមិនប្រកែកថា អត់ទេ ប៉ុន្តែ គ្រាន់ថា បាតុភាពនេះ វាបានកើតនៅស្ទើរគ្រប់ប្រទេសលើពិភពលោកនេះទៅហើយ»។
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា ហៅបទបញ្ញត្តិនេះថា បានចូលរួមទប់ស្កាត់បទល្មើសមួយផ្នែក តែថា បានរំលោភសិទ្ធិអ្នកជាប់ឃុំមួយចំនួនទៀត ដែលពួកគេមិនជាប់ពាក់ព័ន្ធនឹងសកម្មភាពបង្កឲ្យមានបទឧក្រិដ្ឋ។
លោក ស៊ឹង សែនករុណា ប្រាប់ថា៖ «ជាទូទៅ ពន្ធនាគារត្រូវមានសមត្ថភាពគ្រប់គ្រងទៅលើអ្នកទាំងអស់ហ្នឹង ហើយបើសិនជាធ្វើរបៀបនេះ បង្ហាញពីភាពកម្សោយរបស់មន្ត្រីពន្ធនាគារទាំងអស់ហ្នឹងទៅវិញទេ។ អញ្ចឹង គួរតែកំណត់វិញថា អ្នកទាំងអស់ហ្នឹងគួរតែស្ថិតនៅក្រោមការត្រួតពិនិត្យអីច្បាស់លាស់ ពេលគាត់ឆ្លើយឆ្លងទូរស័ព្ទមកខាងក្រៅ»។
អ្នកតាមដានពីការអភិវឌ្ឍសង្គម លោក ប៉ា ច័ន្ទរឿន ពុំជឿជាក់ទេថា វិធានការពន្ធនាគារកម្ពុជានឹងមានប្រសិទ្ធភាពនោះ ដរាបណាឧក្រិដ្ឋជនគ្រឿងញៀន មិនត្រូវបានចាប់ខ្លួនមកផ្តន្ទាទោសទេនោះ។
លោក ប៉ា ច័ន្ទរឿន ប្រាប់ថា៖ «កន្លងមក យើងឃើញថា អាជ្ញាធរតែងតែអំពាវនាវ ហើយបង្ហាញពីចំណាត់ការ ប៉ុន្តែ ប្រសិទ្ធភាពក្នុងការធ្វើកិច្ចនេះ ហាក់ដូចជានៅមានកម្រិតនៅឡើយ»។
របាយការណ៍ប្រចាំឆ្នាំ២០១៨របស់ក្រសួងមហាផ្ទៃ បានបង្ហាញថា ជនជាប់ឃុំក្នុងពន្ធនាគារ មានចំនួនជាង ៣ម៉ឺននាក់ ក្នុងនោះជាង ២ម៉ឺននាក់ ជាប់ពាក់ព័ន្ធនឹងគ្រឿងញៀន៕