កូនប្រុសម្នាក់របស់លោក គង់ គាំ ដែលជាអតីតមន្ត្រីជាន់ខ្ពស់គណបក្សសង្គ្រោះជាតិ បានសុំធ្វើជាមន្ត្រីនៅក្រសួងកសិកម្មឡើងវិញ ក្រោយពីលោកទទួលបានសិទ្ធិ្ធធ្វើនយោបាយ។
យោងតាមលិខិតមួយច្បាប់ចុះថ្ងៃទី៧ ខែមីនា ឆ្នាំ២០១៩ ដែលដាក់ទៅក្រសួងកសិកមុ្មរុក្ខាប្រមាញ់ និងនេសាទ លោក គង់ បូរ៉ា បានសុំបម្រើការងារជាមន្ត្រីរាជការនៃនាយកដ្ឋានសុខភាពសត្វ និងសុខភាពសាធារណៈ បសុព្យាបាល។
លោក គង់ បូរ៉ា ប្រាប់ VOD បន្ថែមថា លោកធ្លាប់បម្រើការងារនៅកន្លែងដែលលោកដាក់ពាក្យសុំនោះ ក្រោយពីលោករៀនចប់នៅសាកលវិទ្យាល័យភូមិន្ទកសិកម្ម តែបានសម្រេចចិត្តព្យួរការងារនៅឆ្នាំ២០០៨ ក្រោយពីលោកជាប់ជាតំណាងរាស្ត្របក្សប្រឆាំងនៅមណ្ឌលព្រៃវែង។
បើតាមលោក គង់ បូរ៉ា ការសុំធ្វើមន្ត្រីរាជការនៅក្រសួងកសិកម្មវិញនេះ មិនមែនមានន័យថា លោកឈប់ធ្វើនយោបាយទេ ប៉ុន្តែ ដោយសារពេលនេះនេះ លោកមិនទាន់សម្រេចថានឹងទៅចួលរួមជាមួយគណបក្សនយោបាយណាមួយឡើងវិញនៅឡើយ។
លោកថា៖ «ខ្ញុំនឹងពិចារណា ដើម្បីបន្តអាជីពនយោបាយជាមួយនឹងគណបក្សណានៅពេលខាងមុខ ដែលខ្ញុំនឹងចូលរួមការបោះឆ្នោតនៅឆ្នាំ២០២២ និង២០២៣»។
នាយករងខុទ្ទការល័យក្រសួងកសិកម្ម លោក ចាន់ ហេង អះអាងថា លោកមិនបានឃើញលិខិតស្នើរសុំរបស់លោក គង់ បូរ៉ា នៅឡើយទេគិតត្រឹមថ្ងៃសុក្រនេះ។
ប៉ុន្តែ មន្ត្រីក្រសួងនេះថា បើលោក គង់ បូរ៉ា មិនមែនជាមន្ត្រីនៅក្រសួងណាមួយទេ អតីតមន្ត្រីបក្សប្រឆាំងរូបនេះ ត្រូវប្រឡងជ្រើសរើសសមត្ថភាពទើបអាចទៅកាន់តំណែងដែលសុំនោះបាន៕
