សមត្ថកិច្ចរាប់រយនាក់ បានរារាំងក្រុមអង្គការសង្គមស៊ីវិលដែលប្រារព្ធទិវានារីអន្តរជាតិមិនឲ្យហែញត្តិទៅដាក់នៅទីស្តីការគណៈរដ្ឋមន្រ្តី។
ក្រុមសមត្ថកិច្ច បានសម្រេចបិទទ្វារស្តាតអូឡាំពិក ខណៈក្រុមអង្គការសង្គមស៊ីវិល ប្រមូលផ្ដុំគ្នារៀបចំហែក្បួនដើរចេញពីទីនោះ។
ក្នុងឱកាសអបអរទិវានារីអន្តរជាតិលើកទី១០៨ ដែលប្រព្រឹត្តទៅនៅថ្ងៃទី៨ ខែមីនា នេះ អង្គការសង្គមស៊ីវិលចំនួន ១២ មានគម្រោងយកញត្តិស្នើសុំដំណោះស្រាយលើបញ្ហាជាអាទិភាពរបស់ស្ត្រីចំនួន៧ ទៅរដ្ឋាភិបាល។
ក្រុមអង្គការសង្គមស៊ីវិលទាំងនោះ ស្នើសុំឲ្យបញ្ឈប់ការប្រើប្រាស់អំពើហិង្សាលើស្ត្រីអ្នកការពារសិទ្ធិមនុស្ស ការបៀតបៀន និងហិង្សាផ្លូវភេទលើស្ត្រីនៅកន្លែងការងារដោយគ្មានការលើកលែង។ ពួកគេ ក៏បានអំពាវនាវឲ្យរដ្ឋាភិបាល ពង្រឹងយន្តការការពារសិទ្ឋិពលករចំណាកស្រុកពីការកេងប្រវ័ញ្ចការងារ ការជួញដូរមនុស្ស និងទាសភាពសម័យទំនើប ផ្ដល់ជម្រកសុវត្ថិភាពសម្រាប់ស្ត្រីដែលជួបបញ្ហាអំពើហិង្សាក្នុងគ្រួសារ និងសម្រាប់កម្មករស្ត្រីដែលធ្វើការងារតាមផ្ទះ និងកំណែទម្រង់មធ្យោបាយដឹកជញ្ជូនកម្មករក្នុងវិស័យវាយនភ័ណ្ឌ កាត់ដេរ និងដេរស្បែកជើងជាដើម។
មាត្រា ៤១ នៃច្បាប់រដ្ឋធម្មនុញ្ញ ចែងថា ប្រជាពលរដ្ឋខ្មែរមានសេរីភាពខាងបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ពផ្សាយ សេរីភាពខាងការប្រជុំ។ ជនណាក៏ដោយ មិនអាចឆ្លៀតប្រើសិទ្ធិនេះ ដោយរំលោភនាំអោយប៉ះពាល់ដល់កិត្តិយសរបស់អ្នកដទៃ ដល់ទំនៀមទំលាប់ល្អរបស់សង្គម ដល់សណ្ដាប់ធ្នាប់សាសាធារណៈ និងដល់សន្តិសុខជាតិបានឡើយ៕
