រដ្ឋមន្ត្រីក្រសួងមហាផ្ទៃ បានព្រមានចំៗដល់មន្ត្រីជំនាញថា លោកនឹងមិនមកចូលរួមដុតផលិតផលក្លែងក្លាយទៀតទេ បើមន្ត្រីទាំងនោះមិនចាប់អ្នកពាក់ព័ន្ធមកផ្តន្ទាទោសតាមច្បាប់។
ក្នុងពិធីកម្ទេចចោលផលិតផលក្លែងក្លាយ រដ្ឋមន្ត្រីក្រសួងមហាផ្ទៃ លោក ស ខេង បានថ្លែងនាព្រឹកថ្ងៃនេះថា កាលពីពេលថ្មីនេះៗ សមត្ថកិច្ចបានចុះបង្ក្រាបរឹបអូសផលិតផលក្លែងក្លាយ ខូចគុណភាព និងខុសច្បាប់៦០តោនពីម្ចាស់សហគ្រាសមួយចំនួន ហើយផលិតផលទាំងនោះត្រូវបាន លោក ស ខេង ដុចកម្ទេចចោលនៅថ្ងៃនេះ ដោយពុំទាន់ចាប់បានអ្នកប្រព្រឹត្តមកផ្តន្ទាទោសនៅឡើយ។
ករណីនេះ លោក ស ខេង អះអាងថា ការដុតបំផ្លាញផលិតផលទាំងនោះមិនមានប្រសិទ្ធិភាពទេ ដរាបណាមិនចាប់អ្នកប្រព្រឹត្តមកផ្តន្ទាទោសតាមច្បាប់។
លោក ថ្លែងថា៖ « បើមិនចាប់បានម្ចាស់ទេ ខ្ញុំមិនមកបំផ្លាញទៀតទេ។ លក្ខខណ្ឌខ្ញុំ ស្តាប់ឲ្យបាន ពីព្រោះធ្វើវាមិនចប់ ធ្វើអត់ចប់ វាគ្រាន់តែបក់ផ្សែងដដែលៗ ចឹងវាកាលណាចប់»។
ផលិតផលដែលរដ្ឋមន្ត្រីក្រសួងមហាផ្ទៃដុតកម្ទេចចោលនៅថ្ងៃនេះ រួមមាន ទឹកសុទ្ធម៉ាក Evian , Saint Amanda , Montcalm ជិត៦ពាន់កេស ថ្នាំពេទ្យក្លែងក្លាយ១០៦មុខ និងផលិតផលជីកសិកម្ម ជិត៨តោន សរុបទាំងអស់មានជាង៧០តោន។
ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) លោក មៀច សុផាន់ណា ថ្លែងថា ក្រុមការងារជំនាញនឹងបន្តស្រាវជ្រាវជាមួយស្ថាប័នពាក់ព័ន្ធ ដើម្បីស្វែងរកអ្នកផលិត និងចរាចរផលិតផលក្លែងក្លាយមកផ្តន្ទាទោស ដោយថាដើម្បីលុបបំបាត់ការចរាចរផលិតផលក្លែងក្លាយទាំងនោះឲ្យមានប្រសិទ្ធិភាពខ្ពស់។
លោក មានប្រសាសន៍ថា៖ «យើង នឹងបង្កើនសកម្មភាពធ្វើការងាររបស់យើង។ ហើយយើងសួរថា ចាប់បាន ជាសមត្ថកិច្ច ប៉ុន្តែក៏ត្រូវតែមានការអនុញ្ញាត ក៏ដូចជាការណែនាំពីតុលាការដែរ»។
អ្វីដែលគួរឲ្យកត់សំគាល់មន្ត្រីជំនាញប្រយុទ្ធប្រឆាំងផលិតផលក្លែងរូបនោះ អះអាងថា ច្បាប់ដាក់ទោសលើអ្នកផលិត និងអ្នកចែកចាយផលិតផលក្លែងក្លាយ មានកម្រិតស្រាលនៅឡើយ ករណីនេះលោកថាបើចាំបាច់ក្រុមការងារជំនាញនឹងស្នើសុំធ្វើវិសោធនកម្មច្បាប់នោះ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព (PDP-Center) លោក យង់ គិមអេង មានប្រសាសន៍ថា រដ្ឋាភិបាលត្រូវធ្វើកំណែទម្រង់ប្រព័ន្ធយុត្តិធម៌ តាមរយៈពង្រឹងការអនុវត្តច្បាប់ឲ្យបានតឹងរ៉ឹង ទើបទទួលបានផលវិជ្ជមាន។
លោក លើកឡើងថា៖ «យើងចង់កែស្អីមុនគេ គឺត្រូវតែកែប្រព័ន្ធយុត្តិធម៌ ទាល់តែអ្នកធ្វើប្រព័ន្ធយុត្តិធម៌។ រឿងចៅក្រម រឿងព្រះរាជអាជ្ញានៅក្នុងប្រព័ន្ធយុត្តិធម៌ ទាល់តែមានឆន្ទៈខ្ពស់ណាស់ក្នុងការធ្វើឲ្យសង្គមមានយុត្តិធម៌ មានសន្តិសុខ មានសណ្តាប់ធ្នាប់ បានអាចទៅរួច»។
គួរបញ្ជាក់ថា រដ្ឋមន្ត្រីក្រសួងមហាផ្ទៃ លោក ស ខេង បានចូលរួមដុតបំផ្លាញផលិតផលក្លែងក្លាយមានចំនួន៤ដងមកហើយ ក្រោយពីមន្ត្រីជំនាញចុះបង្ក្រាបបាន ប៉ុន្តែក្នុងចំណោម៤លើកនោះ គេមិនឃើញមន្ត្រីជំនាញចាប់អ្នកប្រព្រឹត្តមកផ្តន្ទាទោសនៅឡើយ។
របាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ បានឱ្យដឹងថា ក្នុងរយៈពេល ១២ខែ កាលពីឆ្នាំ២០១៧ ស្ថាប័ននេះបានរឹបអូសផលិតផលក្លែងក្លាយ រួមនឹងគ្រឿងទេសក្លែងក្លាយខុសច្បាប់ចំនួនប្រមាណ៦០០តោន។ ក្រោយមកនៅក្នុងឆ្នាំ២០១៨ សមត្ថកិច្ចបានរឹបអូសទំនិញក្លែងក្លាយ ហើយដុតបំផ្លាញចោលជាបន្តបន្ទាប់ ដែលមានជាង២០០តោន ខណៈនៅដើម២០១៩នេះ សមត្ថកិច្ចក៏បានចុះបង្រ្កាបបានទំនិញក្លែងក្លាយរាប់រយតោនផងដែរ៕
